Sinopharm vaccine nakitaan ng masamang epekto, clinical trials sa Peru, itinigil

ni Twincle Esquierdo | December 12, 2020

Pansamantalang itinigil ng bansang Peru ang kanilang clinical trials ng COVID-19 vaccine na gawa ng Chinese drug giant company na Sinopharm matapos makitaan ng negatibong epekto ang isa sa kanilang mga volunteers.

Nahirapan umanong igalaw ng volunteer ang kanyang mga braso, ayon sa National Institute of Health nitong Biyernes.

Ayon sa researcher na si German Malaga, nagkaroon ng neurological symptoms o tinatawag na Guillain-Barre syndrome ang kanilang volunteer.

Aniya, "Several days ago we signaled, as we are required, to the regulatory authorities that one of our participants presented neurological symptoms which could correspond to a condition called Guillain-Barre syndrome."

Ang Guillain-Barre syndrome, ay bihirang sakit at hindi nakahahawa ngunit nakaaapekto ito sa paggalaw ng mga braso at binti kaya nagdeklara ang Peru ng temporary health emergency sa limang regions noong Hunyo ng nakaraang taon kasunod ng maraming kaso.

Umabot na rin sa 60,000 ang naturukan ng Sinopharm vaccine mula sa mga bansang Argentina, Russia at Saudi Arabia.

Ayon pa sa Peru, kung magiging matagumpay ang bakunang ito, asahan na bibili ang Peruvian government ng halos 20 milyong doses.

Samantala, ang Peru ang isa sa may pinakamaraming bilang ng mga namatay mula sa Covid-19 na umabot na sa 36,499 nitong Biyernes.

APRIL BOY REGINO, PUMANAW NA SA EDAD NA 51

ni Twincle Esquierdo | November 29, 2020

Pumanaw na sa edad 51 si April Boy Regino. Ito ay kinumpirma sa Facebook post ng kanyang kapatid na si Vingo Regino.

Aniya, "Nakakalungkot naman ang araw na ito..wala na ang kuya April Boy ko..."

Na-diagnose ang singer na may prostate cancer noong 2009 at nanatili sa United States at noong 2013, inanunsiyo niyang gumaling na siya sa sakit na ito.

Samantala, ibinahagi niya noong 2015 na nakararanas siya ng diabetic retinopathy kung saan maaaring maging sanhi ng pagkawala ng paningin at pagkabulag.

Sa isang pahayag noong 2016, sinabi niya na ang kanyang kaliwang mata ay tuluyan nang nabulag habang ang kanang mata ay nakakaaninag na lamang ng mga ilaw. Kaya, naging limitado na lamang ang kanyang mga kilos.

Ilan sa mga sumikat na kanta ni April Boy ay ang 'Di Ko Kayang Tanggapin at Paano ang Puso Ko.

3 magkakaibigan, pinagbabaril habang nag-iinuman, patay

ni Twincle Esquierdo | November 21, 2020

Patay ang tatlong magkakaibigan sa Tiaong, Quezon matapos pagbabarilin habang nag-iinuman nitong Huwebes nang gabi sa Barangay Del Rosario.

Ayon sa Tiaong Municipal Police Station, pasado alas-9 ng gabi nang mangyari ang insidente sa tindahan ng goto sa nasabing barangay. Batay sa mga nakasaksi, nag-iinuman ang magkakaibigan nang biglang dumating ang dalawang lalaki na may dalang baril at pinagbabaril ang mga ito.

Isinugod agad ng mga residente ang dalawang sugatan at tatlong pinagbabaril sa isang pagamutan sa San Juan, Batangas, ngunit dead on arrival ang tatlong magkakaibigan.

Kinilala ang mga biktima na sina dating Barangay Del Rosario Captain Richard Nitro, Jay-Ar Javillo at Selvino Macaraig.

Ayon sa kapatid ni Nitro na si Ma. Elena Cumal, mabait at matulungin ang kanyang kapatid at wala raw itong nakaaway kahit noong nanunungkulan pa bilang kapitan ng barangay.

Wala naman itong naikuwento sa kanila kung mayroong nagbabanta sa buhay niya, kaya hustisya ang panawagan ng kanilang pamilya.

Samantala, sa Maynila raw nakatira si Macaraig at umuwi lang ito para puntahan ang mga puno ng saging na sinira ng Bagyong Ulysses, kaya hindi akalain ng kanyang mga kamag-anak na madadamay ito sa pamamaril.

Ayon sa hepe ng Tiaong Municipal Police Station, maaaring paghihiganti kay dating Kapitan Richard Nitro ang nakikita nilang motibo sa nangyaring pamamaril.