Bukod pa ‘yung kasama ang 2 anak… MARIAN, NAKA-30 ENDORSEMENTS SA ISANG TAON LANG

ni Erlinda Rapadas @Teka Nga | Feb. 22, 2025

Photo: Marian Rivera - Instagram

Marami ang nagtatanong kung kailan magbabalik sa telebisyon ang Primetime Queen na si Marian Rivera. 

Sa isang mediacon ay nabanggit niyang ngayong 2025 ay magbabalik na siya at muling lalabas sa isang serye ng GMA-7, pero wala pang ibinigay na detalye kung ano’ng project at kung kailan ito uumpisahan. 

May balitang posibleng sila ni Dingdong Dantes ang magtatambal sa bagong serye, inaayos lang ang kani-kanilang schedule ngayon. 

Medyo malalaki na ang dalawa nilang anak na sina Zia at Sixto, kaya maaari nang mag-full-time si Marian sa kanyang career. 

At kahit hindi siya napapanood ngayon sa telebisyon, in-demand pa rin bilang product endorser si Marian. Malaki pa rin ang tiwala sa kanya ng mga advertisers dahil ang sipag ni Marian na mag-post sa social media ng kanyang mga daily activities na pinagkakaabalahan at malaki pa rin ang kanyang following.

Ngayong 2025, 30 endorsements ang kanyang tinanggap bilang solo endorser. Iba pa ‘yung endorsements na kasama ang kanyang mga anak na sina Zia at Sixto. 

Well, new look ngayon si Marian Rivera dahil nagpaiksi ng buhok. Bumagay naman sa kanya at bumata siyang tingnan.

---

ISA sa mga talents na maipagmamalaki ni Rayver Cruz ay ang husay niya sa pagsasayaw. Madalas ay partners sila sa paghataw ng kanyang Kuya Rodjun. Pero, marunong ding kumanta si Rayver dahil mga singers ang angkan ng mga Cruz. 

Nang mapadpad si Rayver sa GMA Network at ipinareha siya kay Julie Anne San Jose, natuto na rin siyang mag-host ng talent show tulad ng The Clash (TC). Swak sila ni Julie Anne bilang tandem as singer-performer sa programang All-Out Sundays (AOS). 

Ganunpaman, gusto rin ni Rayver na mahasa ang kanyang acting skills. Ayaw niyang malimitahan ang kanyang talento sa pagsasayaw at pagkanta lamang. At nagbunga naman ng maganda ang kanyang pagsisikap na mahasa sa pag-arte. 

Katunayan, nanalo siyang Best Actor dahil sa kanyang mahusay na pagganap sa afternoon soap ng GMA-7, ang Asawa ng Asawa Ko (ANAK). Isang award-giving body ang kumilala sa kanyang talento bilang aktor, kaya labis ang pasasalamat ni Rayver Cruz sa karangalan at pagkilalang ipinagkaloob sa kanya.

Wish naman ng mga JulieVer fans, sana ay magkasama sina Julie Anne at Rayver sa isang magandang serye upang mag-level-up pa ang kanilang galing sa pag-arte.

---

KAHIT consistent na mataas ang ratings at tinatangkilik ng libu-libong viewers ang sitcom na Pepito Manaloto: Tuloy ang Kwento (PM:TAK), hindi tumigil ang creative team ng show, sa pangunguna ni Michael V., upang mag-isip ng magagandang ideas at napapanahong kuwento para sa bawat episode na ipapalabas nila tuwing Sabado. 

Kaya kahit ang mga GenZ ay makaka-relate at maaaliw sa panonood ng PM. 

Ang maganda pa, dahil sa tagal ng pagsasama ng buong cast ng PM, para na rin silang isang malaki at masayang pamilya. Excited ang lahat na magtrabaho dahil masaya ang ambiance sa set. 

Ang PM ay magse-celebrate ng 15th anniversary ngayong 2025. Kaya ito ay pinaghahandaan nina Michael V., Manilyn Reynes, Nova Villa, Chariz Solomon, Jake Vargas, Mosang, atbp.. 

Magiging espesyal ang mga susunod na episodes ng PM. Marami ang naaliw sa Valentine episode kaya lagi itong pinapanood tuwing Sabado ng gabi sa GMA-7. 

Well, pangako ng cast ng PM na “more tawa at more saya” ang ibibigay nila sa mga loyal viewers ng GMA show.

---

USO na naman ang concert ngayon. Handa nang gumastos ang mga mahihilig manood ng concert-shows ng mga sikat na singers-performers.

Kaya, na-inspire rin na muling bumalik sa center stage ang ilang mga singers tulad nina Gary V., Martin Nievera, Pops Fernandez, Ogie Alcasid, Regine Velasquez, Sharon Cuneta, Zsa Zsa Padilla, atbp.. 

Maging ang ilang singers noong ‘80s at ‘90s ay muling magpapasaya sa kanilang mga dating tagahanga, tulad ni Miriam Pantig na sumikat noong late ‘80s. 

Isang one-night only concert ang gaganapin ngayong Sabado sa Teatrino Greenhills para sa isang post-Valentine concert titled Flashbacks and Grooves (FAG). 

Special guests dito sina Patricia Javier, Token Lizares, Ryan Englis, kasama ang Moving Fingers Band. Part ng proceeds ay ibibigay sa charity.

Kapalit ni Ricci Rivero… ANDREA, GUWAPONG BASKETBALL PLAYER NA SI SAMUEL FERNANDEZ ANG BAGO

ni Erlinda Rapadas @Teka Nga | Feb. 21, 2025

Photo: Andrea Brillantes at Sam Fernandez - Circulated, IG FB

May love life na naman ngayon si Andrea Brillantes at masaya ang kanyang Valentine date. 

Ipinasilip ni Andrea sa kanyang Instagram (IG) ang larawan kung saan may hawak siyang malaking bouquet ng pink roses habang nasa isang yate. 

Isang guwapong basketball player ng San Beda ang bagong inspirasyon ni Andrea. Ito ay ang 6’3” ft. tall na si Samuel Fernandez. 

Ang unang nakarelasyon ni Andrea ay si Ricci Rivero, na nauwi sa paghihiwalay. Hindi maganda ang kinahantungan ng kanilang relasyon. 

Naging malapit din si Andrea sa aktor-singer-dancer na si Kyle Echarri, pero ‘good friends’ lang daw sila at hindi naging magdyowa. Hindi nauwi sa seryosong relasyon ang pagiging malapit nila sa isa’t isa. 

Binuo ng kanilang mga fans ang KylDrea love team pero hanggang sa kamera lang ang kanilang sweetness sa isa’t isa. 

Pansamantalang nagpahinga ang puso ni Andrea kaya last year ay walang gaanong ganap ang kanyang buhay. Tumutok siya sa kanyang negosyo.

Pero ngayong 2025, kulay rosas na naman ang mundo ni Andrea dahil sa isang guwapong basketball player ng San Beda. Matangkad at malakas ang appeal ni Sam Fernandez. Habulin din ito ng chicks, pero kay Andrea siya nagkagusto at madalas na silang nagde-date. 

Kaya naman, marami ang naiinggit ngayon at inaabangan ng lahat ang mga kaganapan sa bagong chapter ng love life ni Andrea Brillantes.

---

Mata pa lang daw, umaakting na… 

BIANCA, MAY ‘K’ PUMALIT SA TRONO NI NORA 

BASE sa reaction ng mga nakapanood sa premiere night ng pelikulang Mananambal na pinagbibidahan ng Superstar at National Artist na si Nora Aunor, napakagaling daw ng Kapuso actress na si Bianca Umali na kasama ni Aunor sa pelikula. 

Kuhang-kuha raw ni Bianca ang ‘mata-mata’ acting na trademark ni Nora. Talagang lumutang ang husay ni Bianca sa pag-arte sa mga eksena nila ng Superstar. Nasabayan-napantayan ni Bianca ang galing ni Nora sa Mananambal. 

At tama lang na sa drama luminya si Bianca dahil ito ang kanyang forte. Kaya naman, siya ang pinagbibida ng GMA Network sa mga seryeng mabibigat ang tema. 

Habang nagtatagal ay lalong nade-develop ang pagiging aktres ni Bianca Umali. Asset niya ang kanyang mga mata na nagagamit niya sa mabibigat na eksena.

Sabi nga ng ilang movie critics na nakapanood sa Mananambal, si Bianca ang posibleng humalili kay Nora Aunor kapag nagretiro na ang Superstar sa showbiz.

Ang Mananambal ay mula sa direksiyon ni Adolf Alix, Jr. at produced ng Viva Films. Kasama rin sa cast sina Edgar Allan Guzman, Kelvin Miranda, Jeric Gonzales at Martin del Rosario! 

Hindi dapat palampasin ng mga Noranians ang Mananambal na puwedeng pumantay sa Himala ni Nora Aunor.

---

TIYAK na marami ang nagtataka kung bakit tinanggap ni Camille Prats ang kanyang role sa bagong afternoon soap ng GMA-7 na Mommy Dearest (MD) na isang kontrabida.

Dati ay wholesome at api-apihan ang role na madalas ginagampanan ni Camille sa mga seryeng kanyang tinatanggap. ‘Yun ang image niya na nagmarka sa mga viewers. 

Pero ngayon, sa MD ay bida/kontrabida nga ang kanyang role. Malaking challenge ito at kailangan na maging convincing ang kanyang pagganap. 

Sey nga ni Camille, humingi siya ng tips kay Katrina Halili kung paano maging bad girl. Si Katrina ay nagmarka bilang kontrabida sa mga seryeng kanyang ginawa sa GMA-7. 

Ngayon ay nagkapalit sila ng role ni Camille sa MD. Kalmado ang acting ni Katrina sa MD dahil hindi salbahe ang kanyang role. 

Kasama nina Camille at Katrina sa MD sina Shayne Sava at Dion Ignacio. 

Well, at least ay mapapahinga pansamantala si Katrina Halili sa kanyang pagganap na kontrabida. Hindi na siya kaiinisan ng mga viewers. 

Ma-achieve kaya ni Camille Prats ang kontrabida image niya sa MD? ‘Yun ang malaking challenge na kanyang kakaharapin.

Aktor, tumigil na raw sa panliligaw… RELASYONG ALDEN-KATHRYN, BUKING NA PROMO LANG SA MOVIE

ni Erlinda Rapadas @Teka Nga | Feb. 20, 2025

Photo: KathDen - FB

Labis na ikinalungkot ng mga fans nina Kathryn Bernardo at Alden Richards ang balitang tumigil na ang aktor sa panliligaw sa aktres pagkatapos ipalabas ang box office hit movie nilang Hello, Love, Again (HLA). 

Hindi na rin sila madalas na nakikitang magkasama, at wala na rin ang larawan ng KathDen sa social media na magkasama sila sa mga showbiz events. 

It seems may kani-kanyang lakad at plano sa kanilang career sina Kathryn at Alden, kaya naman dismayado ang libu-libong KathDen fans na umasa noon na mauuwi sa totohanang romansa ang tambalang KathDen.

Ganunpaman, may mga nagsasabing tama lang ang ginawa nina Kathryn at Alden. Ayaw nilang paasahin ang KathDen fans, kaya nagpakatotoo sila. Ayaw nilang matulad ang KathDen sa tambalang AlDub na hanggang ngayon ay hindi matanggap ng mga fans na hindi nagkatuluyan sina Maine Mendoza at Alden Richards. 

Iba ang career path na gustong tahakin ni Kathryn Bernardo ngayong 2025, ready na siya sa mas mature role, at hindi na kailangang dumepende sa love team. 

Si Alden Richards naman ay nais pang palawakin ang kanyang kaalaman sa pagpo-produce ng pelikula. At marami pa siyang role na gustong gawin. Pero, ano man daw ang mangyari, ang friendship nila ni Kathryn Bernardo ay hindi magbabago.

---

Matunog ang bali-balitang kapag napatalsik si VP Sara Duterte sa kanyang posisyon, tiyak na ang papalit sa kanya ay ang Senate president na si Chiz Escudero. Ang senador daw ang pinaka-qualified at deserving na humalili kay VP Sara. 

Gayunman, hindi nagpakita ng interes ang mister ni Heart Evangelista sa posisyon ng vice-president. Dapat daw ay bigyan ng parehas na treatment si VP Sara sa impeachment trial na isinusulong ng ilang grupo laban sa pangalawang pangulo. 

Ayon naman sa psychic na si Jovi Vargas, magkakagulo ang buong bansa at may mga rallies na magaganap kapag ipinilit ang impeachment kay VP Sara Duterte.

Magkakaroon ng pagkakawatak-watak sa mga namumuno sa gobyerno. 

Pero, malinaw na nakikita ni Jovi sa kanyang baraha at ganoon din sa vibes na dumarating sa kanya, na posibleng si Sen. Chiz Escudero nga ang pumalit sa puwesto ni VP Sara Duterte.

Let’s see kung magaganap nga ito.

---

MALAKI ang impact sa mga viewers ng campaign ad ni Sen. Lito Lapid na kasama ang sikat at highest-paid actor ngayon sa showbiz na si Coco Martin. 

Marami tuloy ang nagtatanong kung ilang milyon ang ibinayad ni Sen. Lapid kay Coco para sa pag-eendorso sa kanya. 

May ilang netizens naman ang nagsasabing baka “gratis” o libre lang at hindi nagpabayad si Coco dahil magkasama sila ni Sen. Lapid sa Batang Quiapo (BQ) at naging malapit sa isa’t isa. Parang tatay na ang turing ni Coco kay Lapid. 

Posibleng tulong na lang daw ito ng aktor kay Supremo (Sen. Lito) para sa muli nitong pagtakbo sa Senado. 

Milyun-milyon ang nanonood ng BQ sa buong Pilipinas. Markado sa mga viewers ang tandem nina Coco Martin at Lito Lapid sa serye. 

At kahit naka-leave na ngayon sa BQ ang Supremo (dahil sa kanyang muling pagtakbong senador), naaalala pa rin siya ng mga viewers. At plus factor sa kandidatura ni Sen. Lito na siya ay ineendorso ni Coco Martin. 

Malaking boto rin ang maiaambag ng mga fans ni Coco Martin, ganoon din ng mga loyal viewers ng BQ.