4 golds lalampasan ng 'Pinas sa Aichi-Nagoya Asian Games

by Gerard Arce @Sports News | August 22, 2026

Photo: Pinangunahan ni Philippine Olympic Committee President Abraham 'Bambol' Tolentino ang briefing para sa nalalapit na pagsabak ng mga atleta sa Asian Games sa Japan. (pocpix)

Umaasa si Philippine Olympic Committee (POC) President Abraham “Bambol” Tolentino na malalampasan ng Pilipinas ang apat na gintong medalya sa paparating na 20th Aichi-Nagoya Asian Games kasunod ng problemang kinahaharap ng defending champion Gilas Pilipinas national team pagdating sa pagbuo ng lineup.

Gayunman, nananatiling optimistiko si Tolentino sa kalagayan ng national squad na sasabak sa Asiad quadrennial meet na maaring sandalan sina 2024 Paris Olympics double gold medalist Carlos Edriel “Caloy” Yulo, two-time Olympian Ernest John “EJ” Obiena at Filipina tennis star Alexandra “Alex” Eala.

“Kailangan malampasan naman natin ‘yung four, kahit na may obstacle. Sana ma-ano pa rin natin, pero marami naman tayong pagkukunan, may mga dagdag pa iyan,” pahayag ni Tolentino sa isang report kasunod ng ginanap na media briefing para sa Asian Games.

Inaasahan din ng dating Mayor at kinatawan ng Tagaytay City na magpapakitang gilas ang mga national boxers at mga Olympian medalists na sina Nesthy Petecio, Aira Villegas, Carlo Paalam at Eumir Felix Marcial, habang lalaban rin ang mga weightlifters na sina Elreen Ando, Rose Jean Ramos, Kristel Macrohon at first Olympic gold medalist Hidilyn Diaz-Naranjo.

Nananatiling pambato rin ng bansa ang Jiujitsu national team na sina two-time World champion Annie Ramirez, Kaila Napolis, at Kimberly Custodio, gayundin ang Beach Volleyball team na pinagbibidahan nina Cherry Ann “Sisi” Rondina at Bernadeth Pons, ang nakababatang kapatid ni Carlos na si Eldrew Yulo at two-time Olympian swimmer Kayla Sanchez.

“May paghuhugutan yan. Whether team or individual. Hopefully lumampas talaga ng apat, pero without basketball, pero kung malakas pa rin ang basketball, good, lampas talaga ng apat,” paliwanag ng pinuno rin ng Philippine Cycling Federation.

Hindi rin nawawala sa listahan ni Tolentino ang paboritong ‘past-time’ ng mga Pinoy na Mobile Legends: Bang Bang at Esports, gayundin ang Athletics team, habang ang inaalagaan para sa Los Angeles Olympics na Samboist turn to judo player na si 2025 Southeast Asian Games titlist Chino Sy sa larangan ng under-100kgs category.

Jiu-Jiteira Ramirez, Custodio at Napolis sa U.S. ang ensayo para sa Asiad

by Gerard Arce @Sports News | August 22, 2026

Photo: Ramirez

Isang buwang nagsasanay sa Estados Unidos si 3-time World Jiu-jitsu champion Annie Ramirez sa misyong madepensahan ang kampeonato sa 20th Aichi-Nagoya Asian Games sa Japan sa Setyembre.

Nakatakdang pangunahan ng 35-anyos na jiu-jiteira, katuwang sina 4-time World titlist Kimberly Anne Custodio at 2022 Hangzhou Games bronze medalist Kaila Napolis ang 15-strong Philippine national squad para higitan ang 2 ginto at  tansong medalya sa China meet.

Tanging ang 3-time SEAG gold medalist ang nalalabing kampeon para sa Pilipinas matapos pormal na magretiro si 3-time World champion Meggie Ochoa. Gayunman, nananatiling malaki ang tsansa ng koponan na determinadong daigin ang jiu-jitsu powerhouse na United Arab Emirates na kumulekta ng 10 medalya kabilang ang 4 ginto, at tig-3 pilak at tanso.

Nakamit ng 3-time Asian Championship titlist ang bagong korona sa paboritong women’s under-57kgs nang pataubin si Diana Lomei ng Ukraine  9-2 sa finals ng 2026 JJIF World Championships sa Mubadala Arena sa Abu Dhabi, upang sundan ang tagumpay sa 10th JJIF Jiu-Jitsu Asian Championship noong Hulyo sa Almaty Arena sa Kazakhstan.

Ito ang ikatlong sunod na tagumpay ngayong taon ni Ramirez matapos makuha ang bagong kampeonato sa 2026 Asian Beach Games sa  China, habang puntirya sumabak sa mas mababang kategorya sa under-52kgs si Ramirez kasama si 2025 World Games silver medalist at 2023 SEAG champion na si Napolis simula Set. 19-Okt. 4 sa Aichi Budokan.

Sasabak si Custodio sa mas mabigat na under-48kgs matapos ang kampeonato sa adult female under-45 kg, kasama si Jollirine Co, habang bibira sa under-63kgs sina Sanya Beach Games titlist Alex Enriquez at Andrea Lao.

Nakahanda ang men’s squad na matagpuan ang bangis sa loob ng mats mula kina Myron Myles Mangubat at Santino Luis Luzuriaga sa under-62kgs; dating SEAG titlist Marc Lim at Yman Baluyo sa under-69kgs; pares nina Antonio Dy at Mark Vergel sa under-77kgs; Vito Luis Luzuriaga at David Miranda sa under-85kgs; at Romeo Arellano sa men’s under-94kgs category.

Strong Group, 5th place, sinisiw ang Jordan sa Jones Cup

by Anthony Servinio @Sports News | August 22, 2026

Photo: Rumaragasa sa drayb si Matthew Wright sa yugtong ito ng laban kontra Jordan sa pagtatapos ng William Jones Cup sa Taiwan. (SGApix)

Nagpadala ng matinding mensahe ang Strong Group Athletics at tinalo ang Jordan, 96-91, upang magtapos sa ika-limang puwesto sa kontrobersyal na ika-45 William Jones Cup sa Xinzhuang Gym. 

Tinapos ng kinatawan ng Pilipinas ang torneo na isa lang ang talo sa pitong laro, salamat sa kakaibang sistema ng kompetisyon. Lamang ang Jordan matapos ang tatlong quarter, 74-71.

Napapanahong nahanap nina Isaiah Pineiro at Jonathan Manalili ang kanilang shooting para sa pinagsamang 13 puntos at sa tulong nina DJ Fenner at Ian Miller ay nakahabol at tuluyang lumayo ang SGA. Kahit hindi na ginamit sa huling quarter, nagtala pa rin si Boban Marjanovic ng 21 puntos sa 25 minuto.

Sumuporta sina Tajuan Agee na may 17 at Miller at Matthew Wright na parehong 15. Umani ng batikos ang desisyon ng tagapangasiwa ng Chinese-Taipei Basketball Association na ipasok agad ang Chinese-Taipei Blue sa semifinals kahit ano ang maging kartada nito.

Nagtapos ang Blue sa 1-5 at natanggal ang SGA kahit 5-1 sila na kapantay ng pumasok na Wonju DB Promy ng Timog Korea. Hindi tanggap pati rin sa ilang Taiwanese ang ginawa ng CTBA. Hindi rin nakatulong ang paghihingi nila ng tawad kasabay ng pangako na pagbubutihin ang susunod na torneo.

Ang Jones Cup ay para maghanda sa Asian Games at para mapanood ng mga Taiwanese ang kanilang koponan - marahil sa takot na langawin kapag hindi Taiwan ang maglalaro.

Subalit nakuha ng SGA ang amor ng mga Taiwanese dahil sa kanilang magkasunod na kampeonato noong 2024 at 2025 kaya puno lagi noon ang palaruan kasama ang maraming Pinoy.

Hindi pa malinaw kung babalik ang SGA sa Jones Cup. Matatandaan na umayaw din ang koponan na lumahok muli sa Dubai Basketball Championship matapos ang sa tingin nila ay hindi magandang tawagan ng reperi laban sa kanila noong 2025 edisyon.