14 na sasakyan, inararo, 1 patay, 9 sugatan

ni Thea Janica Teh | October 6, 2020

Isa ang patay at 9 ang sugatan matapos araruhin ng isang sasakyan ang mga kasabay nito sa kalsada sa Barangay Upper Bicutan, Taguig City ngayong Martes.

Ayon sa Taguig City police chief na si Colonel Celso Rodriguez, ang namatay ay si Christian Dalisay, samantala, dinala naman ang iba pang nasugatan sa Taguig-Pateros Hospital.

“'Yung iba naman, hindi nasaktan kasi sila 'yung nasa pinakalikuran, kasi kung titingnan natin, sunud-sunod kasi, medyo traffic doon sa lugar kaya lang, parang nagkaroon ng domino effect,” sabi ni Rodriguez.

Labing-apat na sasakyan kabilang ang 5 kotse, 1 bisikleta at 8 motorsiklo ang nakasama sa insidente.

Kinilala naman ang suspek na si Conrad Frank Toledo, isang company driver, na bagama't hindi naman daw lasing, nakatingin umano ito sa cellphone habang nagmamaneho na naging dahilan ng aksidente.

Sinubukan pa umanong tumakas ni Toledo ngunit naging sanhi na naman ito ng pagbangga sa iba pang motorsiklo.

Sa ngayon, hawak na ng awtoridad ang suspek at nahaharap sa kasong reckless imprudence resulting in multiple injuries with multiple damage to property at homicide.

Videoke, bawal sa oras ng online class- PNP

ni Thea Janica Teh | October 6, 2020

Inirerekomenda ng Philippine National Police (PNP) sa mga opisyal ng barangay na ipagbawal ang operasyon ng videoke machine sa oras ng online class upang hindi maistorbo ang mga estudyante.

Ang ordinansa na pagbabawal ng videoke pagtapos ng 10:00 ng gabi ay ipinapatupad na sa Maynila, ngunit mas palalawigin pa ito upang masama ang oras ng klase.

Ayon kay PNP Chief General Camilo Pancratius Cascolan, hihilingin na umano nito sa mga barangay officials na magpatupad ng ganitong ordinansa. Makikipagtulungan din umano ang PNP sa mga local government units at barangay.

Nagsimula na nitong Lunes, Oktubre 5, ang online class ng mga estudyante. Ito ang naisip na paraan ng Department of Education upang maipagpatuloy ang pag-aaral sa panahon ng pandemya.

Pasig River Ferry Service, tigil-operasyon dahil sa water lily

ni Thea Janica Teh | October 6, 2020

Pansamantalang ititigil ang operasyon ng Pasig River Ferry Service ngayong Martes matapos mapuno ng water lily ang Pasig River.

Ayon kay Irene Navera ng Pasig River Ferry Service central administration, Sabado pa nang ipatigil ang operasyon dahil makasisira umano sa bangka ang mga water lily kapag pumulupot sa propeller.

Dagdag pa ni Navera, dumadami ang water lily sa buwan ng Hunyo hanggang Nobyembre dahil ito rin ay panahon ng tag-ulan. Sa ngayon ay hindi pa nito masabi kung kailan babalik sa operasyon ang ferry service.