Spurs-Thunder sa West Finals, Pistons at Cavs may Game 7

ni Anthony E. Servinio @Sports | May 17, 2026

Photo: Dumadrayb si San Antonio Spurs forward Keldon Johnson (3) sa depensa ni Minnesota Timberwolves center Rudy Gobert, (gitna) sa NBA basketball second-round playoff series. (AP/Abbie Parr)

Laro sa Lunes - Little Caesars

8 AM Cleveland vs. Detroit

Tiniyak ng bisitang San Antonio Spurs ang kanilang upuan sa Western Conference Finals sa kumbinsidong 139-109 panalo sa Minnesota Timberwolves sa 2026 NBA Playoffs kahapon sa Target Center.  

Kailangan ng ultimong Game Seven sa East at wagi ang Detroit Pistons sa Cleveland Cavaliers, 115-94. Inilatag nina Victor Wembanyama, Stephon Castle at De'Aaron Fox ang pundasyon sa pagtayo ng 74-61 lamang matapos ang unang 24 minuto.  Sumama sa nagbuhos ng puntos sina Julian Champagnie at kabayan Dylan Harper para lalong palakihin ang agwat, 132-95, sa huling 6 na minuto.

Anim na Spurs ang may 11 puntos o higit sa pangunguna nina Castle na may 32 at 21 kay Fox. Sumunod si Wemby na may 19 at Harper na may 15 bilang reserba. Nagtala ng 24 si Anthony Edwards para sa nabigong Timberwolves.  Nagwakas ang serye, 4-2 at magtutuos sa West Finals ang Spurs at World Champion Oklahoma City Thunder simula Martes.

Ayaw ng Pistons na masayang ang pagiging numero uno at kumilos para baligtarin ang 23-17 bentahe ng Cavs sa 54-51 pabor sa kanila bago ang pangatlong quarter. Mula roon ay inalagaan nila ito patungo sa 115-93 sa huling minuto. Ipinasok ni Cade Cunningham ang 11 ng kanyang 21 sa kritikal na pangalawang quarter.  Nag-ambag ng 17 si reserbang sentro Paul Reed habang tig-15 sina Daniss Jenkins at Jalen Duren.

Gumawa ng 23 si James Harden at parehong 18 sina Donovan Mitchell at Evan Mobley.  Nagkatalo sa mga reserba at mas malaki ang ambag ng Pistons, 48-19. Naghihintay sa East Finals ang New York Knicks na winalis ang Philadelphia 76ers, 4-0.  May mabuting balita at kasali na muli sa ensayo si OG Anunoby na napilay ang singit sa Game 2 kaya lumiban siya sa huling 2 laro.  

Caracut bagyo ng E-Painters swak sa semis, giba ang SMB

ni Anthony E. Servinio @Sports | May 16, 2026

Photo: Credit Official PBA

Laro ngayong Sabado - Ynares Antipolo

5:15 PM Meralco vs. Magnolia

7:30 PM NLEX vs. TNT

Umapoy mula sa malayo ang Rain Or Shine Elasto Painters sa huling mga minuto upang masugpo ang San Miguel Beermen, 113-104, sa 2026 PBA Commissioner's Cup quarterfinals kagabi sa Ynares Center Antipolo. Ang ROS ang unang koponan na pasok sa semifinals.

Pumukol ng dalawang three-points at isang four-points si Andrei Caracut upang itayo ang 105-97 lamang sa huling tatlong minuto. Hindi pa tapos si Caracut at sinamahan siya nina Caelan Tiongson at Jaylen Johnson para lalong idiin ang kalaban, 113-100, na pinakamalaking agwat sa buong laro at isang minuto ang nalalabi.

Hinirang na Best Player si Caracut na may 29 puntos mula sa anim na tres. Parehong 23 sina Tiongson at Johnson. Ayon kay Coach Yeng Guiao, araw talaga nila at ito ang pinakamagandang pagkakataon na pumasok sa semifinals. Kapag pinaabot nila ng Linggo ay baka hindi na nila matatalo ang SMB.

Nanguna sa Beermen si Bennie Boatwright na may 24 habang 19 si CJay Perez. Naglaho ang pangarap na Grand Slam ng SMB na kampeon sa nakaraang Philippine Cup.

Tinatapos din kagabi ang tapatan ng #2 Barangay Ginebra at #7 Phoenix Fuel Masters.

Ang mananaig sa nasabing serye ang makakalaro ng ROS sa best-of-seven semifinals.

Dalawang knockout game para sa semifinals ang handog ngayon sa parehong palaruan tampok ang sagupaan ng numero uno NLEX Road Warriors at defending champion TNT Tropang 5G. Bubuksan ang aksiyon ng #4 Meralco Bolts kontra #5 Magnolia Chicken Timplados Hotshots.

Mitchell ng Cavaliers binulaga ang Pistons

ni Anthony E. Servinio @Sports | May 15, 2026

Photo: Rumagasa tungo sa basket si Cleveland Cavaliers center Evan Mobley (4) sa harap ng depensa ni Detroit Pistons guard Ausar Thompson (9) sa second half ng NBA playoffs basketball series kahapon sa Detroit. (AP Photo/Duane Burleson)

Laro sa Sabado

7:00 AM Detroit vs. Cleveland

9:30 AM SA vs. Minnesota

Ginulat ng bisitang Cleveland Cavaliers ang Detroit Pistons sa overtime, 117-113, sa Eastern Conference Semifinals ng 2026 NBA Playoffs kahapon sa Little Caesars Arena. Ito rin ang unang panalo ng bisita sa serye at maaaring tapusin na ito ng Cavs pag-uwi nila para sa Game Six sa Sabado.

Tumalon agad ang Cleveland sa pitong puntos ni Donovan Mitchell sa dagdag 5 minuto at inabot ng 3 minuto bago naka-shoot ang Detroit. 

Sapat na ang limang puntos na agwat, 112-107 at sumandal ang Cavs sa mga buslo nina James Harden at Evan Mobley para manatili ang resulta.

Bumawi sa malamyang apat na quarter si Mitchell para magtapos na may 21. Nanguna si Harden na may 30 at Max Strus na may 20.

Naipilit ng Cavs ang overtime sa dalawang free throw ni Mobley na may 45 segundong nalalabi, 103-103. Humabol ang Cleveland mula 94-103 sa huling 3 minuto kung saan bumuhos sila ng siyam na hindi nakasagot ang Detroit.

Gumawa ng 8 ng kanyang 39 si Cade Cunningham sa overtime subalit kulang ang tulong ng mga kakampi. Nag-ambag ng 19 si Daniss Jenkins habang 13 kay Tobias Harris.

Maliban sa Cleveland, sisikapin din ng San Antonio Spurs na tapusin ang serye laban sa Minnesota Timberwolves ngayong Sabado. Lamang ang Spurs, 3-2, bunga ng tagumpay

sa Game 5. 

Naghihintay ng makakalaro sa Conference Finals ang World Champion Oklahoma City Thunder sa West at New York Knicks sa East. Kahit anong mangyari, magsisimula ang best-of-seven NBA Finals sa Hunyo 4, petsa sa Pilipinas.