Dagdag RFID installation booth, solusyon sa lumalalang trapiko - Gatchalian

ni Thea Janica Teh - @Bulgarific | December 7, 2020

Hello, Bulgarians! Sinabihan ni Senador Win Gatchalian ang Department of Transportation (DOTr) at mga toll operators na ayusin ang lumalalang trapiko sa mga expressway dulot ng mga pumipilang motorista na nagpapakabit ng Radio-Frequency Identification (RFID) sticker.

Iminungkahi ni Gatchalian ang paglalagay ng mga karagdagang installation booths upang hindi maipon ang mga nagdadagsaang mga motorista na nagpapa-enroll para sa electronic toll collection (ETC) system at maiwasan ang paglala ng traffic.

Nanawagan ang senador matapos mapabalita ang dumaraming reklamo ng mga motorista sa pagpapakabit ng RFID sticker kahit na ginawa nang installation lanes ang ilang regular toll lanes. Mula noong December 1, ipinatutupad na ang cashless at contactless transactions sa mga toll plazas.

Pinuna rin ng senador ang napabalitang depektibong RFID sensors na lalong nagpalala ng sitwasyon ng trapiko.

Bukod pa rito, napag-alaman din ng mambabatas na nitong mga nakaraang araw, naiipit ng halos tatlong oras sa traffic ang mga motoristang pabalik ng Valenzuela City sa North Luzon Expressway (NLEX) interchange dahil sa pumapalyang RFID sensor.

“Nasa pamamahala na ito ng toll operators na masigurung gumagana ang mga RFID sensors at nababasa nito ang bawat car sticker na dumadaan dahil kung hindi, ano pa ang silbi ng ganitong klase ng teknolohiya kung hindi naman nito nagagampanan ang layunin nito?” giit ng senador.

“Nakikita ko naman ang katuturan ng sistema na gawing cashless ang pagbabayad ng toll sa mga expressways lalo na’t hindi pa natin napipigilan ang pagkalat ng COVID-19. Ngunit hindi naman maaring wala tayong gawin at hayaang maipit na lang sa trapiko ang mga tao. Nakakahinayang ang mga oras na nasasayang lalo na’t hindi na ito mababawi,” dagdag pa ng Vice-Chairman ng Senate Economic Affairs Committee.

Ayon sa mga pag-aaral, bilyong piso ang nawawala dahil sa problemang dulot ng trapiko, ani Gatchalian.

Pinatunayan ito ng pagsusuring isinagawa ng Japan International Cooperation Agency (JICA) sa sitwasyon ng trapiko sa Pilipinas noong 2017 kung saan may P3.5 bilyon kada araw ang nawawala o nalulugi sa Metro Manila dulot ng matinding trapiko at ito’y tinatayang aabot sa P5.4 bilyon kada araw pagdating ng 2035 kung hindi ito maagapan.

“Malaking kaluwagan ang cashless o contactless na transaksiyon sa mga motorista at sa kalaunan, maiiwasan ang matinding traffic lalo na kung rush hours. Samantala, kailangang may gawin tayo para maibsan ang mga daing ng mga motorista dito sa transition period ng ETC,” sabi ni Gatchalian.

Nagmungkahi rin ang senador sa mga kinauukulan na paigtingin ang information campaign upang maiwasan ang kalituhan ng publiko sa pagpapalagay ng electronic tags at isa sa mga nakapagpapalala ng trapiko sa mga expressways.

123k operators ng PUV, nakatanggap na ng ayuda mula sa LTFRB

ni Thea Janica Teh | December 5, 2020

Umabot sa P802 milyong halaga ng ayuda ang ipinamahagi ng Land Transportation Franchising and Regulatory Board (LTFRB) sa mga public utility vehicle (PUV) operators na lubos na naapektuhan ng COVID-19 pandemic.

Ayon kay LTFRB Chairman Martin Delgra III, may kabuuang P802,860,500 ayuda ang ipinamahagi sa 123,517 PUV units.

Sa ilalim ng Bayanihan to Recover As One Act o Bayanihan 2, naglaan ng P1.158 bilyong halaga ng ayuda para sa mga operator ng PUV na nawalan ng mapagkakakitaan sa panahon pandemya.

"Tuluy-tuloy lang po ang pamimigay ng subsidiya sa mga PUV operators na lubhang apektado ang kabuhayan ng kasalukuyang pandemya. Patunay po ito sa nais ng pamahalaan na sila ay tulungang makabangon. Hindi po sila pababayaan habang dumaranas tayong lahat ng pandemya," dagdag ni Delgra.

Samantala, makukuha naman ng 17,612 PUV units ang kanilang ayuda sa mga susunod na araw. Ito ay parte ng P917,338,500 “obligated” fund para sa mga PUV operators.

Sa ilalim ng Direct Subsidy Program, ang bawat operator ay makatatanggap ng P6,500 per PUV unit sa ilalim ng kanilang franchise.

Ngayong Disyembre, nasa P724 milyong halaga ng ayuda na ang naipamahagi para sa 110,000 operators.

36 hinihinalang miyembro ng Abu Sayyaf, sumuko na

ni Thea Janica Teh | December 5, 2020

Sumuko na ang 36 hinihinalang miyembro ng Abu Sayyaf group sa mga militar sa Sulu nitong Biyernes, ayon sa Joint Task Force-Sulu ng Philippine Army.

Ang 36 indibidwal ay hinihinalang miyembro ni ASG subleader Alhabsy Misaya na napatay sa sagupaan sa mga Marines noong 2017. Kilala rin si Misaya bilang kidnapper at wanted sa Malaysia.

Nakuha rin sa mga sumuko ang pitong M1 Garand rifles at 1 M653 rifle na agad na dinala kina Naval Forces Western Command Commander Comodore Toribio Adaci, Jr., JTF Sulu Chief Major General William Gonzales, Omar Mayor Abdulbaki Ajibon at Philippine Army Battalion Commander MBLT8 Lieutenant Colonel Allan Angelo Tolentino sa Omar Sulu.

Ayon kay Ajibon, pawang mga biktima umano ang 36 na indibidwal.

Aniya, "Totoo po iyong sabi ng ating Navy Officers dito. Ito hong 36 na tao na ito ay mga biktima lang din. Noong panahon ay naipit lang sila ng pagkakataon at napilitang kumapit sa patalim.”

Kinilala naman ni Gonzales ang pagsisikap ng mga militar kasama ang lokal na pamahalaan upang sumuko ang mga ito.

"Napakaganda ho ng tulungan ng ating kasundaluhan at LGU. Katulad ho ng ginawa natin ngayon, nagkaroon na rin ng peace covenant sa Indanan at Patikul kung saan itinatakwil ang mga miyembro at sumusuporta sa Abu Sayyaf," dagdag ni Gonzales.