Mga manggagawa, binakunahan na

ni Ronalyn Seminiano Reonico | June 12, 2021

Sinimulan na ang pagbabakuna sa mga economic frontliners laban sa COVID-19 sa Valenzuela City ngayong Sabado.

Pahayag ni Valenzuela Mayor Rex Gatchalian, “Right now we're opening 'yung industry vaccination site namin kung saan ang mga may appointment doon, mga industriya na rito sa Valenzuela. Nag-appointment doon, hindi lang indibidwal kundi korporasyon, para sa manggagawa nila.”

Ayon kay Gatchalian sa isang teleradyo interview, tinatayang umabot na umano sa 25,000 economic frontliners ang nakapagpa-register na para mabakunahan laban sa COVID-19.

Aniya, may inilaang vaccination sites para sa mga industry workers upang hindi maapektuhan ang ongoing na vaccination program para sa priority sectors na kinabibilangan ng mga health workers, senior citizens at mga may comorbidities.

Saad pa ni Gatchalian, “Dito sa Valenzuela, ang mga factories namin, may mga 3,000 empleyado. Gusto naming nakahiwalay sila pero sabay-sabay na binabakunahan today.”

2 klinika, ipinasara sa ilegal na RT-PCR testing

ni Lolet Abania | January 31, 2021

Dalawang medical clinics ang ipinasara matapos na maiulat na nag-aalok ng RT-PCR test nang walang lisensiya bilang accredited COVID-19 testing facility sa Valenzuela City.

Sa inilabas na Executive Orders No. 015 and 016 Series of 2021 ni Mayor Rex Gatchalian, agad ipinasara dahil sa walang license to operate at sinuspinde ng lokal na pamahalaan ng Valenzuela ang business permit ng Bestcare Medical Clinic at Diagnostic Center, Inc. sa Barangay Karuhatan.

Naging batayan ng pamahalaang lungsod para sa pagsuspinde ng business permit ang paglabag sa iniisyung Mayor’s Permit, Waiver/Undertaking, Consumer Rights, at provision ng Local Government Code on General Welfare.

Lumabag din sa mga probisyon ng RA 11332 o ang Mandatory Reporting of Notifiable Diseases and Health Events of Public Health Concerns Act ang Bestcare Medical Clinic matapos na hindi makapaglabas at maiulat ang COVID-19 test results.

Ayon pa kay Gatchalian, effective immediately ang ibinabang closure order para sa dalawang klinika.

Patuloy namang pinapayuhan ng alkalde ang mga residente ng Valenzuela na maging maingat at mapanuri sa mga klinika o laboratoryo na nag-aalok ng kanilang serbisyo at mga COVID-19 testing facility para lamang makapanloko.

1 sa mga suspek sa pagpatay sa panadero, naaresto

ni Twincle Esquierdo | December 9, 2020

Naaresto ang isa sa mga suspek sa pananaksak sa 18-anyos na panadero sa Valenzuela City matapos ang mahigit isang linggo.

Sinita ang 38-anyos na lalaking hindi na binanggit ang pangalan dahil sa hindi pagsusuot ng face mask sa Sta. Cruz, Maynila.

Matapos kapkapan, nakuha sa kanya ang bladed weapon at napag-alaman sa imbestigasyon na pinaghahanap siya sa isang murder case.

Nangyari ang krimen noong Nobyembre 28 at kinilala ang biktima na si Vinz Toling na isang panadero.

Ayon sa inaresto, dalawang araw pa lang siya sa trabaho nang makainuman ang biktima kasama ang isa pa nilang katrabaho na hindi binanggit ang pangalan.

Nagkasagutan ang dalawa niyang katrabaho dahil sa hindi pagkakaunawaan, at dito na nag-umpisa ang gulo. Unang kumuha ng kutsilyo ang biktima ngunit naunahan siyang hampasin ng kanyang nakaalitan at du'n pinagsasaksak.

Umawat umano ang naaresto ngunit hindi niya nahawakan ang dalawang katrabaho.

Matapos ang krimen ay binigyan siya ng suspek ng P800 para makalayo kaya napilitan umano siyang magtago.

Ayon kay Police Lt. Col. John Guiagui, commander ng Sta. Cruz Police, kaduda-duda ang hindi pagre-report ng lalaki sa nangyaring krimen at maging ang pagtatago niya sa Tondo.

Pinasusuko na rin siya ng kapatid dahil nakatatanggap sila ng pagbabanta mula sa pamilya ng biktima.

Patuloy namang pinaghahanap ng mga awtoridad ang isa pang suspek sa pagpatay.