Isang overseas Filipino worker (OFW) sa Hong Kong ang nagpositibo sa Coronavirus Disease 2019 (COVID-19).
Ayon kay DOH Asec. Maria Rosario Vergeire, nahawa ang nasabing OFW sa pasyenteng kanyang inaalagaan, na nagpositibo rin sa virus.
Tumanggi namang magbigay ng iba pang detalye si Vergeire hinggil sa nasabing OFW dahil ito pa lamang aniya ang impormasyong natatanggap nila.
Una rin namang kinumpirma ng Philippine Consulate General na isang Pinay migrant worker sa Hong Kong ang nagpositibo sa COVID-19.
Nasa maayos na umanong kondisyon ang nasabing OFW at wala ng iba pang sintomas ng sakit.
Tiniyak din nito na ipinagkakalooban nila ng kinakailangang ayuda ang OFW para sa agarang paggaling nito.
Agad din umano itong palalabasin ng pagamutan sakaling magnegatibo sa sakit.