Gilas Youth, pasok na sa FIBA U-17 World Cup 2024

ni VA @Sports | September 24, 2023

Nagpatuloy sa kanilang pamamayagpag ang Gilas Pilipinas Boys’ Under-16 team sa ginaganap na 2023 FIBA U16 Asian Championship matapos iposte ang come-from-behind 64-59 na panalo kontra Japan sa quarterfinals kahapon ng umaga-Sabado, Setyembre 23 (Manila time) sa Doha, Qatar.

Dahil sa panalo, pasok na ang mga kabataang Pinoy sa FIBA U17 World Cup na gaganapin sa Turkey sa 2024 sa bisa ng kanilang top four finish sa torneo Kasama ang China, New Zealand, at Australia na siyang makakatunggali nila sa semifinals.

Pagkaraang malimitahan sa kanyang tournament-low na 11 puntos noong Biyernes kung saan tinalo nila ang Korea, muling nanguna ang second-generation player na si Kieffer Alas para sa Gilas Boys nang magposte ito ng bagong tournament-best na 29 puntos bukod pa sa 9 na rebounds at 3 assists.

Naiiwan ng 10 puntos matapos ang first half, 25-35, nag-init si Alas, bunsong kapatid ng PBA star na si Kevin Alas sa third canto kung nagsalansan ito ng 14 puntos para maagaw ang pangingibabaw sa Japan, 46-45 papasok ng final period.

Nagtala si Alas ng 4-of-5 clip sa field at solong maungusan ang koponan ng Japan sa busluan,14-10.

Naging dikdikan ang laban ng dalawang koponan sa 4th quarter at nakalalamang pa Japan, bago nag- takeover ang big man na si Bonn Daja na nag-deliver ng back-to-back baskets sa endgame para sa itala ang final score na 64-59.

Si Joaquin Ludovice na umiskor ng 25 puntos kontra Korea ay tumapos na may 11 puntos kasunod si Kurt Velasquez na may 10 puntos at si Daja na may 6 na puntos.

Nakatakdang sagupain ng Gilas Boys ang Australia ngayong alas-12:30 ng madaling araw-Setyembre 24,-Linggo (Manila time).

Obiena, naka-silver ulit sa Diamond League Final

ni VA @Sports | September 19, 2023

Tumapos na pangalawa ang Filipino pole vaulter na si EJ Obiena pagkaraang matalon ang baras na itinaas sa 5.82 meters kahapon (Lunes-Manila time)sa Eugene Diamond League Final sa Hayward Field sa Eugene, Oregon.

Nakadalawang attempts ang 27-anyos na si Obiena, bago nagawang matalon ang nasabing height. Naiuwi ni Obiena ang premyong $12,000 o katumbas na P682,440.

Nagkampeon naman sa nasabing torneo ang reigning World at Olympics champion na si Armand Duplantis ng Sweden na nagawa pang burahin ang sarili niyang world record makaraang magtala ng lagpasan sa 6.23 meters.

Pumangatlo naman sa kanila ang hometown bet na si Sam Kendricks matapos ungusan sina Kurtis Marschall ng Australia at ang teammate nyang si Chris Nilsen sa pamamagitan ng countback makaraang pare-parehas silang nakatalon ng 5.72 meters. Susunod na pagtuunan ng pansin ni Obiena ang nalalapit na 19th Asian Games sa Hangzhou, China, na magsisimula sa Setyembre 29.

Walang break ang Gilas para maka-adjust sa sistema ni Cone

ni VA @Sports | September 18, 2023

Maliban sa kanilang naging pamamahinga noong nakaraang Biyernes, tuluy-tuloy na ang ginagawang pagsasanay ng Asian Games bound-Gilas Pilipinas Mula ng dumating sila sa Inspire Sports Academy sa Calamba,Laguna noong Sabado.

Mula noong Lunes-Setyembre 11, walang break sa ensayo ang Gilas upang ganap na matutunan at makapag-adjust sa sistema ng kanilang head coach na si Tim Cone.

"We're gonna be foundational and get to whatever level we can get to by doing it the right way," pahayag ni Cone.

Ibinalita rin ni Cone na bukod sa tuneup match na nakatakda kontra Korean club LG Sakers sa darating sa Biyernes sa Philsports Arena, kakalabanin din ng Gilas ang koponan ng Meralco Bolts sa Martes-Setyembre 19 sa isang scrimmage game sa Inspire Academy.

Dahil sa limitadong oras sa kanilang preparasyon dalawang tune-up games lang ang sasabakan ng Gilas bago sumalang sa Asin Games. Gayunman, naniniwala si Cone na sapat na ito bago sila umalis patungong Hangzhou, China sa susunod na Sabado Setyembre 23.

Magsisimula ang basketball competition sa Asiad sa Setyembre 26 kung saan makakatapat ng GIlas ang koponan ng Bahrain na pinangungunahan ng dating PBA import na si Wayne Chism ganap na ala- 1:30 ng hapon

Si Chism na dating naging import ng Rain or Shine ay nagwaging 2015 Commissioner's Cup Best Import. "We really don't have pretty much time to play a lot of friendly games. To me the practices are more important than the friendlies because we learn more in practices," wika ni Cone.

Bukod sa Bahrain, kasama at makakatunggali ng Gilas sa group stage ang mga bansang Bahrain, Jordan at Thailand.