Hinimok ni Marinduque Representative at Chairman ng House Committee on Energy na si Cong. Lord Allan Velasco ang Department of Energy at iba pang industry players na simulan na ang bagong round ng bidding para sa karagdagang power supply contracts.
Aniya, kailangan na ng ating bansa ang dagdag na kapasidad mula sa mga bagong planta upang masabayan ang patuloy na pagtaas ng demand sa kuryente, kasama na rin ang pagsuporta sa “golden age of infrastructure” ng kasalukuyang administrasyon.
Kasama rin sa benepisyo ng pagkakaroon ng karagdagang power supply contracts ang pagkakaroon ng mga bagong kontrata kung saan mas mababa ang presyuhan nito.
Nabanggit niya ang mga ito kasunod ng matagumpay na Competitive Selection Process (CSP) ng Meralco noong Setyembre kung saan nagresulta ito sa pag-award ng Power Supply Agreements (PSAs) para sa kabuuang halaga ng 1,700MW na baseload at mid-merit capacity simula sa Disyembre.
Nakapaloob sa mga PSAs na napirmahan ang mas mababang presyo kaysa sa kasalukuyang generation charge kaya natatayang makatitipid ang mga consumers ng P9.46 bilyon kada taon sa loob ng 10 taon para sa 1,200MW na kontrata at P4.4 bilyon naman kada taon sa loob ng 5 taon para sa 500MW na kontrata.