1 patay sa sunog sa factory sa Valenzuela

ni Ronalyn Seminiano Reonico | August 17, 2021

Isa ang patay sa sunog na sumiklab sa factory sa Valenzuela City ngayong Martes nang umaga.

Ayon sa Bureau of Fire Protection (BFP), nagsimula ang sunog sa Gilvan Packaging Corporation sa Barangay Paso de Blas alas-4:41 nang umaga.

Dahil sa mabilis na pagkalat ng apoy, kaagad itong umabot sa third alarm matapos ang anim na minuto.

Samantala, idineklara namang under control ang sunog bandang alas-5:44 nang umaga.

Sa ngayon ay iniimbestigahan pa ng awtoridad ang sanhi ng sunog at gayundin ang pagkakakilanlan ng biktima.

P4K ayuda, ibibigay na sa Valenzuela sa ECQ

ni Lolet Abania | August 5, 2021

Ipapamahagi na ng lokal na pamahalaan ng Valenzuela City ang nakalaang cash assistance sa mga benepisyaryo nito sa Sabado o Linggo sa gitna ng pagpapatupad ng enhanced community quarantine (ECQ) sa National Capital Region.

Sa Laging Handa public briefing, ayon kay Mayor Rex Gatchalian, inaasahan niyang matatanggap ang pondo ngayong Huwebes. “Pinakamaaga ay Saturday natin masisimulan. Pinaka-late na siguro ‘yung Sunday,” ani Gatchalian ngayong Huwebes sa briefing.

Ayon kay Gatchalian, naglaan na ang city government ng mga payout centers kung saan matatanggap ng mga nakaiskedyul na benepisyaryo ang kanilang mga ayuda sa mga naturang pasilidad kada oras.

Aniya pa, inihahanda na nila ang mga iskedyul at ang masterlist para sa distribusyon. Ang NCR ay isasailalim sa ECQ ng dalawang linggo mula Agosto 6 hanggang 20 upang maiwasan ang panganib ng mas nakahahawang Delta variant ng coronavirus. Bibigyan ang mga low-income residents ng Metro Manila na labis na maaapektuhan ng restriksiyon ng P1,000 hanggang P4,000 cash aid mula sa national government.

Kumpanyang nagpasuweldo ng tigsi-singkong barya, kakastiguhin

ni Lolet Abania | June 29, 2021

Isang manggagawa mula sa pabrika sa Valenzuela City ang humingi ng tulong sa mayor ng siyudad matapos na matanggap ang kanyang suweldo na puro mga baryang sentimos ang ibinigay.

Sa nai-post sa Facebook kahapon, ayon sa lokal na pamahalaan ng Valenzuela City, nakuha ng empleyado, na hindi na idinetalye pa ang pagkakilanlan, ang kanyang dalawang araw na suweldo na nagkakahalaga ng P1,056 na puro 5 at 10 centavo coins.

Agad namang nakipagpulong si Gatchalian sa nasabing worker at representative ng kumpanya na tinukoy ng pamahalaang lungsod bilang Next Green Factory.

Gayunman, ang may-ari ng kumpanya ay kasalukuyang out-of-town kaya itinakda na lamang sa ibang araw ang meeting dito.

“Mayor Rex reiterates that industry workers should be treated accordingly and not be demoralized,” pahayag ng pamahalaang lungsod.

Sa hiwalay na statement, ayon kay Gatchalian, nakatakda silang magharap ng may-ari ng kumpanya ngayong Miyerkules na aniya sa company representative, “Won’t cut it for me. I’ll see to it that we get to the bottom of this ‘cruel and unusual’ labor practice and deal with it accordingly,” post ni Gatchalian sa Facebook.

Samantala, ayon sa isang circular na inisyu ng Bangko Sentral ng Pilipinas noong 2006, ang mga barya na may denominasyon na P1 hanggang P5 ay maaaring tanggapin bilang bayad sa halagang hindi hihigit sa P1,000.

Nakasaad din sa circular na ang mga 1 centavo, 5 centavos, 10 centavos at 25 centavos ay maaaring gamitin bilang bayad sa halagang hindi hihigit sa P100.