18 sa 47 cases ng Delta variant, 'di bakunado, 2 fully vaccinated

ni Lolet Abania | July 23, 2021

Hindi nabakunahan laban sa COVID-19 ang 18 mula sa kabuuang 47 cases ng mas nakahahawang sakit na Delta variant ng coronavirus.

Ayon kay Department of Health (DOH) Undersecretary Maria Rosario Vergeire, 2 sa ibang tinamaan ng Delta variant ay mga fully vaccinated, 4 ang nakatanggap ng isang dose ng COVID-19 vaccine, habang ang vaccination status ng natitirang 23 cases ay bineberipika pa.

Sa kabuuang 47 kaso ng Delta variant, 36 ang nakarekober na, 3 ang nasawi at 8 ang nananatiling aktibo subalit sila ay mga asymptomatic.

Gayunman, hindi tinukoy ng DOH kung sino sa nasawi, nakarekober at actives cases ang nabakunahan na kontra-COVID-19.

Samantala, sinabi ni Vergeire na 24 kaso ng Delta variant ay mga returning overseas Filipinos (ROFs), 22 ay local cases, habang bineberipika pa ng DOH kung ang isang kaso ay local o ROF.

Pitong pasyente naman ay mula sa Metro Manila, kabilang ang Manila, Pasig, at Taguig.

Anim sa ibang Delta variant cases ay naitala sa Region 6; 2 sa Region 4A; 2 sa Region 6; habang 6 sa Region 10.

Sa kabuuang Delta variant cases, 32 o 76% ay mga lalaki, kung saan ang mga pasyente ay 14-anyos hanggang 79 taong gulang.

Ayon pa kay Vergeire ang 12 bagong local cases na nai-report kahapon ay isasailalim sa isang reassessment.

“That’s our protocol, actually. When we detect this variant, ang ginagawa po natin, binabalikan po natin ‘yung mga individuals… at atin po silang nire-retest and then we quarantine them until we can get their results,” ani Vergeire sa isang briefing ngayong Biyernes.

Binanggit din ng kalihim na nakitaan na ng pagdami ng COVID-19 cases na infected ng mas nakahahawang Delta variant ang Northern Mindanao at ang lalawigan ng Antique.

“Nakita na po natin ‘yung cluster of infection sa Northern Mindanao, nakita po natin na ito ay family cluster. Nakita rin po natin na merong cluster of infection dito sa Antique,” sabi ni Vergeire.

COVID-19 vaccines, hindi masasayang — Vergeire

ni Mary Gutierrez Almirañez | May 15, 2021

Tiniyak ng Department of Health (DOH) sa publiko na hindi masisira ang lahat ng COVID-19 vaccines na nasa ‘Pinas, batay sa Laging Handa press briefing ni DOH Undersecretary Maria Rosario Vergeire ngayong araw, May 15.

Aniya, “Walang dapat ipangamba ang ating mga kababayan dahil ang tinatanggap natin na bakuna ay ligtas at within the expiry date. Hindi tayo tatanggap ng mga expired vaccines at hindi rin natin ipapagamit sa ating mga kababayan kung expired na ang mga bakuna.”

Iginiit niyang sa katapusan ng Agosto pa ang expiration date ng mga dumating na Pfizer, habang ang Sputnik V nama’y after 6 months pa bago mag-expire.

Matatandaan namang una nang iniulat ang papalapit na expiration date ng 2 million doses ng AstraZeneca.

Gayunman, tiniyak ng DOH na magagamit ang lahat ng iyon bago pa sumapit ang Hunyo at Hulyo.

Samantala, hindi naman niya binanggit kung kailan mag-e-expire ang Sinovac ng China.

Sa ngayon ay pinaiimbestigahan na ng DOH ang nangyaring brownout sa Makilala, North Cotabato, kung saan 348 vials ng Sinovac ang nasayang.

“Tinitingnan natin kung merong kailangan managot at kung ano ang dapat gawin after nito," sabi pa ni Vergeire.

Bangkang magde-deliver ng COVID-19 vaccines, lumubog sa dagat

ni Mary Gutierrez Almirañez | May 15, 2021

Lumubog sa dagat ng Ungos, Real, Quezon ang service boat ng Department of Agriculture (DA) na may lamang 2 kahon ng COVID-19 vaccines, na nakatakda sanang i-deliver sa Municipal Health Office ng Quezon.

Batay sa incident report ng Philippine Coast Guard (PCG) kahapon, nangyari ang insidente nu’ng ika-13 ng Mayo pasado alas-7 nang umaga, kung saan kabilang sa mga nakasakay sa service boat ay ang 2 personnel ng Department of Health (DOH), 2 police officers ng Polillo Municipal Police Station (MPS), kasama ang kapitan at ang motorman ng bangka.

Ayon pa sa PCG, ganap na 8:30 nang umaga nang ma-rescue sa dagat ang mga pasahero at ang COVID-19 vaccines.

Tiniyak naman ng DOH personnel na na-secure nila ang mga kahon ng bakuna at siniguradong hindi iyon na-damage.

Matatandaang napaka-sensitive ng bawat COVID-19 vaccines, kung saan bawal iyon matagtag o maalog dahil masisira kaagad. Kaya naman, sa tuwing idine-deliver ang mga bakuna sa storage facility ay tinitiyak ng driver na patag ang kalsadang daraanan upang maiwasan ang baku-bakong lugar.

Kamakailan lang din nu’ng iulat na mahigit 348 vials ng bakuna ang nasira nang dahil naman sa brownout.

Sa ngayon ay ligtas namang naihatid ang 720 doses ng COVID-29 vaccines sa health office ng Polillo at ang 920 doses sa health office ng Bordeos, Quezon.

Samantala, hindi naman binanggit ang brand ng COVID-19 vaccines na iniahon mula sa lumubog na bangka.

Paglilinaw pa ni DOH Undersecretary Maria Rosario Vergeire, nakadoble ang plastik ng kahon at maayos nilang ipina-package ang mga bakuna bago i-deliver.

Kaugnay nito, pinaaalalahanan din ni Vergeire ang bawat local government units (LGU) na huwag lagyan ng pagkain ang refrigerator na pinag-iimbakan ng COVID-19 vaccines.

"Makikita natin, baka 'yung ibang local governments, dahil mayroon tayong 2 to 8 degrees lang na mga bakuna, baka naisasama sa mga pagkain sa refrigerator at hindi po ito tama," sabi pa niya.