Naaaninag na ng Gilas Pilipinas at Women's Gilas ang SEAG gold

ni MC / VA - @Sports | May 22, 2022

Malapit na malapit nang makuha ng Philippine national men's basketball team ang gold medal at manatiling hari sa Southeast Asian basketball.

Dinomina kahapon ng Gilas Pilipinas ang Malaysia, 87-44 upang maitala ang ika-4 na diretsong panalo sa 31st SEAG sa Hanoi. Vietnam. Nilimitahan nila ang Malaysia sa 12 puntos lamang sa lahat ng quarters, habang ang Pinas ay umiskor ng higit sa 29 puntos sa 3rd quarter para makuha ang panalo.

Nangunguna ang Gilas sa pagtatapos ng unang 20 minutong aksiyon, 39-22. Namuno si Thirdy Ravena sa national team sa bisa ng 17 puntos, 7 rebounds, 5 assists at 2 steals. Makakalaban ng Pilipinas ang Rajiko Toroman coaches na Indonesia ngayong Linggo para isara na ang kanilang kampanya sa biennial meet.

Isang dipa na lang din ang layo ng Philippine national women's basketball team sa basketball gold medal nang pahiyain ang Singapore, 88-61 kahapon sa 31st SEAG.

Umaalagwa halos sa 31 puntos na kalamangan ang Gilas Pilipinas Women, 68-37, bago pa man matapos ang ikatlong peryodo. Pinipilit pa ng Singapore na makahabol pagdating ng 4th quarter pero masyado nang malayo ang agwat ng Pilipinas para pumalaot na sa panalo na unang tiniris ang Indonesia, Thailand at Vietnam.

Malaking iskor ang naitarak ni Clare Castro kontra Singapore sa 15 puntos at 4 rebounds, 2 blocks habang si Janine Pontejos at Khate Castillo ay may tig-14 puntos. Makasasagupa ng women's team ngayong Linggo ang Malaysia para madetermina na ang placings ng medalya.

Samantala sa tennis, ikatlong bronze medal ang naitala ni Alex Eala nang payukuin ng Thailand sa women’s singles semis. Napasuko siya ni no. 4 seed Luksika Kumkhum, 28. Unang naka-2 bronze si Eala sa women’s team event at mixed doubles kay Treat Huey. Ang parehong semis ay natalo sa Thailand.

Nakano ng judo, gold sa SEAG; Boxer Bautista, entra sa Final

ni MC / VA / GA - @Sports | May 21 , 2022

Ikalawang gold medal ang nasungkit ni Fil-Jap judoka Shugen Nakano sa Judo nang talunin ang Vietnam sa Men’s -66kg Finals kahapon habang silver medal naman si Khrizzie Pabulayan sa women's -52 kg.

Tumiyak na rin ang Pinas ng gold-silver finish sa men’s at women’s 10-ball events sa billiards. Parehong pasok sa final sina Rubilen Amit at Chezka Centeno para sa all-Filipino title clash. Nasundan ng all-Pinoy match-up nina Johann Chua at Carlo Biado sa men’s event sa men's semifinals kahapon.

Nagmartsa naman sa gold medal round si Ian Clark Bautista men's featherweight semifinals ng boxing habang bronze medal si Olympian Jasmine Alkhaldi sa women's 100m butterfly event.

Nagkasya sa bronze medal para sa ika-2 pagkakataon ang beach volleyball men at women's sa SEAG. Naduplika nila ang tansong medalya noong 2019 edition nang talunin ang Vietnam sa Hanoi, kahapon.

Ikalawang bronze medal ang nakuha ni Woman GM Janelle Mae Frayna sa chess. Natalo si Frayna sa Vietnam ng women's individual blitz.

Fifth place naman ang PHL men’s national volleyball team nang talunin ang Myanmar 26-24, 22-25, 25-22, 27-29, 16-14. Naka-silver ang Pinoy noong 2019.

Naitakas naman ng duo ng junior grand slam titleholder nina Alex Eala at Treat Huey ang bronze medal sa mixed doubles event sa SEAG Hanoi, Vietnam. Kinapos ang pares sa Thailander na sina Patcharin Cheapchandej at Pruchya Isaro noong Huwebes sa semis. Una ring naka-bronze si Eala sa women's singles event.

SEAG: Women Sibol, naka-gold Hallasgo, silver sa marathon

ni MC / VA - @Sports | May 20, 2022

Naiuwi ng GrindSky Eris ang unang gintong medalya para sa national esports team Sibol sa pagpapatuloy ng 31st Southeast Asian Games sa Hanoi, Vietnam nang idiskaril ang Singapore, 3-0 sa grand finals Miyerkules ng gabi.

Binubuo nina Charize “Yugen” Doble, Gianna “Jeeya” Llanes, Christine “Ray Ray” Natividad, Rose Ann “Hell Girl” Robles, at Angel Danica “Angelailaila” Lozada ang Sibol first women medalists sa SEA Games, mula nang maibilang ang esports sa biennial meet noong 2019.

Bagamat naipuwersa ng Singapore ang Game 4, bumanat si Doble ng quadra kill upang burahin ang gold leap ng kasagupa at matulungan ang team na umangat sa kontensiyon.

Nakuha pa ng Singapore ang Baron Nashor para umariba sa game, pero hindi iyong naging sapat, dahil lumaban pa ang Sibol sa sumunod na ika-22 minuto bago tuluyang nawasak ng Pinay squad ang Nexus ng Singapore at masiguro ang SEA Games gold medal.

Napunta sa Singapore ang silver medal habang ang Thailand ang naka-bronze, matapos tapusin ang hosts Thailand sa bronze medal match.

Samantala, naibulsa naman ni Christine Hallasgo mula sa kampanya ng Philippine athletics team ang silver medal sa My Dihn National Stadium sa marathon.

Malakas sana ang takbo niya sa huling 600 metro, pero bumagal si Hallasgo dahil pinulikat siya pero sinikap pa rin na makatuntong sa runner-up finish sa event bagamat hindi niya naidepensa ang korona noong 2019 SEAG PHL edition.

Tumapos si Hallasgo sa oras na 2:56.07 sa likod ng golden girl na si Odekta Naibaho Elvina (2:55.280). Tersera si Ngoc Hoa Hoang Thi ng Vietnam sa 2:57.350.

Ikapito ang silver ni Hallasgo para sa Team PH sa biennial meet, na may five gold at 14 bronze medals. Nabigo ang team na ipatas o lampasan ang 11 gold, 8 silver at 8 bronze medals ng 2019 SEAG athletics na idinaos sa New Clark City Athletics Stadium sa Tarlac, pero tagumpay pa rin ayon kay Philippine Athletics Track and Field Association head coach Joeffrey Chua ang mga tracksters.