Dekalidad ang edukasyon kung dekalidad ang pagtuturo ng mga guro

ni Kuya Win Gatchalian - @Win Tayong Lahat | July 22, 2021

Tunay na malaking tulong sa professional development ng mga guro ang pagsasagawa ng mga training o pagsasanay kapag nagsimula na silang magturo o ang tinatawag na in-service training. Ngunit nais din nating bigyang-diin na kailangang makatanggap ng mga nagbabalak maging guro ng dekalidad na edukasyon sa kolehiyo pa lamang o sa pre-service training.

Ang pagreporma sa sistema ng edukasyon para sa mga guro ang isa sa mga panukala ng Senate Committee on Basic Education, Arts and Culture na pinamumunuan ng inyong lingkod. Unang kinilala ng komite noong 2020 na ang sektor ng edukasyon ay nababalot sa krisis. Bagama’t mas madali ang pagkilala sa krisis dahil sa mababang markang nakuha ng ating mga mag-aaral sa international large-scale assessments, mahalaga ang pagsulong at pagpapatupad ng mga kinakailangang reporma upang mawakasan ang naturang krisis.

Nakalulungkot na karamihan sa mga nagtapos sa Teacher Education Institutions (TEIs) sa bansa ay hirap makapasa sa Licensure Examination for Teachers (LET). Mula 2010 hanggang 2019, 35 porsiyento lamang ang nakapasa para sa secondary level, samantalang 28 porsiyento naman ang nakapasa sa elementary level.

Isa ring hamon ang kahandaan ng mga guro sa pagtuturo ng K to 12 curriculum. Maliban sa mga English elementary teachers, hirap ang mga pangkaraniwang guro sa elementarya at high school na masagutan ng tama ang kalahati sa mga tanong ng mga subject content tests, ayon sa ulat ng World Bank at Australian Aid noong 2016.

Kaya naman upang i-angat ang kalidad ng pagtuturo at pagsasanay ng mga guro, isinusulong din ng inyong lingkod sa Senate Bill No. 2152 o ang Teacher Education Excellence Act ang pagpapatatag sa Teacher Education Council (TEC) upang lalo pang mapaigting ang ugnayan sa pagitan ng Department of Education (DepEd), Commission on Higher Education (CHED, at Professional Regulation Commission (PRC). Sa pamamagitan nito, matitiyak ang ugnayan ng pre-service at in-service training ng mga guro sa bansa. Kasunod nito ang pag-angat ng kalidad ng mga guro at ang edukasyon sa mga paaralan sa elementarya at high school.

Sa ating pagreporma sa sistema ng edukasyon, hindi na tayo maaaring bumalik sa nakasanayan na nating gawin, at isa sa mga dapat nating tutukan ay ang pag-angat ng kalidad ng edukasyon ng ating mga guro. Kung magagawa ito, mapapaigting ang kanilang kakayahan at kahandaang maghatid ng dekalidad na edukasyon sa mga kabataang mag-aaral.

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com

Mga hamon sa distance learning, dapat ayusin bago magpasukan

ni Kuya Win Gatchalian - @Win Tayong Lahat | July 20, 2021

Sa pormal na pagwawakas ng School Year (SY) 2020-2021 noong nagdaang linggo, nais nating bigyang-diin ang masinsinang pagrepaso sa programang distance learning ng Department of Education (DepEd) bilang paghahanda naman sa susunod na pasukan.

Kamakailan ay inihain ng inyong lingkod ang Senate Resolution No. 739 upang suriin ang kahandaan ng mga paaralan na maghatid ng de-kalidad na edukasyon para sa SY 2021-2022 — sa pamamagitan man ng limited face-to-face classes, distance learning o iba pang paraan ng pagtuturo.

Ayon sa Pulse Asia Survey na kinomisyon ng inyong lingkod noong Pebrero, wala pang kalahati sa mga magulang na may anak sa basic education o 46 porsiyento ang nagsabing natututo ang kanilang anak. Lumabas din na 30 porsiyento naman ang hindi matukoy kung natututo o hindi ang kanilang anak, habang 25 porsiyento naman ang nagsabing hindi natututo ang kanilang anak.

Nabanggit din sa naturang survey ang pangunahing mga isyu na kinahaharap ng mga magulang, guardian, at mag-aaral mula noong pumutok ang pandemya. Kabilang dito ang hirap sa pagsagot sa mga modules (53 porsiyento), mahina o paputul-putol na internet (43 porsiyento), hirap sa pagtutok o katamaran sa pakikinig (42 porsiyento) at kakulangan ng mga gadgets para sa distance learning (36 porsiyento).

Bagama’t muling ipinagpaliban ang pilot test ng limited face-to-face classes, dapat pa ring paghandaan ng Department of Education (DepEd) ang muling pagbubukas ng mga paaralan sakaling payagan na ang pagsasagawa nito. Isa sa mahahalagang hakbang na dapat gawin ay ang pagtiyak na may sapat na pasilidad para sa tubig at kabuuang sanitation ng mga paaralan.

Ang problema sa sistema ng edukasyon ay nakita na natin bago pa tumama ang pandemya. Hindi naging maganda ang resulta ng 2019 Trends in International Mathematics and Science Study (TIMSS), 2019 Southeast Asia Primary Learning Metrics (SEA-PLM), at 2018 Programme for International Student Assessment (PISA). Kung hindi panghuli, pangalawa sa pinakahuli ang ating mga mag-aaral sa basic education pagdating sa math at science. Ang problemang ito ay pinalala pa ng isang taong pagsasara ng mga paaralan dahil sa COVID-19.

Bagama’t kasalukuyan naman ang pagreporma ng DepEd sa K to 12 kurikulum, isinusulong din ng inyong lingkod ang marami pang reporma sa iba’t ibang aspeto ng edukasyon tulad ng kalidad ng mga guro at education governance. Ang mga usaping ito ay patuloy nating tinatalakay sa panukalang muling pagbuo ng Congressional Oversight Committee on Education (EDCOM).

Mahalagang matuto tayo sa mga hamong ating kinahaharap sa distance learning upang maging mas handa na tayo oras na pahintulutan na ang pagkakaroon ng limited face-to-face classes.

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com

Pag-aalboroto ng Bulkang Taal, malaking banta sa kaligtasan ng kabataan

ni Kuya Win Gatchalian - @Win Tayong Lahat | July 15, 2021

Kasalukuyang nakataas sa Alert Level 3 ang Bulkang Taal. Kahapon ay iniulat ang anim na volcanic earthquakes dito at patuloy pa rin ang paglalabas ng malalaking usok o ‘yung tinatawag na steam plume kung saan isa sa mga nilalaman nito ay mapanganib sa kalusugan ng tao — volcanic sulfur dioxide (SO2). Bilang paghahanda sa posibleng mas malalakas na pagsabog nito ay mariin nating hinihimok ang Department of Health (DOH), Department of Social Welfare and Development (DSWD) at mga lokal na pamahalaan na tiyakin ang kaligtasan ng kabataan mula sa pagkakasakit pati na sa pang-aabuso.

Maliban sa pagkakaroon ng mga ligtas na espasyo para sa kabataan, isinusulong ng inyong lingkod ang agarang pagpapamahagi ng mga pangunahing pangangailangan at serbisyo tulad ng pagkain at nutrisyon, tubig, sanitary at hygiene kits, psychosocial interventions at iba pang kinakailangan sa panahon ng sakuna.

Ang pagpapamahagi sa mga pangangailangan at serbisyong ito ay nakasaad sa Republic Act No. 10821 o Children’s Emergency Relief and Protection Act. Minamandato ng naturang batas ang DSWD na bumuo ng Comprehensive Emergency Program for Children (CEPC) na magiging basehan sa pagresponde sa mga kalamidad at iba pang sakuna. Layunin ng programang ito na bigyang-proteksiyon at suportahan ang pangangailangan ng mga bata, pati na ng mga buntis at lactating mothers.

Bukod dito, tinututukan din natin ang kaligtasan ng mga bata mula sa iba’t ibang uri ng pang-aabuso. Matatandaang, iniulat ng children’s organization na Save The Children noong nakaraang taon na hindi bababa sa 124,000 ang bilang ng kabataan na napilitang lumikas mula sa kanilang tahanan noong sumabog ang Bulkang Taal.

Nais nating bigyang-diin ang isa pang suliranin na kinahaharap ng mga bata, lalo na kapag may sakuna at anumang emergency situation kung saang maraming batang babae ang nahaharap sa banta ng karahasan at pang-aabuso. Sa pag-aaral noong 2017 ni Dr. Gloria Luz M. Nelson, isang social science researcher ng Department of Science and Technology DOST — National Research Council of the Philippines (DOST - NRCP), ang mga babaeng may edad 10 hanggang 19 ay humaharap sa panganib na mabuntis o mamolestiya sa kanilang pananatili sa evacuation centers. Ito ay mula sa pag-aaral ni Dr. Nelson tungkol sa epekto ng mga Bagyong Yolanda at Ruby noong 2013 at 2014 sa batang kababaihan.

Mandato rin sa ilalim ng Children’s Emergency Relief and Protection Act ang mas pinaigting at komprehensibong hakbang upang masugpo at ma-monitor ang iba’t ibang uri ng pang-aabuso at karahasan sa panahon ng kalamidad.

Upang matugunan naman ang mga hamong hinaharap ng mga evacuees, tulad ng congestion, kakulangan ng mga pasilidad at iba pang panganib, inihain din ng inyong lingkod noong 2019 ang Senate Bill No. 747 o ang Evacuation Center Act na naglalayong magkaroon ng permanenteng evacuation center sa bawat lungsod at munisipalidad sa bansa.

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com