Tinutulan ng Supreme Court... Trump, itinaas sa 15% ang global tariff

by Jenny Rose Albason @Overseas News | February 24, 2026

Photo: File Leah Millis / Reuters

Itinaas ni Donald Trump sa 15% ang global duty sa mga inaangkat na produkto sa Estados Unidos, isang araw matapos ideklarang ilegal ng US Supreme Court ang malaking bahagi ng kanyang tariff program.

Sa kanyang Truth Social platform, sinabi ni Trump na matapos ang “thorough review” sa desisyon ng Korte Suprema, na tinawag niyang “extraordinarily anti-American,” itataas ng administrasyon ang import levies sa “fully allowed, and legally tested, 15% level.”

Nauna nang inanunsyo ni Trump ang 10% taripa matapos ang desisyon ng korte.

Dagdag pa niya, sa mga susunod na buwan ay maghahanap ang kanyang administrasyon ng iba pang “legally permissible” na paraan upang magpatupad ng karagdagang taripa.

Ayon sa White House, pansamantala lamang ang bagong 15% duty at maaari itong ipatupad hanggang 150 araw. May mga exemption pa rin para sa ilang sektor na nasa ilalim ng hiwalay na imbestigasyon, kabilang ang pharmaceutical products at mga kalakal na saklaw ng US-Mexico-Canada trade agreement.

Ang hakbang ay pinakabagong yugto sa pabago-bagong patakaran sa taripa ng administrasyong Trump, kung saan ilang beses nang itinakda, binago, o binawi ang iba’t ibang antas ng buwis sa mga produktong inaangkat sa US sa nakalipas na taon.

Noong Biyernes, sa botong 6-3, nagpasya ang conservative-majority Supreme Court na ang batas noong 1977 na ginamit ni Trump upang magpataw ng biglaang taripa sa ilang bansa ay hindi nagbibigay ng otoridad sa pangulo upang magpatupad ng ganitong hakbang.

Mariing tinuligsa ni Trump ang desisyon, at sinabing siya ay na-“ashamed” sa ilang miyembro ng korte, kahit dalawa sa mga mahistrado ay siya mismo ang nagtalaga.

Russia at Ukraine, wala pa ring napagkasunduan

by Jenny Rose Albason @World News | February 20, 2026

Photo: Ukrainian President Volodymyr Zelenskyy - SS

Walang magandang resulta ang pinakahuling pagpupulong ng mga kinatawan ng Russia at Ukraine na ginanap sa Switzerland, na inorganisa ng Estados Unidos. Ito na ang ikatlong negosasyon ngayong taon, matapos ang unang pulong na ginanap noong Enero sa Abu Dhabi.

Ayon kay Ukrainian President Volodymyr Zelenskyy, hindi naging madali ang mga negosasyon. Inihayag niya ang pahayag matapos makausap ang kanyang negotiating team na dumalo sa pulong. Una niyang inakusahan ang Russia na hindi sumasang-ayon sa ilang napag-usapan sa negosasyon.

Bagama’t nagkaroon ng ilang diskusyon, kabilang ang posibilidad na ipasakamay ng Russia ang mga sinakop nitong teritoryo sa Ukraine, walang konkretong kasunduan ang naabot. Naniniwala si Zelenskyy na sa mga susunod na araw ay magkakaroon muli ng mga pag-uusap sa pagitan ng dalawang panig.

US nagre-ready vs. Iran

by Jenny Rose Albason @World News | February 16, 2026

Photo: Donald J. Trump - FB

Naghahanda ang militar ng Estados Unidos para sa posibilidad ng tuluy-tuloy at ilang linggong operasyon laban sa Iran kung mag-uutos si US President Donald Trump na atakihin ang bansa. 

Ayon sa kanila, mas malawak at mas seryoso ang plano kumpara sa mga naunang military retaliation ng Amerika.

Nakasaad na nakatakdang makipagpulong sina Steve Witkoff at Jared Kushner, kinatawan ng Amerika, sa mga kinatawan ng Iran sa Geneva sa Martes, sa tulong ng Oman bilang tagapamagitan para talakayin ang kasunduang pangkapayapaan. Sinabi naman ni US Secretary of State Marco Rubio na mas nais ni Trump ang kasunduan sa Tehran, ngunit aminadong mahirap itong makamit.

Kasabay nito, patuloy ang pagdami ng puwersang militar ng US sa rehiyon. Kinumpirma ng Pentagon ang pagpapadala ng karagdagang aircraft carrier, libu-libong tropa, fighter aircraft, at guided-missile destroyers sa Middle East.

Sa isang talumpati sa North Carolina, binanggit ni Trump ang posibilidad ng “regime change” sa Iran, bagama’t hindi tinukoy kung sino ang nais niyang pumalit. Ayon sa White House spokesperson na si Anna Kelly, “all options on the table with regard to Iran,” at si Trump ang magpapasya base sa interes ng Amerika. Tumanggi namang magkomento ang Pentagon sa detalye ng operasyon.

Noong nakaraang taon, nagsagawa ang US ng limitadong pag-atake sa mga nuclear site ng Iran, kabilang ang “Midnight Hammer” na gumamit ng stealth bombers. Gumanti ang Iran sa pamamagitan ng limitadong strike sa isang base ng US sa Qatar. Ayon sa mga opisyal, mas kumplikado ang planong operasyon ngayon, at posibleng targetin hindi lamang ang nuclear facilities kundi pati ang mga pasilidad ng estado at seguridad ng bansa.

Babala ng mga eksperto, mataas ang panganib sa mga puwersa ng US dahil sa arsenal ng missile ng Iran. Posible rin na ang serye ng gantihan ay magpalawak sa tensyon ng gera sa buong rehiyon. Matatag ang Islamic Revolutionary Guard Corps ng Iran at sinabi nitong maaari silang gumanti laban sa alinmang base militar ng US sakaling atakihin ang kanilang teritoryo.

May mga base militar ang US sa Jordan, Kuwait, Saudi Arabia, Qatar, Bahrain, United Arab Emirates, at Turkey. Sa gitna ng tumitinding tensyon, sinabi ni Israeli Prime Minister Benjamin Netanyahu na anumang kasunduan sa Iran ay dapat maglaman ng elementong makikinabang sa Israel. Ipinahayag naman ng Iran na handa silang talakayin ang limitasyon sa nuclear program kapalit ng pag-alis ng mga sanksyon ng Amerika, ngunit tumangging isama sa negosasyon ang kanilang missile program.