Maulang weekend, asahan-PAGASA

ni Thea Janica Teh | November 28, 2020

Magdadala ng pag-ulan at makulimlim na panahon ang easterlies wind na nanggaling sa Pacific region sa Metro Manila at kalapit nitong lalawigan ngayong Sabado, ayon sa PAGASA.

Sa inilabas na 4 am daily bulletin, makararanas din ng pag-ulan ngayong Sabado ang Eastern Visayas, Caraga at Davao region.

Ang mga ulap ay magdadala rin ng pag-ulan at kidlat sa mainland Cagayan, Isabela, Apayao, Abra, Kalinga, Mountain Province, Ifugao, Quirino, Nueva Vizcaya, Aurora at Benguet dahil naman sa tail-end ng cold front.

Mananatili naman ang hanging amihan sa loob ng Ilocos region, Batanes at Babuyan Island. Kaya naman pinaalalahanan ng PAGASA ang lahat ng mga residente sa mga lugar na nabanggit na mag-ingat sa posibleng pagbaha at landslide dahil sa malakas na pag-ulan.

Ulysses paalis na, 4 na bagyo next

ni Thea Janica Teh | November 13, 2020

Tuluyan nang humina sa severe tropical storm ang Bagyong Ulysses habang palayo sa Pilipinas ngayong Biyernes, ayon sa PAGASA.

Ito ay huling namataan sa 415 kilometers west ng Iba, Zambales kaninang alas-4 ng madaling araw na may maximum sustained wind na 110kph at may bugso ng hangin na 135 kph.

Makakaranas pa rin ng pag-ulan at bugso ng hangin ang Batanes, Babuyan Island, Cordillera Administrative Region, Zambales, Bataan at northern Occidental Mindoro kasama ang Lubang Island dahil sa amihan. Moderate to heavy rain naman ang mararanasan ngayong Biyernes ng northern at eastern portion ng mainland Cagayan, eastern portion ng Isabela, Aurora, Nueva Vizcaya, Quirino at Apayao.

Pagdating sa Ilocos Region, ang natitirang bahagi ng Cordillera Administrative Region, Cagaya Valley, northern portion ng Quezon kasama ang Polillo Island, Zambales at Bataan ay makakaranas ng light to moderate na ulan.

Asahan naman na magiging maaraw na sa Metro Manila at natitirang bahagi ng bansa. Inaasahan din na ngayong umaga ay lalabas na sa Philippine Area of Responsibility (PAR) ang Bagyong Ulysses.

Samantala, pinaalalahanan naman ng PAGASA ang publiko na may 4 pang binabantayang bagyo na maaaring pumasok sa ating bansa bago matapos ang taon.

'Siony', lumayas na ng 'Pinas, 'Tonyo' next!

ni Lolet Abania | November 7, 2020

Nakalabas na ng Philippine Area of Responsibility (PAR) ang Bagyong Siony na may international name na Atsani na nasa layong 280 kilometro hilagang kanluran ng extreme northern Luzon na may lakas na bugso ng hangin na 95 kph na aabot ng hanggang 115 kph at kumikilos ito pahilagang-kanluran sa bilis na 10 kph, ayon sa PAGASA.

Ayon sa forecast ng PAGASA, bandang alas-4 ng umaga ngayong Sabado, namataan ang isang Low Pressure Area (LPA) na tinatayang nasa layo na 440 kilometro silangang bahagi ng Guiuan, Eastern Samar.

Asahan itong magiging ganap na bagyo sa susunod na dalawang araw at tatawagin itong Tropical Depression Tonyo. Gayundin, kumikilos ang LPA patungo sa bahagi ng Eastern Visayas na posibleng bumuhos ang malakas na ulan ngayong umaga o hapon.

Samantala, makakaranas ang mga lugar sa CALABARZON, MIMAROPA, Bicol Region, Visayas at Mindanao ng maulap na papawirin na may pulo-pulong pag-ulan, pagkulog at pagkidlat dahil sa LPA.

Katamtaman hanggang sa malakas na buhos ng ulan din ang mararanasan na posibleng magkaroon ng pagbaha at landslides sa nasabing lugar, ayon sa ulat ng PAGASA.

Sa Metro Manila at natitirang bahagi ng Luzon, bahagyang maulap hanggang sa maulap na papawirin na may manaka-nakang pagbuhos ng ulan dahil sa localized thunderstorms na posibleng magkaroon ng pagbaha o landslides.