Delegasyon ng Pilipinas sa WHO FCTC pinuri sa pagdepensa sa mga magsasaka, komunidad

ni Chit Luna @News | November 21, 2025

Photo File: World Health Organization FCTC celebration event Geneva Switzerland -15 Year Anniversary of the WHO FCTC celebration event Geneva Switzerland 5 March 2020. Photo Credit Secreta

Tumanggap ng matinding papuri mula sa mga grupo ng magsasaka ang delegasyon ng Pilipinas sa nagaganap na ika-11 Conference of the Parties (COP) ng WHO Framework Convention on Tobacco Control (WHO FCTC) sa Geneva, Switzerland.

Ito ay dahil sa mariing paggigiit ng delegasyon sa karapatan ng bansa na suriin ang mga iminumungkahing hakbang alinsunod sa pambansang prayoridad at kapasidad—lalo na kung ang mga hakbang na ito ay makakaapekto sa kabuhayan ng mga taga-bukid at mga komunidad na nagtatanim ng tabako.

Sa kanyang pambungad na pahayag, binigyang-diin ni Ambassador Carlos Sorreta, pinuno ng delegasyon ng Pilipinas sa WHO FCTC, ang kahalagahan ng responsableng transisyon para sa mga komunidad na umaasa pa rin sa tabako dahil sinusuportahan pa rin ng pananim na ito ang mga komunidad sa Pilipinas.

Ayon kay Sorreta, dapat tiyakin na ang mga transisyon ay sosyal at ekonomikal na responsable para pag-ibayuhin ang kabuhayan at panatilihin ang pamumuhunan, na naaayon sa batas at sa convention.

Binibigyan ng Pilipinas ng kahalagahan ang “soberanya at iba't ibang pambansang konteksto sa pagpapatupad ng gabay,” sabi ni Sorreta.

Ang posisyon na ito ay nagbibigay-diin na ang mga posibleng hakbang sa ilalim ng FCTC ay hindi sapilitan at dapat umayon sa umiiral na batas at ginagabayan ng konsultasyon.

Ang paninindigan ng delegasyon ay ikinatuwa ng mga lokal na grupo na nag-aalala tungkol sa epekto ng mga 'matitinding' mungkahi na walang pagsasaalang-alang sa mga lokal na realidad.

Ang Northern Luzon Alliance (NLA), isang kongresyonal na bloc na binubuo ng mga kinatawan mula sa mga probinsyang nagtatanim ng tabako, ay nagsabing nakatulong ang posisyon ng Pilipinas na masiguro na ang mga patakarang hindi tugma sa kondisyon ng agrikultura sa mga rehiyon ng tabako ay hindi ipapataw.

Ayon sa NLA, sinusuportahan nila ang delegasyon ng Pilipinas sa pagtataguyod sa kapakanan ng mga magsasaka, konsyumer at komunidad sa mga probinsyang nagtatanim ng tabako at hindi pagsang-ayon sa mga panukala na tapusin ang suporta ng gobyerno para sa mga nagtatanim, magpataw ng quota at tuluyang itigil ang pagbebenta ng tabako na hindi makatotohanan.

Hindi tugma ang nasabing panukala sa agrikultural at ekonomikong realidad ng Pilipinas, sabi ng grupo.

Idinagdag pa nila na kung tinanggap ang mga mungkahing ito, katumbas ito ng isang 'economic death sentence' para sa mga probinsyang agrikultural at mga industriyang konektado sa kanila.

Ang mga hakbang na ito ay lubhang makakasama sa kabuhayan ng mga taga-bukid, makakagambala sa mga legal na industriya at ilalagay sa panganib ang mga kita na nagpopondo sa mahahalagang pampublikong serbisyo, ayon sa NLA.

Samantala, binigyang diin ng Federation of Free Farmers (FFF) ang matagal nang papel ng tabako sa ekonomiya ng mga taga-bukid.

Ang tabako ay nananatiling pangunahing pinagkukunan ng kabuhayan sa halos 20 probinsya, ayon sa FFF. Ito ang tanging pinagkukunan ng kita ng maraming pamilya sa loob ng maraming henerasyon, dagdag nito.

Kinikilala ng delegasyon ng Pilipinas ang mga realidad na ito, ayon sa FFF.

Sa pagprotekta sa mga magsasaka at mga komunidad na umaasa sa pananim na ito, nagpakita ang delegasyon ng Pilipinas ng awa at katarungan, wika ng FFF.

Piniling pakinggan ng delegasyon ang mga tao na siyang unang magdurusa at higit na maaapektuhan ng panukalang laban sa tabako.

Nagpasalamat ang FFF sa delegasyon ng Pilipinas sa pagsuporta hindi lamang sa pananim, kundi sa dignidad at kinabukasan ng mga magsasaka.

Iba't ibang variant ng Covid, bibigyan na ng pangalan

ni Mary Gutierrez Almirañez | June 2, 2021

Nadiskubre ng World Health Organizations (WHO) ang Delta variant ng COVID-19, bilang pangatlong mutations ng naturang virus at itinuturing na dahilan kaya mabilis ang hawahan nito sa India.

Ayon pa sa WHO COVID-19 technical lead na si Maria Van Kerkhove, "We know that the B.1.617.2, the Delta variant, does have increased transmissibility, which means it can spread easier between people.”

Dagdag niya, “What we understand is that it is this B.1.617.2 variant with one additional deletion in the location of the spike protein.”

Nitong May 31 lamang ay inianunsiyo ng WHO na ipapangalan na nila ang mga variant of concerned ng COVID-19 alinsunod sa Greek alphabet upang maiwasan ang pagkalito at diskriminasyon kapag ibinase iyon sa bansang pinagmulan ng mutations, katulad ng Indian variant, South African variant, UK variant at Brazilian variant.

Sa ngayon ay tatawagin nang Alpha variant ang B.1.1.7 lineages ng UK variant, habang Beta variant naman ang itatawag sa B.1.351 lineages ng South African variant, Gamma variant para sa P.1 lineages ng Brazilian variant, at Delta variant sa B.1.617.2 lineages ng Indian variant.

India variant ng COVID-19, nakapasok na sa 'Pinas

ni Mary Gutierrez Almirañez | May 11, 2021

Kinumpirma ng Department of Health (DOH) na nakapasok na sa ‘Pinas ang Indian variant ng COVID-19, kung saan 2 ang iniulat na nagpositibo, ayon kay DOH Undersecretary Maria Rosario Vergeire ngayong umaga, May 11.

Batay pa sa World Health Organizations (WHO), ang mutations ng E484Q at L452R ay idineklarang ‘variant of concern’ at ‘concern at the global level’ dahil mas mabilis itong kumalat at makahawa.

Matatandaan namang ipinatupad ang travel ban sa ‘Pinas upang maiwasan ang pagpasok ng Indian variant.

Gayunman, ilang biyahero galing India pa rin ang nakapasok sa bansa, kung saan 12 ang iniulat na nagpositibo sa COVID-19.