Ipinag-utos ng Court of Appeals (CA) ang reinstatement o pagpapabalik sa trabaho ng 51 empleyado ng GMA Network.
Sa kautusan ng CA 15th Division na ibinaba noong February 15, 2020, “partly granted” ang petition for certiorari ng mga petitioner na mga dating empleyado ng GMA Network.
Ang desisyon naman na may petsang May 31, 2017 at resolusyon na may petsang August 31, 2017 na inisyu ng National Labor Relations Commission (NLRC) pabor sa GMA Network ay binaligtad at isinantabi na ng CA.
Nag-ugat ang kaso sa isinagawang protesta ng mga empleyado ng GMA Network na tinatawag na “TAG” sa harapan ng opisina ng TV network noong 2015.
Ang ibang mga empleyado ay terminated o sinibak sa trabaho habang ang iba ay hindi na na-renew ang kontrata bilang talents.
Kaugnay ng desisyon ng CA, ang 51 empleyado ay pinadedeklara nang regular employees na entitled o dapat makatanggap ng full backwages kasama ang allowance at iba pang mga benepisyo.
Sa ngayon, wala pang inilalabas na pahayag ang GMA Network kaugnay sa desisyon ng CA.