88 ang buntis... 325 OFWs mula UAE, pinauwi na sa ‘Pinas

ni Ronalyn Seminiano Reonico | June 19, 2021

Pinauwi na sa Pilipinas ang 325 overseas Filipinos workers (OFWs) mula sa UAE noong Huwebes na naapektuhan ng COVID-19 pandemic.

Ayon sa Department of Foreign Affairs, kabilang sa mga na-repatriate ay 88 na “pregnant distressed overseas Filipinos.”

Saad pa ng ahensiya noong Huwebes, “A total of 325 distressed OFWs arrived this morning at the NAIA Terminal 1. This is the third flight from UAE this year especially chartered by the DFA through the Office of the Undersecretary for Migrant Workers Affairs (DFA-OUMWA) using the DFA’s Assistance to National Fund.”

Nilinaw naman ng DFA na sasailalim sa “stringent facility-based quarantine” ang mga napauwing OFWs bilang pagsunod sa health protocols ng Department of Health (DOH) - Bureau of Quarantine (BOQ).

Bukas pa rin umano ang DFA para sa mga Pilipinong nais umuwi sa bansa. Saad pa ni DFA Undersecretary for Migrant Workers' Affairs Sarah Lou Y. Arriola, "To our kababayan in distress, we hear you. We are here for you. “This recent arrival is a clear testament of our commitment to bring you home.”

2 Pinoy, patay sa gas explosion sa UAE

ni Ronalyn Seminiano Reonico | September 2, 2020

Kinumpirma ng Department of Foreign Affairs (DFA) na dalawa ang Pilipinong namatay nitong Lunes nang umaga sa naganap na gas explosion sa isang restaurant sa Sheikh Rashid Bin Seed Road sa Abu Dhabi, United Arab Emirates.

Ayon kay Philippine Ambassador to the UAE Hjayceelyn Quintana, nakipag-ugnayan na sila sa pamilya ng mga nasawing Pinoy upang magpaabot din ng pakikiramay. Siniguro rin ni Quintana na bibigyan ang pamilya ng mga ito ng “necessary assistance.”

Nakipag-ugnayan na rin ang Philippine Embassy sa Abu Dhabi sa mga local officials para sa mga sugatang Pinoy sa naturang insidente.

Pagsabog sa 2 resto sa UAE, maraming sugatan

ni Lolet Abania | August 31, 2020

Nag-iwan ng maraming sugatan ang dalawang magkahiwalay na pagsabog sa Abu Dhabi at sa tourism hub ng Dubai, sa United Arab Emirates, ayon sa pulisya at local media.

Sa report ng local media, isang gas cylinder ang sumabog sa Dubai restaurant bandang alas-10 ng umaga kanina, kung saan isa ang namatay.

Ayon sa Dubai Civil Defense spokesperson, nagdulot ang naturang pagsabog ng pagkasira ng ground floor ng isang gusali. Inabot ng 33 minuto bago tuluyang naapula ang sunog.

Sa Abu Dhabi, tinamaan ng pagsabog ang KFC at Hardees restaurants sa Rashid bin Saeed Street. Nadamay din ang ibang retail outlets ng siyudad, ayon sa report ng Abu Dhabi-owned newspaper na The National.

Gayunman, ayon sa Abu Dhabi police, karamihan sa mga tinamaan ng explosion ay minor at moderate injuries ang nangyari. Wala ring naitalang casualty sa pagsabog. Pina-evacuate na ang lahat ng residente ng gusali at sa kalapit na lugar.

Samantala, sa Rashid Saeed Street, na kilala rin bilang airport road ng lugar, ay inasahan ang top aides ni US President Donald Trump at Israeli Prime Minister Benjamin Netanhayu, na darating nang hapon kanina, dahil sa isang historic trip sa pagitan ng Israel at isa pang bayan ng Arab.