15% ng suweldo, ibibigay... Prime Minister ng UK, bibigyan ng bahay ang mga homeless

ni Justine Berganio @Overseas News | August 21, 2026

Photo: AP Photo / Jon Super

Target ng bagong British Prime Minister na si Andy Burnham na mailipat sa ligtas na tirahan ang mga taong natutulog sa lansangan bago sumapit ang Pasko, kasabay ng pangakong maglalaan siya ng bahagi ng sariling suweldo para sa mga programang laban sa homelessness.

Sa ilalim ng bagong plano ng pamahalaan, maglalaan ng emergency accommodation at pangmatagalang housing support sa mga lugar sa England na pinakamalubha ang problema sa kawalan ng tirahan.

Aabot sa £442 milyon (P37B) ang pondong ilalaan para sa programa, kung saan mas malaking bahagi ang matatanggap ng mga lugar na may mataas na bilang ng homeless at matinding housing pressure.

Bukod sa pondo ng gobyerno, nangako si Burnham na 15% ng kanyang suweldo ay ido-donate sa mga organisasyong tumutulong sa mga taong walang tahanan.

Sinabi ni Burnham na ayaw niyang maging normal na tanawin sa Britain ang mga taong natutulog sa bangketa, labas ng istasyon at iba pang pampublikong lugar. Iginiit din niyang kailangang manguna siya sa pagtulong kung nais niyang hikayatin ang publiko na makiisa.

Batay sa government figures, umabot sa record na 4,793 ang bilang ng rough sleepers sa England noong 2025. Mas malaki naman ang kabuuang bilang ng homeless, na tinatayang 382,000, kabilang ang mga pamilya at batang walang permanenteng tahanan.

Nagbabala naman ang Institute for Public Policy Research na maaaring tumaas pa ng 25% pagsapit ng 2030 ang bilang ng mga homeless kung hindi maaaksyunan ang problema.

Ayon kay Burnham, nais niyang gayahin ang naging hakbang noong COVID-19 pandemic nang nailipat sa temporary accommodation ang maraming rough sleepers. Nanawagan din siya sa mga lokal na lider, faith organizations at iba pang sektor na makiisa sa programa.

Bukod sa pansamantalang tirahan, target ng pamahalaan na makatulong sa pagtatayo ng mahigit 1,000 permanenteng bahay sa loob ng tatlong taon.

Bagama’t tinanggap nang positibo ng ilang charity groups ang plano, kinuwestiyon naman ito ng opposition Conservatives dahil umano sa kakulangan ng malinaw na detalye kung paano ito ipatutupad at popondohan.

King Charles III, kinoronahan na

ni BRT | May 7, 2023

Kinoronahan na bilang bagong hari ng United Kingdom si King Charles III sa Westminster Abbey sa London, kahapon, Mayo 6.

Sa Westminster Abbey kinoronahan ang bawat British monarch ng Britain sa loob ng mahigit 900 taon.

Samantala, isinama ang relics mula sa orihinal na cross kung saan ipinako si Hesus sa bagong gawa na “Cross of Wales” na nasa unahan ng prosesyon sa koronasyon.

Samantala, sa pagsisimula ng bagong monarkiya, ipinakita na sa publiko ang mga bagong banknote at barya ng United Kingdom na may mukha ni King Charles III.

Magsisimula ang sirkulasyon ng mga naturang banknote at barya sa 2024, ngunit nilinaw ng Bank of England na maaari pa ring magamit ang mga salaping may larawan ng yumaong si Queen Elizabeth II.

UK nakapagtala ng 2 kaso ng COVID-19 Omicron variant

ni Jasmin Joy Evangelista | November 28, 2021

Nakapagtala ng dalawang kaso ng Coronavirus disease 2019 (COVID-19) Omicron variant ang United Kingdom (UK).

Ang dalawang kaso ay iniuugnay sa mga bumiyahe sa Southern Africa.

Sa pahayag ng UK government, matapos ang genome sequencing ay nakumpirma ng UK Health Security Agency ang COVID-19 na mayroong mutation na B.1.1.529.

“Thanks to our world-class genomic sequencing, we have been made aware of two U.K. cases of the Omicron variant,” pahayag ni Sajid Javid, Health Secretary ng Britain.

“We have moved rapidly, and the individuals are self-isolating while contact tracing is ongoing,” dagdag niya.

Dahil dito ay muling ipinag-utos ni Prime Minister Boris Johnson na gawing mandatory ang pagsusuot ng face mask sa mga pamilihan at public transportation.

“As always, I must stress this, with a new variant there are many things we just cannot know at this early stage,” ani Johnson.

“It does appear that Omicron spreads very rapidly and can be spread between people who are double vaccinated,” he added. Although the science around Omicron is still new, it is a “very extensive mutation” dagdag pa niya.