2 Japanese teams kontra PVL squad sa Invitationals

ni Gerard Arce @Sports News | August 14, 2025

Photo: Kurashiki Ablaze - IG

Mga laro sa Linggo (MOA Arena)

Battle-for-third

4 n.h. – Cignal HD Spikers vs Creamline

Winner-take-all Finals

6:30 n.g. – Chery Tiggo vs PLDT 

Magbabalik-aksyon sa hatawan ang 2023 Premier Volleyball League Invitational Conference titlists Kurashiki Ablaze kasama ang Kobe Shinwa Women's University upang hamunin ang apat na koponan sa 2025 edisyon ng nasabing komperensiya na magsisimula sa Agosto 21 sa Philsports Arena sa Pasig City.

Magsisilbing guest squad ang dalawang Japanese teams pagkatapos ng isinasagawang PVL On Tour, na nasa dulo ng aksyon sa championship round sa Linggo sa MOA Arena sa Pasay City sa pagitan ng 2021 Open Conference champ Chery Tiggo Crossovers at first-time finalists PLDT High Speed Hitters.

Ito ang ikatlong salang ng Kurashiki na nakakuha rin ng bronze medal finish sa 2024 Invitational tilt at unang beses na sasalang ang Kobe Shinwa bilang guest team sa nangungunang professional women’s volleyball sa bansa.

Ang Kurashiki ay isang Japanese professional team na minsang sumabak sa V.League, kung saan nagwagi ito ng ilang medalya sa 13th National 6-Person Final League at Grand Champion Match Awards sa Japan. Tinalo ang Creamline Cool Smashers sa five set game noong 2023  para mapurnada ang unang subok sa Grand Slam ng koponan.

Maituturing na isa sa crowd favorite ang Kurashiki Ablaze na nagpakita ng naiibang trademark sa larangan ng laro mula sa naiibang disiplina, bilis, at eksaktong mga laro at playmaking. Sa kabilang banda, matutuloy na rin ang inaabangang PVL debut ng Kobe Shinwa na  umatras mula sa 2022 edisyon kung saan isang miyembro ng koponan ang nagpositibo sa COVID-19.

Makakaharap ng Kurashiki at Kobe Shinwa ang apat na semifinalists sa PVL On Tour katunggali ang Chery Tiggo, PLDT, Creamline at Cignal HD Spikers, na inaabangang eksplosibo na susubok sa diskarte at bilis na takbo ng sistema ng Japanese teams. 

Alas women sumungkit ng bronze sa 5th SEA V.League

ni Gerard Arce @Sports News | August 4, 2025

Photo: Napasigaw si Jia de Guzman sa harap ni Angel Canino nang magwagi ang Alas Women laban sa Indonesia kahapon. (pilipinaslivefbpix)

Nagpakawala ng matitinding banat si dating UAAP rookie/MVP Angel Anne Canino upang ipamalas ng Alas Pilipinas women’s national team ang dominasyon kontra Indonesia sa bisa ng 25-20, 25-20, 16-25, 25-13, kahapon, upang masiguro ang bronze medal sa first leg ng 2025 Southeast Asia V.League na ginanap sa Terminal 21, Korat sa Nakhon Ratchasima kahapon.

Nakabangon mula sa dalawang sunod na pagkatalo kontra finalist Thailand at Vietnam noong Biyernes ng gabi at Sabado ng hapon upang makuha ng Pilipinas ang ikalimang third place finish sa liga na nagsimula noong 2019. Nakabawi ang Pilipinas sa fourth place finish sa nagdaang 2025 VTV International Cup matapos talunin ng Chinese Taipei sa battle-for-third.

Bumanat ng game-high 23 puntos ang DLSU Lady Spiker outside spiker mula sa 18 atake at 5 blocks kaakibat ang dalawang errors. Naging katambal nito sa iskoring si dating Finals MVP mula NU Lady Bulldogs Alyssa Solomon sa 19 puntos mula sa 14 kills. 

Bumira rin si dating UAAP MVP Eya Laure ng 12 puntos mula lahat sa atake at Fifi Sharma sa 11 puntos galing sa 6 na atake at 3 aces habang nag-ambag din sina middle blocker Dell Palomata ng 8 puntos galing sa atake at ace playmaker at team captain Julia De Guzman sa 5 puntos.

Bagaman lamang sa atake ang Indonesia sa first set ay naging mabisa ang net defense ng Alas, kaakibat ang 6 na errors ng Indonesia sa loob ng 28 minuto. Nakatakdang ganapin ang second leg sa Biyernes hanggang Linggo, Agosto 8-10, sa Ninh Binh Gymnasium sa Ninh Binh, Vietnam sa torneong kaakibat ng Asian Volleyball Confederation (AVC). 

Unang panalo ng Foxies vs. Titans sa PVL On Tour

ni VA @Sports | July 13, 2025

Photo: Preier Volleyball League

Bumanat ng huling hampas si Trisha Tubu para ibigay sa Farm Fresh Foxies ang unang panalo kontra Choco Mucho Flying Titans sa 4 sets sa 2025 PVL On Tour sa Ilagan, Isabela kagabi.  

Isang monster block ang pinatikim ni Tubu sa matchpoint ng ika-4 na set at kunin ang 25-23, 19-25, 25-23, 26-24 at unang pumagpag ng kalamyaan at bumura ng sandamakmak na errors.      

Nalampasan ng Farm Fresh Foxies ang 39 errors at sumandal sa lakas ng 22 puntos ni Tubu. Bumalikwas sa unang momentum na hawak ng Titans para isulong sa 13-9 lead at nagpatuloy sa pagkapit sa krusyal na laro at may sagot sa bawat rally ng Choco Mucho.  

Nabuhayan lamang si Des Cheng sa huling bahagi ng laro para palakasin pa ang Flying Titans nang umiskor ng apat na straight points bago nakaungos ang block ni Deanna Wong sa 23-22. 

Nagawa pa ni Rizza Cruz na ipatas ang laro, bago naiangat ni Caitlin Viray ang Foxies sa match point. Pero pumalag pa si Choco Mucho rookie Jen Villegas at puwersahang palawigin sa isa pang set ang game. Ang Foxies ngayon ay may kartadang 1-1 sa Pool A, habang ang Flying Titans ay lumagpak sa 1-3 para sa fifth place.

Magbabalik ang Farm Fresh sa aksiyon sa ngayong Linggo, laban sa Petro Gazz Angels para sa back-to-back schedule sa Ilagan City leg.