Inaresto sa Ninoy Aquino International Airport (NAIA) ang dating business partner ni television personality Kris Aquino makaraang dumating ito mula sa Thailand, ayon sa Bureau of Immigration (BI) kahapon.
Nahaharap sa kasong estafa si Nicardio M. Falcis II at misappropriation o conversion at paglabag sa Section 9 of RA 8484 kilala bilang Access Devices Regulation Act.
Si Falcis na dumating kamakalawa ay maaaring mag-post ng bail para sa kanyang pansamantalang kalayaan sa halagang P6,000 para sa kasong estafa, habang P60,000 naman sa access devices violation, ayon sa National Bureau of Investigation-NAIA.
Nagulat na lamang si Falcis na may warrant of arrest ito saka hinuli ng NBI nang iprisinta nito ang kanyang pasaporte makaraang dumating sa bansa kasama ang kanyang pamilya.
Siya ay kinasuhan ng estafa at fraudulent use of access device ng Taguig City Prosecutor’s Office makaraang magreklamo si Aquino dahil sa mga hindi awtorisadong paggamit ng kanyang credit card na umabot sa P62,784.32.
Na-dismiss naman ang reklamong qualified theft laban kay Falcis dahil sa pagkabigong ma-establish ang lahat ng elementong magsasangkot kay Falcis sa qualified theft.