Sa gitna ng lockdown dahil sa COVID-19, isang 25-anyos na babae ang huli sa pagbebenta ng ilegal na droga sa Malabon City, kahapon ng madaling-araw.
Kinilala ni Malabon Police Chief P/Col. Jessie Tamayao ang suspek na si Lourdes Caguia alyas Enang, ng Bgy. North Bay Boulevard South, Navotas City.
Si Caguia na hindi kabilang sa drug watch list ng pulisya ay naaresto kasunod ng intelligence reports hinggil sa kanyang illegal drug activities sa Bgy. Concepcion.
Ani Col. Tamayao, alas-3:00 ng madaling-araw nang masunggaban ng mga operatiba ng Station Drug Enforcement Unit (SDEU) sa pangunguna ni P/Capt. Johnny Baltan si Caguia sa ikinasang buy-bust operation sa Arellano St., Bgy. Concepcion, matapos bentahan ng isang sachet ng shabu ang police na nagpanggap na buyer kapalit ng P300 marked money.
Narekober sa suspek ang pitong sachets na naglalaman ng nasa 8.85 gramo ng shabu na may standard drug price na P58,344.