Sa kabila ng mahigpit na pagbabawal ng Bureau of Animal Industry (BAI) na iwasang magdala ng karne sa Pilipinas, para umanong naghahamon pa ang ilang pasahero at binabalewala ang payo ng kinauukulan.
Umabot sa 54 kilos ng iba’t ibang klase ng karne ang nasabat ng Bureau of Customs (BOC) sa Ninoy Aquino International Airport (NAIA) Terminal 1 mula sa mga pasaherong galing sa ibang bansa.
Kabilang sa mga nakumpiska ng Customs at BAI ang 18.5 kilograms na chicken meat, 19 kilos na pork meat, 12.5 kilos duck meat at 4 kilograms na beef meat.
Nabatid mula sa Customs na ang mga produktong karne ay nagmula sa Xiamen, Guangzhou at Jingjang, China, Malaysia at Narita, Japan.
Ayon kay BAIA-NAIA Quarantine Service Dr. Reynaldo Quilang, patuloy ang kanilang pagkumpiska sa mga karneng galing sa ibang bansa sanhi sa kawalan ng import permit o mga galing sa bansang tinamaan ng African Swine Fever.
Dagdag pa nito, naka-focus din ang BAI sa mga footbath na nakalatag sa dinaraanan ng mga pasahero pagbaba sa eroplano.