Nagpaalala ang Department of Health (DOH) sa publiko hinggil sa tamang pagsusuot ng face masks sa gitna ng nagpapatuloy na banta ng covid-19.
Paalala ni Health Usec. Ma Rosario Vergeire, sa pagsusuot ng face mask dapat natatakpan ang ilong at bibig, kung saan sinasabing naipapasa ang virus.
Hindi aniya dapat na sa baba lamang nakasuot ang face masks.
Una nang sinabi ng DOH na anumang uri ng community quarantine ang umiiral sa isang lugar ay dapat pa ring magsuot ng face masks paglabas ng bahay.
Bahagi na anila ito ng new normal ngayon upang maiwasan ang pagkalat ng virus.
Maliban sa pagsusuot ng face masks, ilan pa sa mga isinusulong ng DOH upang maiwasan ang hawahan ng virus ay ang regular na paghuhugas ng kamay, pagtatakip ng ilong at bibig kung uubo at pag-obserba sa physical distancing.
Hindi aniya magbabago ang pamantayan na ito at kailangang gawin kapag nasa labas ng bahay.