Namatay kay “Rolly”, 16 na!

ni Thea Janica Teh | November 2, 2020

Umakyat na sa 16 katao ang naitalang namatay dahil sa bagyong Rolly, ayon sa Office of Civil Defense V (OCD V) ngayong Lunes.

Sa inilabas na update ng OCD V, sampu rito ay mula sa Albay (Daraga, 1; Guinobatan, 3; Malinao, 2; Oas, 1; Polangui, 1; Tabaco City, 2) habang ang anim naman ay mula sa Catanduanes (Gigmoto, 1; Virac, 4; San Miguel, 1).

Ang tatlong naitala sa Guinobatan ay patuloy pa ring pinaghahanap ng mga awtoridad.

Bukod pa rito, sinabi rin ng OCD V na may kabuuang 96,887 pamilya o 372,381 indibidwal ang lubos na naapektuhan at inilikas sa buong rehiyon ng Bicol.

Tinataya ring umabot sa 76,176 kabahayan sa Bicol ang nasira ng bagyong Rolly.

Ilang tulay at kalsada rin mula sa 10 munisipalidad sa Albay at 29 munisipalidad at 186 barangay sa Camarines Sur ang hindi pa madaanan hanggang ngayon dahil sa baha.

Samantala, ibinahagi naman ng Department of Agriculture sa Region V na may kabuuang P694,366,305.89 ang halaga ng napinsala ng bagyo sa buong Bicol region.

Sinabi naman sa Laging Handa press briefing ni Albay Governor Al Francis Bichara na patuloy pa rin ang assessment ng awtoridad sa pinsalang naidulot ng bagyo sa probinsiya.

May mga ilang lugar pa rin umano sa probinsiya na walang kuryente at inaasahang matatagalan pa bago muling maibalik.

Bagyong Siony, papasok sa Huwebes

ni Thea Janica Teh | November 2, 2020

Napanatili ng bagyong Siony ang kanyang lakas sa pagbaybay nito ngayong Lunes sa west-northwestward ng Philippine Sea, ayon sa PAGASA.

Namataan ang sentro ng bagyo sa 620 km east ng Aparri, Cagayan. Ito ay may lakas na 65 kph at may bugso ng hangin sa 80 kph.

Sa press briefing kasama si Presidential Spokesperson Harry Roque, sinabi ng PAGASA forecaster na itataas sa Tropical Cyclone Wind Signal (TCWS) No. 1 ang Cagayan Valley kasabay ng pag-landfall ng bagyo sa Huwebes.

Inaasahan din na babagal ang bagyo sa darating na Martes at Miyerkules nang umaga papunta sa Northern Luzon.

Magdadala ng malakas na pag-ulan ang bagyong Siony ngayong Lunes sa Batanes, Cagayan at Isabela, kaya naman, pinag-iingat ang lahat ng mga residenteng naninirahan sa mga nabanggit na lugar sa posibleng baha at landslide.

PNP, ready na vs. Bagyong Rolly

ni Thea Janica Teh | November 1, 2020

Inihanda na ng Philippine National Police (PNP) ngayong Linggo ang Reactionary Standby Support Force (RSSF) para sa agarang pagresponde sa posibleng sakuna na dala ng bagyong Rolly.

Ayon kay PNP Chief General Camilo Cascolan, nasa full alert na umano ang lahat ng kapulisan at kasalukuyang inihahanda ang evacuation center na tutuluyan ng mga pamilyang lubos na naapektuhan.

Aniya, "We are in coordination with LGUs for preemptive evacuations. We are currently conducting preventive evacuation of all people residing near coastal areas."

Bukod pa rito, naghahanda na rin ang PNP ng mga food packs para sa relief operation sa mga lugar na tinamaan ng bagyo. Inihanda na rin ang mga truck na gagamitin sa Libreng Sakay Program.

"We are calling on our people in affected areas to stay safe, alert and informed, and heed the orders of authorities particularly for preemptive evacuation that may be enforced. The PNP will be there where we are needed most, and together we will weather the storm," dagdag ni Cascolan.