VICE, BUHAY NA BUHAY PA, GUSTONG MAY EULOGY NA

ni Ador V. Saluta @Adore Me! | March 12, 2024

Inihataid na nitong Linggo nang hapon, Marso 10, ang cremated remains ng namayapang actress na si Jaclyn Jose sa The Garden of the Divine Word Columbary sa E. Rodriguez Sr. Avenue, Quezon City.

Sa ginanap na inurnment, dumating ang bunsong anak na si Gwen Guck na nag-aaral sa Amerika at hindi na niya inabutan ang mga madamdaming eulogy para sa ina.

Ang nasabing eulogy ay dinaluhan ng maraming sikat na celebrities tulad nina Alden Richards, Gladys Reyes, Vice Ganda at iba pa.

Sariwa pa sa alaala ng ilang nandu'n ang eulogy dahil ipinakita ang magagandang alaala nu'ng makasama nila sa ilang projects ang actress.

Gaya ni Vice Ganda, tumatak ang pagiging magkaibigan nila ni Jaclyn nu’ng magkasama sila sa isang pelikula. 

Dahil dito, napag-uusapan na raw nina Vice at Anne Curtis na parang type magpa-eulogy ng una habang buhay pa sila, para naririnig nila ang mga sasabihin sa kanila ng kanilang mga kaibigan habang buhay pa sila.

Sa segment nilang EXpecially For You ng It’s Showtime nitong Biyernes, March 8, sabi ni Vice, “Sinasabi ko nga kay Anne, eh. Parang gusto kong magpa-eulogy. Sabi niya, ‘Bakit ang morbid mo?'” 

Sagot ni Vice, “Hindi, kasi 'pag eulogy, 'yung namamatay, 'yung malalapit sa iyo na tao, pamilya mo, best friend mo, ang dami nilang sinasabing magaganda tungkol sa iyo."

'Pag namatay na nga raw naman, kahit ano pang sabihing maganda tungkol sa 'yo ng ibang tao, hindi mo na maririnig.

Dagdag  ni Vice, “Mag-inuman tayo, tapos saka natin sabihin 'yung mga gusto nating sabihin sa isa’t isa, 'yung masasarap sa pakiramdam.

“Bakit mag-aantay tayo ng eulogy? Kasi 'pag ginagawa natin 'yun, there are so much love left unspoken, 'di ba? Ang daming pagmamahal na hindi nasasabi. Tapos, sasabihin na lang 'pag kailan patay na?

“Bakit hindi natin sabihin 'pag birthday, 'di ba? Pangkaraniwang okasyon. Kasi nga hindi natin hawak ang bukas.

“So, dahil hindi natin alam kung masasabi pa natin ito bukas, sabihin na natin ngayon,” saad ni Vice na inaayunan naman ng mga co-hosts niya.

“Ako kasi, parang… gusto (ko), hangga’t buhay ako, ma-enjoy ko 'yung puwede kong ma-enjoy. Kasi 'pag wala na tayo, hindi na natin mae-enjoy 'yan,” pag-amin ni Vice.

Maging ang taga-media, pinasaringan ng Unkabogable Star, “Ang dami nating sinasabing hindi magaganda sa isa’t isa. Bakit hindi natin i-try na magsalita ng magaganda, 'di ba?

“Diyos ko! 'Yung parang sa mga news, 'yung mga reporters, 'pag buhay ka, kung anu-anong sinasabi sa iyo, 'di ba, ng mga reporter?

“Pero 'pag namatay ka, ano 'yan, the legend in Philippine showbiz, an icon, one of the best.

Sus! Pero nu'ng nabubuhay, kung anu-anong tsismis ang isinulat mo, 'di ba?

“Let’s talk about love, speak about love, speak of love, speak for love, speak with love, speak to love, at kung anumang preposition 'yan, basta may love, 'di ba?” katwiran ni Vice.

'Di raw tanggap ng family and friends ng GF… NABULGAR: SI XIAN ANG NAKIPAG-BREAK KAY KIM

ni Ador V. Saluta @Adore Me! | March 7, 2024

Sa isang panayam ni Ogie Diaz kay Kim Chiu, ibinahagi ng aktres ang mga huling sandali nila ng ex-boyfriend na si Xian Lim o ang kanilang magagandang sandali bago sila naghiwalay. 

Sa latest episode ng Ogie Diaz Showbiz Update Vlog, kuwento ni Ogie, ayon sa kanyang source, tinawagan umano ni Xian si Kim para magpaluto ng steak noong araw ng kanilang hiwalayan.

“Hindi naman nila sinasabi ang dahilan ng split, pero nakarating sa akin kung paano sila nag-split. Puwede naman ‘tong i-deny ni Kim Chiu o ni Xian Lim,” sabi ni Ogie. 

“Isang araw daw, itong si Xian Lim ay nag-request kay Kim Chiu na ipagluto siya ng paborito niyang steak. So, ito namang si Kim Chiu, excited na nagluto ng steak. Siyempre, um-appear si Xian Lim, ganyan-ganyan,” pagpapatuloy pang kuwento ni Ogie.                   

Hindi na nabanggit pa kung ano ang kasunod na eksena after ng kainan, kung nagselos ba si Xian o may hinihiling ang lalaki na 'di nito naibigay at humantong sa hindi pagkakaintindihan.

Sa pagpapatuloy pa ng kuwento ni Ogie, habang kumakain daw ang dalawa ay sinabihan ni Xian si Kim na tapusin na ang kanilang relasyon. 

Sey ni Ogie, “Dumayalog si Xian Lim. Ang sabi, ‘Tapusin na natin ang ating relasyon. Parang wala namang patutunguhan. Ayaw din naman sa akin ng family mo at ng iba mong friends." 

Ngunit paglilinaw ni Ogie, “Something to that effect, ha? Pero siyempre, puwedeng exaggerated, puwedeng kulang ‘yung kuwento ko. Pero more or less, nag-start ‘yan sa steak.” 

Luh! 'Di kaya nagustuhan ni Xian ang pagkakaluto ni Kim ng steak? Char!

Ipinost sa socmed… KIM, NAKAPILA, NALOKA SA NAGHALIKAN SA HARAP NIYA

ni Ador V. Saluta @Adore Me! | March 6, 2024

Sa kuwento ng It's Showtime host na si Kim Chiu sa kanyang post sa X (dating Twitter), ikinaloka niya ang naranasan nu’ng isang araw na may nag-PDA (public display of affection) sa kanyang harapan habang siya'y umoorder ng tubig. 

Hindi binanggit ni Kim kung saang tindahan ito o fast food subalit kanyang ikinaloka nang makita nang harap-harapan na may naghahalikang couple in front of her eyes habang nakapila siya at hinihintay ang order na mineral water.

Marahil ay ‘di nakilala si Kim habang nakapila dahil maaaring naka-shades ang actress na bida sa seryeng What's Wrong with Secretary Kim?. 

Or baka naman sinadya ng couple ang eksena para kumalat sa social media dahil alam nila na nasa likod nila ang It’s Showtime host at tiyak na mababanggit nito sa kanilang programa ang nasaksihan?

Post ng aktres-host, "That feeling na may naghahalikan sa harap mo habang nakapila ka ng halos 1 hour na."

Ayon pa kay Kim, gusto lang naman daw sana niyang bumili ng tubig.

"Gusto ko lang naman umorder ng tubig! Ba't ganu'n!" 

Napaisip naman ang ilang netizens kung wala bang alalay na mauutusan si Kim at bakit siya ang kailangang pumila nang halos isang oras para lang bumili ng tubig?