Lady Archers, pinalaso ang 108- game winning streak ng Bulldogs

ni GA /VA - @Sports | November 25, 2022

Nagwakas na ang pinakamahabang record winning streak sa kasaysayan ng University Athletic Association of the Philippines.

Naputol ang 108-game winning streak ng National University Lady Bulldogs nang gapiin sila ng De La Salle University,61-57 sa overtime sa pagpapatuloy ng second round ng UAAP Season 85 Women's Basketball Tournament sa UST Quadricentennial Pavilion sa Manila.

Ang kabiguan ang una rin ng NU ngayong season matapos ipanalo ang unang 12 nilang laban. Huli silang natalo noong Oktubre 5,2013 sa kamay din ng De La Salle Lady Archers ,69-61 sa Game 3 ng Seàson 76 finals.

Nang sumunod na taon, 2014 nagsimula ang kanilang record winning run hanggang magkamit sila ng anim na titulo. Nanguna sa nasabing panalo ng Lady Archers si Fina Tchuido na nagposte ng 14 puntos, 19 rebounds at 2 steals.

Ang panalo ang ikapitong sunod na panalo para sa La Salle na nag-angat sa kanila sa markang 11-2 at nagpalakas ng tsansang magkamit ng twice-to- beat-incentive sa semifinals. Dahil sa kabiguan ng NU, tiyak na ang pagkakaroon ng Final 4 round na huling nairaos noong Season 76.

Samantala, mas pinalawig pa ng DLSU Green Archers ang winning streak nito sa tatlo kasunod ng mainit na laro ni Penny Estacio para talunin ang Final 4-bound na NU Bulldogs, habang nakabawi ang defending champion UP Fighting Maroons nang kawawain ang kulelat na Santo Tomas Growling Tigers, 78-60, sa magkasunod na laro ng quadruple-header ng UAAP men’s basketball tournament sa MOA Arena sa Pasay City noong Miyerkules ng hapon.

Mas lalo pang pinag-igihan ng DLSU ang kanilang laro upang umangat sa 6-6 kartada para sa solo 4th place, habang bumagsak naman sa 9-4 marka ang NU Bulldogs na naputol ang apat na sunod na panalo.

Loman at Belingon, todo handa Vs. Bibiano at Jae

ni VA / MC - @Sports | November 17, 2022

Triple ang paghahanda nina fifth-ranked bantamweight contender Stephen Loman at dating bantam champion Kevin Belingon para sa kani-kanilang mga kalaban.

Sasagupain ni Loman si Bibiano “The Flash” Fernandes, habang sasalubungin ni Belingon si “The Fighting God” Kim Jae Woong sa bantamweight division sa dalawang kapana-panabik na salpukan sa ONE Fight Night 4: Abbasov vs. Lee sa Sabado ng umaga sa Singapore Indoor Stadium.

Dahil ilang beses na nakalaban ni Belingon si Fernandes, kaya ginagabayan nito ang kanyang nakababatang kasamahan sa pinakamalaking laban sa kanyang karera. “For sure I’ve shared a lot of things with Stephen, things that I’ve experienced with Bibiano. I’ve given him some tips entering this match,” ani Belingon, na apat na beses na lumaban kay Fernandes.

“I think he has really prepared well and he’s at an advantage against Bibiano. Naging smooth ang training niya, solid ang preparation niya, so I expect great things.”

Nang tanungin kung ano ang natutunan niya sa kanyang teammate, pabiro ang sagot ni Loman. “Sinabi niya sa akin na kaya kong talunin si Bibiano dahil matanda na siya,” natatawang sabi niya.

Samantala, muling magiging host ang Pilipinas sa isa sa mga preliminary event ng Volleyball Nations League men’s tournament sa 2023.

Inihayag ng liga noong Biyernes na ang Pasay City ang magiging venue para sa ilan sa mga laro sa Hulyo 4-9. Makakalaban ng Pilipinas sa Philippine leg ng torneo ang Japan, China, Slovenia, Brazil, Poland, Italy, Netherlands, at Canada. Noong nakaraang Hunyo ang Araneta Coliseum sa Quezon City ay nag-host ng mga laro para sa parehong men’s at women’s tournament sa Philippine leg ng VNL.

Bukod sa Pasay City, ang iba pang host city para sa men’s tournament ay ang Ottawa, Canada; Nagoya, Japan; Rotterdam, Netherlands; Orleans, France; at Anaheim sa California, USA.

Novino at Napoles, bida sa judo ng Martial Arts Fest

ni VA / MC - @Sports | November 16, 2022

Bumida sina Sophia Nicole Novino at Rhian Napoles sa kani-kanilang weight categories sa judo ng 8th Philippine Sports Commission Women’s Martial Arts Festival na idinaraos sa Philippine Judo Federation training gym sa loob ng Rizal Memorial Sports Complex sa Maynila.

Nanguna si Novino, ang sophomore ng National Academy of Sports sa women’s -44kg division matapos umiskor ng ippon win (1-0) kontra Mikeighla Louise de Vera ng Baguio Judo Club habang si Gabrielle Lorine Dizon at Princess Maurine Villafranca ang naka-bronze medals.

Ang 6-day event ay bahagi ng unang preparasyon ng bansa para sa 6th Asian Indoor Martial Arts Games sa Bangkok, Thailand sa 2023, eksaktong 365 na araw matapos ang closing ceremony ng WMA Festival sa Huwebes.

Ang iba pang gold medalists sa judo ay sina Analyn Dino (-52kg), Samara Nina Vidor (-57kg), Maegan Motilla (-63kg), Raphaela Estrada (-70kg) at Francesca Michaela Roces (+70kg).

Sa Rizal Memorial Coliseum, nagpakitang husay din sina national wrestlers Jiah Pingot at Grace Loberanes. Tinalo ni Pingot si Lady May Carabuena ng Mandaluyong City para sa gold medal sa freestyle -53kg senior habang ginapi ni Loberanes si Kimberly Jhoy Bondad sa traditional wrestling 57kg.

Nakaginto rin sina Cathlyn Vergara (classic 52kg), Mary Jhol Cacal (58kg), Jean Mae Lobo (63kg), junior grapplers Melissa Tumasis (52kg), Nicole Pinlac (58kg), Rhea Cervantes (63kg), Amber Arcilla (57kg at Nashica Tumasis (freestyle 53kg).

Habang isinusulat ito ay idinaraos ang kompetisyon sa arnis habang ang sambo, taekwondo at muay ay magsisimula sa Miyerkules.