Hindi pa umano siya target... Trump, pinalalakas ang kampanya kontra-ICC

ni Justine Berganio @World News | August 2, 2026

Photo: File

Nagbiro si US President Donald Trump na hindi pa siya target ng International Criminal Court (ICC), ngunit sinabi niyang posible itong mangyari sa hinaharap habang pinalalakas ng kanyang administrasyon ang kampanya laban sa international tribunal.

Sa isinagawang cabinet meeting sa Camp David nitong Biyernes, sinabi ni Trump na wala siyang impormasyon na hinahabol siya ng ICC, ngunit pabirong inamin na hindi niya isinasantabi ang posibilidad. Natawa naman ang mga miyembro ng kanyang gabinete sa naging pahayag.

Inihayag ito ni Trump habang nagsasalita si US Secretary of State Marco Rubio, na muling iginiit ang matinding pagtutol ng Estados Unidos sa ICC. Ayon kay Trump, hindi ang kanyang sarili ang ipinagtatanggol ng Amerika kundi si Israeli Prime Minister Benjamin Netanyahu at iba pang lider na nahaharap sa imbestigasyon ng korte.

Noong Nobyembre 2024, naglabas ang ICC ng arrest warrant laban kay Netanyahu kaugnay ng digmaan sa Gaza at mga alegasyon ng war crimes. Hindi kabilang ang Estados Unidos at Israel sa mga bansang lumagda sa Rome Statute, ang kasunduang lumikha sa ICC.

Samantala, sinabi ni Rubio na nagpapatuloy ang kampanya ng Trump administration upang hikayatin ang iba’t ibang bansa na kumalas sa ICC. Ayon sa kanya, limang bansa na ang nagpahayag ng planong umalis sa tribunal, kabilang ang Chad at Venezuela.

Iginiit din ni Rubio na itinuturing ng Estados Unidos ang ICC bilang isang “illegitimate international organization,” dahilan upang ipagpatuloy ng administrasyon ang panawagang i-boycott ang nasabing korte.

Proposal ng Iran, ibinasura ni Trump

ni Jenny Rose Albason @World News | May 13, 2026

Nagpadala ang Iran ng panukala sa Estados Unidos sa pamamagitan ng tagapamagitan na Pakistan, na layong wakasan ang umiinit na tensyon at mga kaguluhan sa iba’t ibang bahagi ng Middle East.

Sa nasabing proposal, iginiit ng Iran ang pagtanggal ng sanctions ng US Office of Foreign Assets Control (OFAC) sa pagbebenta ng Iranian oil sa loob ng 30 araw, gayundin ang pagwawakas ng naval blockade ng Amerika sa kanilang mga daungan.

Ayon sa mga ulat, kasama rin sa hiling ng Iran ang pagbigay ng kontrol sa Strait of Hormuz, sakaling matupad ng Estados Unidos ang ilang hindi ispesipikong kondisyon.

Gayunman, mariing tinanggihan ni US President Donald Trump ang naturang counter proposal sa pamamagitan ng kanyang Truth Social platform, at tinawag itong “totally unacceptable.”

Nagbabala rin ang Iran na hindi ito magpapaatras sa anumang posibleng ganting aksyon mula sa Estados Unidos, at tutol din ito sa pagpasok ng mas maraming foreign warships sa Strait of Hormuz.

Sa hiwalay na pahayag, binigyang-diin ni Iranian President Masoud Pezeshkian na hindi sila magpapasupil sa anumang kalaban, at ang pakikipag-usap o negosasyon ay hindi dapat ituring na pagsuko o pag-atras.

After ng pamamaril sa White House... Trump, tiwala pa rin sa Secret Service

ni Jenny Rose Albason @Overseas News | April 29, 2026

Buo pa rin ang tiwala ng White House sa United States Secret Service sa pagbabantay sa seguridad ni US President Donald Trump, kasunod ng insidente ng pamamaril sa isang hotel sa Washington, DC noong Sabado (Linggo sa Pilipinas).

Ayon sa isang opisyal ng White House, naniniwala ang Pangulo na naging mahusay ang pagtugon ng mga ahente ng Secret Service matapos nilang mapigilan ang suspek.

Kasabay nito, magsasagawa ng masusing pagrepaso sa mga security protocol upang maiwasan ang kahalintulad na insidente sa hinaharap.

Matatandaang naganap ang pamamaril malapit sa security checkpoint sa lobby ng hotel, kung saan idinaos ang isang event kaugnay ng White House Correspondents’

Dinner.

Kinilala ng mga otoridad ang suspek na si Cole Tomas Allen, 31-anyos mula California, na agad na inaresto matapos umanong magpaputok ng baril sa lugar.

Nakatakda siyang humarap sa korte kaugnay ng patong-patong na kasong isasampa laban sa kanya.

Napag-alaman na inilalarawan ni Allen ang kanyang sarili bilang isang “game developer and teacher,” ngunit patuloy pang inaalam ng mga imbestigador ang kanyang motibo at iba pang detalye.

Samantala, sinabi ni Federal Bureau of Investigation (FBI) Director Kash Patel na handa ang FBI na tumulong sa posibleng muling pagdaraos ng White House Correspondents’ Dinner sa loob ng susunod na 30 araw, bagama’t wala pang pinal na anunsyo.

Iminungkahi rin ni Trump na maaaring ituloy ang event sa lalong madaling panahon, ngunit nilinaw ng mga opisyal na wala pang opisyal na iskedyul at isinasailalim pa ito sa masusing pag-aaral dahil sa mga usaping pangseguridad.

Sa isang panayam matapos ang insidente, sinabi ni Trump na hindi siya nabahala sa nangyari.