Pinoy driver, wagi ng P13 M sa raffle sa Abu Dhabi

ni Lolet Abania | June 10, 2021

Isang Pilipinong delivery van driver sa isang bakeshop sa Abu Dhabi ang nagwagi ng AED1 million o tinatayang P13 milyon sa isang raffle draw.

Ayon sa lalaki, ang perang kanyang makukuha ay gagamitin niyang pambayad sa kanyang utang para makauwi na siya sa bansa at panggastos din sa pinapangarap na kasal.

“Masayang-masaya. Hindi po ako nakatulog. Tumaas pa ang blood pressure ko,” sabi ni ‘Roland’, hindi tunay na pangalan sa isang interview online.

Ayon kay Roland na tubong Pangasinan, ang kanyang live-in partner nang tatlong taon ay nagulat sa ibinalita niya.

“Number combination niya kasi ‘yun,” ani Roland, tungkol sa winning combination ng mga numero.

Kuwento ng 38-anyos na si Roland na 10 taon nang nagtatrabaho sa United Arab Emirates (UAE), una sa kanyang listahan na maisaayos ang transfer ng land title ng pamilya mula sa kanyang grandparents at mapunta sa kanyang ina.

Prayoridad din ni Roland ang maisagawa na ang dream wedding nila ng kanyang partner.

Gusto rin niyang magsimula ng pagnenegosyo gaya ng condo unit, subalit mas nais niyang pasukin ang farming at fishery.

“Mabilis maubos ang pera. Nagtitingin-tingin ako ng mabi-business kung sakaling mag-for good na,” ani Roland na balak nang umuwi at manatili sa 'Pinas.

Sinabi rin ni Roland na marami na rin siyang naipon para sa dalawang anak (isang 16-anyos at 10-anyos) sa kanyang partner.

Plano na ring mabayaran ni Roland ang lahat ng kanyang utang at makauwi na sa bansa.

“Ang dami kong mga utang sa mga kaibigan at kamag-anak sa Pilipinas. Kaya hindi ako makauwi kasi hindi makabayad. Ngayon, uumpisahan ko na silang bayaran,” sabi ni Roland.

Pangalawang OFW si Roland na nanalo sa raffle draw ng Mahzooz, ang nag-iisang weekly live draw sa naturang region na nag-aalok sa mga players ng magandang oportunidad.

Nitong May, isang 31-anyos na single mom na nagtatrabaho bilang office manager sa isang HR Consultancy ang nagwagi ng AED201,000 o katumbas na P2.63 milyon.

Sinabi ni Wendy Arroz na tubong-Cagayan Valley, gagamitin niya ang pera para bayaran ang isang housing loan na kanyang kinuha dalawang taon na ang nakararaan para sa kanyang anak na babae.

Ayon sa Mahzooz, kasama rin ni Roland na nanalo ang isang Emirati na may limang numero mula sa anim ang tumama at nagwagi ng AED1,000,000.

Ang dalawang ito ay nag-share sa AED2,000,000 para sa second prize, kung saan doubled batay ito sa Rules of Mahzooz, matapos na walang nakakuha nito sa nakaraang 26th draw.

Biyahero sa 7 bansa, bawal pa rin sa ‘Pinas – Roque

ni Lolet Abania | June 1, 2021

Inaprubahan ni Pangulong Rodrigo Duterte ang pagpapalawig ng restriksiyon na kasalukuyang ipinatutupad sa inbound travelers na mula sa India, Pakistan, Sri Lanka, Bangladesh, Nepal, Oman at United Arab Emirates.

Ayon kay Presidential Spokesman Harry Roque, extended ang travel ban mula June 1 hanggang June 15, 2021.

Matatandaang noong huling mga linggo ng Abril ipinatupad ang travel ban sa lahat ng mga travelers na mula sa India kasabay ng pagtaas ng mga kaso ng COVID-19 sa mga bansa sa South Asia.

Ang COVID-19 variant na unang na-detect sa India ay isa sa mga variants of concern na mino-monitor ng ating bansa. Nitong unang linggo ng Mayo, pinalawig ng Pilipinas ang pagba-banned sa mga travelers kasabay ng pagtaas ng bilang ng COVID-19 cases, kung saan ipinagbawal na rin ang mga manggagaling sa Pakistan, Bangladesh, Nepal at Sri Lanka.

Noong May 16, kabilang na rin ang mga travelers mula Oman at United Arab Emirates na ipinagbabawal dahil sa panganib ng Indian variant ng COVID-19.

Galing Oman at UAE, bawal na sa ‘Pinas

ni Mary Gutierrez Almirañez | May 16, 2021

Bawal na ring pumasok sa ‘Pinas ang lahat ng mga biyahero galing Oman at United Arab Emirates (UAE) hanggang sa ika-31 ng Mayo, bilang pag-iingat sa banta ng Indian variant ng COVID-19, ayon kay Overseas Workers Welfare Administration Administrator Hans Leo Cacdac ngayong araw, May 16.

Aniya, "The travel ban for inbound Filipinos from UAE and Oman is effective on May 15. The latest cases of Indian variant came from these areas. Mostly from the Middle East."

Matatandaan namang inanunsiyo na rin kamakailan ni Spokesperson Harry Roque ang pag-i-implement ng travel ban, alinsunod sa naging rekomendasyon ng Department of Health (DOH) at Department of Foreign Affairs (DFA).

"All travelers coming from Oman and the United Arab Emirates (UAE) or those with travel history to these two countries within the last fourteen (14) days preceding arrival shall be prohibited from entering the Philippines beginning 0001H of May 15, 2021 until 2359H of May 31, 2021," sabi pa ni Roque.

Samantala, extended din hanggang May 31, 11:59 nang gabi ang travel ban sa mga biyahero mula India, Pakistan, Nepal, Bangladesh at Sri Lanka.

Sa ngayon ay 12 na ang nagpositibo sa Indian variant ng COVID-19 sa ‘Pinas. Karamihan sa kanila ay overseas Filipino workers (OFW) galing Middle East.

Ang nasabing B.1.617.2 variant ng COVID-19 ay orihinal na na-develop sa India at laganap na rin sa iba’t ibang bansa. Ito ay kinatatakutan ng buong mundo dahil mas mabilis itong makahawa kumpara sa ibang variant.