Kolorum at pasaway sa health protocols, huli sa checkpoint

ni Mary Gutierrez Almirañez | March 16, 2021

Dalawampu’t tatlo ang checkpoints na inilatag ng Quezon City Police District sa iba't ibang lugar ng lungsod simula kahapon, Marso 15, para manita ng mga motorista na lumalabag sa health protocol at upang masiguro na hindi kolorum o ilegal ang ilang sasakyan.

Ayon sa ulat, kabilang sa nilatagan ng checkpoint ang San Mateo-Batasan Road kung saan hindi na kukunin ang body temperature ngunit patuloy pa ring tinitingnan sa bawat pampublikong sasakyan kung nakakasunod sa minimum health standard ang mga pasahero katulad ng pagsusuot ng face mask, face shield at social distancing.

Kaugnay nito, nagsagawa rin ng special operations ang Inter-Agency Council for Traffic (I-ACT) sa Taft Avenue sa tabi ng Manila City Hall, kung saan 5 vans ang hinuli sapagkat walang maipakitang mga papeles ang drayber at ang iba nama’y expired na ang permit bilang UV Express.

May ilan ding nahuli dahil magnetic sticker lang ang idinikit sa sasakyan sa halip na pintura kaya puwede umanong gamitin 'yun bilang private car.

Ang mga nahuling sasakyan ay ii-impound sa Pampanga kung saan kailangang magbayad ng P200,000 para makuha ng may-ari. Maliban sa kolorum vans ay mahigit 50 pampublikong jeep at motorsiklo rin ang natikitan dahil sa iba't ibang violations.

Mga nahuli sa curfew, pinauwi rin

ni Mary Gutierrez Almirañez | March 16, 2021

Nagsimula na ang unang gabi ng unified curfew sa Metro Manila nitong Lunes, Marso 15, ganap na alas-10 nang gabi hanggang alas-5 nang madaling-araw kung saan mahigit 2,192 kapulisan ang ipinakalat upang mapigilan ang mabilis na hawahan ng COVID-19.

Ayon sa Southern Police District (SPD), karamihan sa mga pulis ay nakadestino sa bawat presinto na magsasagawa ng foot patrol, habang pangalawang prayoridad naman nila ang pagbabantay sa mga pangunahing kalsada katulad ng Baclaran sa Parañaque at Pasay, Bonifacio Global City sa Taguig, at Ayala sa Makati kung saan madalas maraming tao tuwing gabi.

Batay sa ulat, umabot sa 150 katao ang nahuling lumabag sa Makati kabilang ang mga tricycle driver, masahista at ilang naghahanapbuhay na pauwi pa lamang sa kanilang tahanan.

Wala namang nahuling nakabukas na establisimyento katulad ng bar o nightclub sa oras ng curfew. “Medyo marami lang nag-relax.

Nasa kalsada sila kahit alam nilang may curfew,” saad pa ni Makati City Chief of Police Col. Harold Depositar. Sa huling tala ay umabot na sa 846 ang aktibong kaso sa lungsod, kung saan 24 katao ang nadagdag na nagpositibo sa COVID-19.

Samantala, tinatayang 100 na curfew violators naman ang nahuli sa Sta. Cruz, Maynila kabilang ang mahigit 68 na menor-de-edad na naabutang naglalaro ng mobile games sa kalsada at karamihan sa kanila ay walang suot na face mask at face shield.

Kaagad silang dinala sa covered court ng Barangay 351. Matapos ang curfew hours ay sinundo na sila ng mga magulang at pinayagan na ring umuwi, ngunit katulad sa ibang curfew violators ay nagkaroon muna ng lecture tungkol sa COVID-19 at pinag-exercise rin sila.

Nagkakahalagang P1,000 ang multa ng mga nahuli. Ayon pa kay Linsday Javier, OIC ng Reception and Action Center ng Manila Department of Social Welfare, dadaan sa counseling ang mga nag-violate na kabataan para malaman kung may pagkukulang ang mga magulang at dapat sampahan ng kaso.

Kaugnay nito, kasalukuyang naka-lockdown ang MPD Station 11 sa Binondo, Maynila matapos magpositibo sa COVID-19 ang 46 police personnel.

Inaasahan ng pamahalaan na sa pagpapatuloy ng unified curfew ay unti-unting mababawasan ang mga violators at ang mga nadaragdag na positibo sa COVID-19. Magtatagal naman nang mahigit dalawang linggo ang ipinatupad na curfew.

Mga exempted sa unified curfew sa Metro Manila, nadagdagan

ni Lolet Abania | March 15, 2021

Nadagdagan ang pinapayagan na nasa labas sa kabila ng ipinatutupad na unified curfew sa Metro Manila upang mapigilan ang pagtaas ng COVID-19 sa naturang rehiyon.

Ngayong Lunes, sinimulan ang curfew ng alas-10:00 ng gabi hanggang alas-5:00 ng umaga, kung saan karamihan ay dapat na nasa loob na ng bahay.

Gayunman, may mga pinayagan na mga empleyado at services na mag-operate kahit pa abutin ng curfew hours.

Ayon sa Philippine National Police, exempted sa unified curfew ang mga sumusunod:

• medical practitioners

• nurses

• ambulance drivers

• workers at medical facilities

• ang mga kasama at katuwang sa medical emergencies

• drivers ng sasakyang nagdadala ng essential goods at mga produkto

• owners, vendors, o delivery personnel ng essential goods

• private employees gaya ng call center agents

• construction workers

• media practitioners

• ang mga papunta o nanggaling sa airport

• drivers ng private transportation gaya ng shuttle services

• miyembro ng law enforcement agencies (militar, Philippine Coast Guard, Bureau of Fire Protection at iba pang emergency responders)

• security guards

• mga empleyado ng fast food services (take out only) Una nang nai-report na mananatiling bukas kahit may curfew ang mga market delivery, market bagsakan, food take-out at delivery, mga botika, ospital, convenience stores, delivery ng goods, business process outsourcing (BPO) firms at katulad na negosyo.

Ayon naman kay Metropolitan Manila Development Authority (MMDA) Chairman Benjamin Abalos Jr., ang kaukulang penalties para sa mga lalabag sa curfew ay depende sa ordinansa ng kani-kanilang local government units (LGUs).