Humingi ng paumanhin ang Department of Health-Research Institute for Tropical Medicine (DOH-RITM) makaraang magkamali nang sabihing positibo sa Coronavirus Disease (COVID 19) si ACT-CIS Partylist Representative Eric Go Yap.
"We wish to publicly apologize to Hon. Erick Go Yap for forwarding a report of his COVID-19 results that displayed a clerical oversight," ayon sa pahayag ng RITM.
Nananatili umanong negatibo ang kongresista sa COVID-19.
Kaugnay nito, tiniyak ng RITM na sumusunod sila sa mga protocol ng World Health Organization (WHO) at nananatiling accurate ang resulta ng mga isinasagawang test kaugnay ng COVID-19 sa kabila ng nangyaring insidente.
Giit ng RITM, maituturing na isolated incident ang nangyari kay Yap makaraang magkaroon ng encoding error na nadiskubre kagabi ng Molecular Biology Laboratory (MBL) ng DOH-RITM. "For the assurance of the public, we have reviewed all results we have previously forwarded and we affirm that this incident remains isolated. We have also added another layer of verification for all succeeding reports we will submit. We promise that this, and other associated incidents, will never happen again".
Samantala, wala umanong balak si Yap na kasuhan o usigin pa ang RITM sa naging pagkakamali nito. Nauunawaan umano niya na clerical error lamang ang nangyari.
Aminado ang kongresista na sa nakalipas na dalawang araw ay naging mahirap sa kanya at sa kanyang pamilya na tanggapin na maging positibo sa COVID-19. Pero naniniwala siya na hindi maiaalis na magkaroon ng pagkakamali lalo na't ang RITM ngayon ang pinakaabalang medical facility.