Mister, humihirit pa ng anak… BALIK-ACTING NI MARIAN, HINAHARANG NI DINGDONG

ni Erlinda Rapadas @Teka Nga | Mar. 23, 2025

Photo: Dingdong at Marian - IG

Malalaki na ang dalawang anak nina Marian Rivera at Dingdong Dantes na sina Zia at Sixto. Naibigay na ni Marian ang kanyang panahon upang maalagaan at masubaybayan ang paglaki ng dalawa. 

Kaya naman, balak na rin ni Marian na bumalik na sa pag-arte at muling gumawa ng serye sa GMA-7. Na-miss na siya ng kanyang mga tagahanga at gusto nang mapanood siyang muli sa telebisyon. 

Nagpasabi na si Marian sa mga big bosses ng GMA Network na ready na siyang gumawa ng serye sa taong ito. 

Pero, may hirit naman ang kanyang mister na gusto pa nito ng isang anak para raw may makasama-makalaro sina Zia at Sixto.

So, paano na ang planong pagbabalik ni Marian sa telebisyon kung muli siyang magbubuntis? 

Anyway, kung one season lang naman ang seryeng kanyang gagawin, puwede pa siyang mag-taping. At mapagbibigyan pa niya ang hiling ni Dingdong na mag-anak pa sila ng isa.

---

BONGGANG-BONGGA ang ginanap na Bench Body of Work fashion show sa Mall of Asia Arena. Malalaking artista ang rumampa rito sa pangunguna nina Alden Richards, Kathryn Bernardo, Ruru Madrid, Bianca Umali, Sunshine Cruz, Janine Gutierrez, David Licauco, Ina Raymundo, Jake Cuenca, at maging ang SB19 na tinilian ng lahat sa kanilang pagrampa. 

Ang cute namang tingnan nina Ruru Madrid at Bianca Umali na enjoy na enjoy sa kanilang pagpo-pose sa stage. 

Marami rin ang napa-wow sa kurbada ng katawan ngayon ni Kathryn dahil may pa-abs ito. 

Special guests naman sa Bench fashion show sina Lucy Torres at Richard Gomez, ganoon din sina Marian Rivera at Dingdong Dantes na bumati kay Ben Chan sa matagumpay na event. 

Taun-taon ay inaabangan ng lahat ang Bench fashion show dahil sa pagrampa ng mga sikat na celebrities. Hindi pa rin nagpakabog ang mga sexy mommies na sina Sunshine Cruz at Ina Raymundo. Maging ang dating sweet at pa-wholesome na si Kathryn Bernardo ay nakipagsabayan sa mga Bench Beauties sa pagrampa, kaya tuwang-tuwa ang kanyang mga fans.

---

BILANG pagkilala sa kanyang ambag at talento, ang Comedy Genius na si Michael V. ay pinarangalan sa ginanap na 75th anniversary ng GMA Network. 

Bukod sa pagiging Mr. Congeniality, isa rin siya sa mga napiling bigyan ng Kapuso Loyalty Award. 

Mahigit 3 dekada nang naging bahagi ng GMA-7 si Michael V., a.k.a. “Bitoy”. Ilang shows na rin ang ipinagkatiwala sa kanya. 

Ang una at pinakamatagal na show ni Michael V. sa GMA-7 ay ang Bubble Gang (BG) na umere ng mahigit na 3 dekada na. Pinanonood pa rin ito hanggang ngayon. 

Ang sitcom namang Pepito Manaloto (PM) ay 15 years na sa ere at napapanood tuwing Sabado ng gabi. 

Nakaatang sa balikat ni Michael V. ang pag-iisip ng mga bagong ideya para sa PM, kaya hindi ito pinagsasawaang panoorin ng mga viewers.

Nagtampo na nawala ang It's Showtime dahil sa Eat… Bulaga! VICE, TUMANGGING MAG-JUDGE SA PGT DAHIL SA TV5 IPAPALABAS

ni Erlinda Rapadas @Teka Nga | Mar. 22, 2025

Photo: Vice Ganda - IG

Kung si Eugene Domingo ay todo-pasalamat kay Kathryn Bernardo dahil inirekomenda siya bilang isa sa mga judges ng PGT Season 7, may tsika naman na diumano ay inalok si Vice Ganda na maging judge sa PGT pero tinanggihan daw niya ito nang malaman na sa TV5 ipapalabas ang talent show.

May tampo raw sa Kapatid Network si Vice Ganda dahil sa issue noon ng It's Showtime na nawala sa network nang pumasok ang Eat… Bulaga!. 

Nang makipag-usap daw ang pamunuan ng It's Showtime sa TV5 ay sa afternoon slot gustong ilagay ang show bago ang kay Willie Revillame. Kaya, medyo na-hurt daw si Vice Ganda. 

Well, si Eugene Domingo na nga ang ipinalit kay Vice Ganda bilang judge ng PGT.

---

MASAYA at star-studded ang Thanksgiving Party ng GMA Network na dinaluhan ng mga Kapuso stars! Ginanap ito sa Makati Shangri-La at ang theme ng selebrasyon ay Denim and Diamonds. Ito ay bahagi ng pagdiriwang ng 75th anniversary ng GMA Network at pag-alala sa makulay at maningning na kasaysayan ng GMA sa loob ng mahigit pitong dekada.

Sa nasabing event ay pinarangalan din ang ilang Kapuso artists tulad nina Barbie Forteza (Kapuso Female Heartthrob), Alden Richards (Kapuso Male Heartthrob), Marian Rivera (Female Lodi) at Dennis Trillo (Male Lodi).

Sina Jillian Ward (Ms. Congeniality) at Michael V. (Mr. Congeniality) ay tumanggap din ng award. 

Tinanghal naman na Male Star of the Night si Boy Abunda at Female Star of the Night sina Rhian Ramos at Glaiza de Castro.

Ang Kapuso Loyalty Award ay ipinagkaloob naman kina Mel Tiangco, Jessica Soho, Arnold Clavio, Dingdong Dantes, Michael V., Susan  Enriquez at Gabby Eigenmann.

---

NAG-AANYAYA si Ms. Boots Anson-Rodrigo at Rez Cortez sa lahat ng miyembro ng MOWELFUND (Movie Workers Welfare Foundation) upang dumalo at makiisa sa 51st anniversary ng foundation na gaganapin ngayon sa UP Bahay Alumni, 1 to 6 PM. 

Magkakaroon ng munting program at may libreng medical service para sa mga miyembrong dadalo. 

Sina Dingdong Dantes at Alden Richards ay kabilang sa Board of Trustees ng MOWELFUND kaya aktibo sila sa mga fundraising projects ngayon.

Ang MOWELFUND ay pinamumunuan ni Boots bilang chairman at Rez Cortez as president. Kabilang din sa Board of Trustees sina Gina Alajar at Boy Vinarao. 

Isa sa mga projects na pinaghahandaan ngayon ay ang pagkakaroon ng sariling clinic ng Mowelfund.

---

BILANG pagkilala sa kanyang ambag at talento, ang Comedy Genius na si Michael V. ay pinarangalan sa ginanap na 75th anniversary ng GMA Network. 

Bukod sa pagiging Mr. Congeniality, isa rin siya sa mga napili na bigyan ng Kapuso Loyalty Award.

Mahigit tatlong dekada nang naging bahagi ng GMA-7 si Michael V.. Ilang shows na rin ang ipinagkatiwala sa kanya.

Ang una at pinakamatagal na show ni Michael V. sa GMA-7 ay ang Bubble Gang na umeere ng mahigit na tatlong dekada na. Pinanonood pa rin ito hanggang ngayon. 

Ang sitcom namang Pepito Manaloto ay 15 years na sa ere at napapanood tuwing Sabado ng gabi.

Nakaatang sa balikat ni Michael V. ang pag-iisip ng mga bagong ideya para sa Pepito Manaloto. Kaya hindi ito pinagsasawaang panoorin ng mga viewers!

Pamilya, iniwan sa ‘Pinas… ROBIN, NEVER IIWAN SI DIGONG SA NETHERLANDS

ni Erlinda Rapadas @Teka Nga | Mar. 21, 2025

Photo: Robin Padilla - Instagram

Magkakaiba ang reaksiyon ng publiko sa lantarang pagsuporta at pakikisimpatya ni Sen. Robin Padilla kay dating Pangulong Rodrigo Duterte nang ito ay hulihin ng INTERPOL at ibiniyahe papuntang Hague, Netherlands. 

Dito nakatakdang litisin ng ICC ang dating Pangulong Duterte. Maging ang mga fans at supporters ay hindi makapaniwala sa ginawang pagtatanggol ni Sen. Robin kay Digong. 

Naging malapit si Robin kay Duterte noong nakaraang election, kung saan full support ang ibinigay sa kanya ni Digong kaya naging No. 1 senator siya. May utang na loob na tinatanaw si Robin sa dating pangulo, kaya kahit ano pa ang mangyari, at sa kabila ng mga batikos ng nakararami kay Duterte, hindi matatawaran ang loyalty ni Sen. Padilla sa kaibigang ex-president.

Kahit na i-bash pa si Sen. Robin at madamay siya sa galit ng mga anti-Duterte, hindi niya iiwanan sa laban ang dating pangulo.

Well, marami ang nakakaintindi sa sitwasyon ngayon ni Sen. Robin. Malalim ang pinagsamahan nila ng dating pangulo at hindi ito matutumbasan ng anumang halaga. 

Kung durog na durog ang pagkatao ni Duterte sa nakararaming Pinoy, hindi siya basta tatalikuran ni Sen. Robin. Ganoon magpahalaga ng kaibigan ang naturingang Bad Boy ng showbiz.

Ganito rin ang nararamdaman ng aktor na si Phillip Salvador na naging malapit din sa dating Pangulong Duterte. Nabigla siya sa bilis ng mga pangyayari at sa paraan ng paghuli ng INTERPOL kay Duterte.

---

MARAMING viewers ng Eat… Bulaga! (EB!) ang nagtatanong kung babalik pa ba sa show si Atasha Muhlach?

Sa EB! unang nabigyan ng magandang exposure si Atasha. Madali siyang nakagaanan ng loob ng iba pang hosts ng noontime show tulad ng TVJ at nina Allan K., Jose Manalo, Maine Mendoza, Ryzza Mae Dizon, Miles Ocampo, Carren Eistrup, Jose Manalo, Paolo Ballesteros at Wally Bayola. Ang dali niyang makasundo dahil sa kanyang likas na pagiging jologs at masayahin.

Magaling din siyang sumayaw at marunong kumanta. Maging ang mga viewers ng EB! ay natutuwa sa pagiging kalog at kikay ni Atasha. Bumagay sa kanya ang pangalang “Tashing” na tawag sa kanya ng TVJ. 

Marami nang viewers ng EB! ang naghahanap kay Tasha, pero magiging abala na siya ngayon sa paggawa ng pelikula. Siya ang bibida sa Pinoy version ng Thai movie na Bad Genius (BG). Naka-schedule na siyang mag-record ng sarili niyang mga awitin.

---

SA kanilang bagong bahay na tutuloy si Megan Young at ang kanilang baby ni Mikael Daez kapag siya ay nakapanganak na. At excited na sa pag-aayos ng nursery room sina Megan at Mikael. Timing ang pagdating ng kanilang little boy dahil tapos na rin ang kanilang dream house. 

Ilang taon ding pinaghandaan nina Mikael at Megan ang pagkakaroon ng sariling bahay. At makukumpleto na ang kanilang kaligayahan ngayong nabiyayaan na sila ng anak. 

Para kay Megan, fulfilling ang maging isang ganap na ina. Ilang taon ang kanilang hinintay bago dumating ang kanilang little angel, at dumating ang blessing na ito sa kanilang buhay nang pareho na silang handa sa responsibilidad bilang mga magulang.

---

KAABANG-ABANG ang 38th Star Awards for Television na gaganapin sa Dolphy Theater sa Linggo, March 23. 

Bukod sa star-studded ang nasabing event, kumpirmado rin na ang magho-host ng awards night ay sina Alden Richards, Kim Chiu at Piolo Pascual.

Ang Limitless Star na si Julie Anne San Jose ang magbibigay ng bonggang opening number at si Martin Nievera naman ang magbibigay ng special tribute sa yumaong Movie Queen na si Gloria Romero. 

May special number din si Christian Bautista. At sa finale ay kakanta si Jed Madela, kasama ang Eat…Bulaga! (EB!) Singing Queens. 

Sa taong ito, ang napiling German Moreno Power Tandem ay ang BARDA (Barbie Forteza at David Licauco) at ang KIMPAU (Kim Chiu at Paulo Avelino). 

Ang 38th Star Awards for TV ay mula sa direksiyon ni Eric Quizon at produced ng Airtime Marketing.