Maj. Sinas, bagong PNP chief

ni Thea Janica Teh | November 9, 2020

Itinalaga na bilang Philippine National Police (PNP) Chief si Metro Manila Police Chief Major General Debold Sinas ngayong Lunes, ayon kay Presidential Spokesperson Harry Roque.

Si Sinas ang hinirang ni Pangulong Rodrigo Duterte bilang ika-25 chief sa 200,000 police force at papalit kay Gen. Camilo Cascolan na nakatakdang magretiro sa Martes dahil naabot na ang mandatory retirement age.

Naging direktor ng Central Visayas Regional Police Office sa Cebu City si Sinas noong July 2018 hanggang January ngayong taon bago ito itinalaga bilang head ng National Capital Region (NCR) Police Officer.

Nakatakda namang maabot ni Sinas ang mandatory retirement age na 56 sa May 2021.

Pag-IBIG members na naapektuhan ng Bagyong Rolly, maaari nang mag-apply sa Calamity Loan

ni Thea Janica Teh - @Bulgarific | November 9, 2020

Hello, Bulgarians! Inanunsiyo nitong Martes, Nobyembre 3, 2020 ng top executives ng Pag-IBIG Fund na handa silang tumulong sa mga miyembrong naapektuhan ng Bagyong Rolly.

Ayon sa head ng Department of Human Settlements and Urban Development (DHSUD) at 11-member Pag-IBIG Fund Board of Trustees na si Secretary Eduardo D. del Rosario, handa na silang tulungan ang mga naapektuhan ng Bagyong Rolly sa pamamagitan ng Calamity Program.

Halos 226,170 miyembro ng ahensiya ang naapektuhan ng bagyo at maaaring paghatian ang kabuuang P4.4 bilyon sa calamity loan.

Bukod pa rito, naglagay na rin ang ahensiya ng service desk sa mga lugar na lubhang naapektuhan ng bagyo upang mas mapadali ang pag-a-apply sa loan.

Sa ilalim ng Calamity Loan Program ng Pag-IBIG Fund, maaaring makahiram ang mga miyembro ng halos 80% ng kanilang kabuuang Pag-IBIG Regular Savings kung saan nakapailalim ditto ang kanilang monthly contribution, employer’s contribution at accumulated dividends. Ito ay maaaring makuha sa loob ng 90 araw matapos ideklara ang state of calamity sa kanilang bayan.

Sa programa ring ito, makukuha ang lowest rate na 5.95% per annum. Ito ay maaaring bayaran sa loob ng 24 buwan at mag-uumpisa ang bayaran matapos ang 3 buwang pagkuha nito.

Dagdag pa ni del Rosario, nitong Enero, nakapaglabas sila ng P3.84 bilyon sa Calamity Loan upang matulungan ang 301,391 miyembrong naapektuhan ng pagputok ng Bulkang Taal.

Samantala, para sa mga miyembrong mayroon pang internet access at may Loyalty Card Plus, Land Bank of the Philippines o United Coconut Planters’ Bank (UCPB) cash card ay maaari ng makapagpasa ng loan application gamit ang kanilang Virtual Pag-IBIG. Sa pamamagitan nito ay makukuha nila ng mas madali at mabilis ang kanilang loan.

'Ulysses', next kay 'Tonyo'

ni Thea Janica Teh | November 8, 2020

Isang low pressure area (LPA) ang namataan ngayong Linggo sa silangang bahagi ng Surigao del Sur at maaaring maging bagyong papangalanang Ulysses sa susunod na 24-36 oras, ayon sa PAGASA.

Sa weather advisory na inilabas kaninang alas-4 ng hapon, huling nakita ang LPA sa 920 kilometrong silangang bahagi ng Hinatuan.

Ito ay maaaring pumunta sa north-northwestward ng Lunes nang gabi at dadaan mula sa northwestward hanggang west-northwestward ng Central-Southern Luzon area.

Sa ngayon ay wala pa itong naaapektuhan sa bansa ngunit, magdadala ng pag-ulan sa eastern section ng Luzon at Visayas simula Lunes nang hapon.

Samantala, makararanas pa rin ng pag-ulan ang Palawan kasama ang Calamian at Kalayaan island sa darating na 24 oras dahil sa Bagyong Tonyo.

Bukod pa rito, makararanas din ng pag-ulan ang Cagayan Valley, Cordillera Administrative Region, Ilocos Region, Aurora at Metro Manila dahil sa amihan.

Pinaalalahanan ng PAGASA ang publiko sa posibleng landslide at pagbaha dahil sa ulan.