Visayas at southern Mindanao, magiging maulan dahil sa LPA

ni Thea Janica Teh | January 13, 2021

Isang low pressure area (LPA) ang magdadala ng malakas na pag-ulan ngayong Miyerkules sa Visayas at southern Mindanao, ayon sa PAGASA.

Huling namataan ang LPA sa 210 kilometers south ng Zamboanga City, Zamboanga del Sur. Ayon kay PAGASA weather forecaster Benison Estareja, maliit ang posibilidad na maging bagyo ang binabantayang LPA.

Ngunit, pinaalalahanan pa rin ng PAGASA ang mga naninirahan sa Visayas, Caraga, Northern Mindanao, Zamboanga Peninsula, Bangsamoro, Sorsogon at Masbate na maaaring magkaroon ng flash flood at landslide dahil sa malakas na pag-ulan.

Dagdag pa ni Estareja, makararanas din ng localized thunderstorm ang Davao Region at Soccskargen na magtatagal ng 1 hanggang 2 oras. Bukod pa rito, ang Metro Manila at natitirang bahagi ng Luzon ay makararanas ng mahinang pag-ulan dahil naman sa hanging amihan.

Samantala, nakapagtala ng temperaturang 20.7 degrees Celsius kaninang 5:00 am ang National Capital Region at ang Baguio City naman ay nakapagtala ng 12.2 degrees Celsius kaninang 2:00 am.

Palawan, babayuhin ng malakas na pag-ulan – PAGASA

ni Lolet Abania | January 3, 2021

Itinaas na sa orange rainfall warning ang buong katimugang bahagi ng Palawan kabilang ang Kalayaan Group of Islands ngayong Linggo, ayon sa PAGASA.

Sa heavy rainfall advisory ng PAGASA, ngayong alas-2:00 ng hapon, nagbabala ang ahensiya ng posibleng mga pagbaha sa mga mabababang lugar, gayundin ang maaaring landslides.

Pinapayuhan ng PAGASA ang publiko, maging ang Disaster Risk Reduction and Management Council, na patuloy na mag-ingat at mag-monitor ng kasalukuyang lagay ng panahon.

Ang inilabas na warning ay base sa kasalukuyang radar trends at meteorological data ng PAGASA.

Una nang naglabas ng advisory ang PAGASA ngayong alas-onse ng umaga ng Linggo, na ang tail-end ng isang frontal system ang nakakaapekto sa buong Southern Luzon, kung saan magdudulot ng malakas na pagbuhos ng ulan sa tinatayang 10 lugar sa bansa, kabilang ang Bicol Region, Quezon at Polillo Islands.

Makararanas din ng kalat-kalat na mahina hanggang sa katamtamang pagbuhos ng ulan sa buong Metro Manila, MIMAROPA, Visayas, Mindanao, Aurora, Nueva Ecija, Bulacan at ilang bahagi ng CALABARZON.

PAGASA: Wala nang bagyo hanggang Dec. 31

ni Thea Janica Teh | December 28, 2020

Wala nang inaasahang bagyong papasok sa Pilipinas hanggang matapos ang taong 2020, ayon sa PAGASA ngayong Lunes. Ngunit, posible umanong magkaroon ng bugso ng amihan sa Miyerkules na makaaapekto sa northern Luzon, bahagi ni PAGASA weather forecaster Chris Perez.

Ngayong Lunes, may 2 low pressure area (LPA) ang magdadala ng pag-ulan sa ilang parte ng Luzon. Ang isang LPA ay namataan sa 90 kilometers east ng Baler, Aurora habang ang isa naman ay namataan sa 235 kilometers northwest ng Puerto Princesa City, Palawan.

Ang LPA na natagpuan sa Palawan ay inaasahang makalalabas ng bansa ngayong Lunes. Dagdag ng PAGASA, magdadala rin ng pag-ulan sa Cagayan Valley at Aurora ang tail end ng LPA.

Makararanas din ng kalat na pag-ulan at thunderstorm ang Bicol Region, Eastern Visayas, Central Visayas, Caraga at Davao Region dahil sa easterlies o warm wind na nanggagaling sa Pacific.

Samantala, umabot sa 22 bagyo ang tumama sa Pilipinas ngayong taon kabilang ang bagyong Vicky kung saan tumama sa Visayas at Mindanao ilang araw bago mag-Pasko na nakapatay ng 8 katao.