'Embo barangay', sakop ng Taguig — SC

ni Mylene Alfonso | June 10, 2023

Inalmahan ang paninindigan ni Makati City Mayor Abby Binay na suwayin ang pinal na desisyon ng Korte Suprema at ituloy pa rin ang laban sa territorial dispute sa pagitan ng Taguig City.

Sa viral video ni Binay na kumalat sa social media, sinabi nito na tuloy pa rin ang laban.

“Ang posisyon namin is tuloy ang laban. Naawa ako sa mga anak ko — 'yung mga students, mga anak ko 'yan. Iba 'yung level of investment, I'm not talking about financial, alam ko kasi na hindi kayang ibigay 'yung kalidad na naibibigay ng isang kagaya ng lungsod ng mga Makati sa mga estudyante,” ani Binay sa panayam sa kanya ng mga mamahayag sa pagdalo nito sa CityNet Disaster Cluster seminar.

Kasunod ng pahayag ni Binay ay ang pagkalat naman sa social media ng propaganda na “Makatizens, hindi pa tapos ang laban. Kinausap na ni Mayora si Pres. BBM, ma’am Liza at si Chief Justice. Nangako silang tutulong para mabuksan ulit ang kaso. Tuloy ang laban!

Magugulat na lang ang Taguig. Abangan nila.”

Karamihan sa mga reaksyon sa buksan muli ang Makati-Taguig dispute ay panawagan na respetuhin na lang ang desisyon ng Korte Suprema.

Isa umano sa dahilan kung bakit may ilang tumatanggi na mailipat ang “embo barangay” sa Taguig ay dahil sa nakukuhang benepisyo sa Makati subalit ilang residente ng Taguig ang naglabas din ng saloobin sa social media at nagsabing mas maganda ang pamamalakad sa lilipatang siyudad.

Ang 30 taong territorial dispute sa pagitan ng Makati at Taguig ay tinapos na ang SC sa ipinalabas na resolusyon noong Abril, sa pagresolba ng kaso ay pinaniwalaan at binigyang bigat ng mga mahistrado ng Korte Suprema ang mga ebidensya at argumento na naiharap ng Taguig.

Pinagtibay ng SC sa kanilang ipinalabas na desisyon ang injunction na ipinalabas noon pang 1994 ng Pasig City Regional Trial Court na pumipigil noon pa sa Makati City na angkinin ang Inner Fort Bonifacio na kinabibilangan ng mga barangay ng Pembo, Comembo,Cembo, South Cembo, West Rembo, East Rembo at Pitogo.

Paglilipat ng mga barangay sa Makati pa-Taguig, gawing maayos

ni BRT | May 3, 2023

Umapela si dating Makati Vice Mayor Ernesto Mercado sa lokal na pamahalaan ng Taguig at Makati na magtulungan para magkaroon ng “smooth transition” kaugnay sa naging pinal na desisyon ng Supreme Court (SC) na nagtatakda na ang 729-hectare Fort Bonifacio Military Reservation sa Makati ay nasa hurisdiksyon ng Taguig City.

Nauna nang sinabi ni SC Spokesman Brian Keith Hosaka na bunsod ng ipinalabas na pinal na desisyon ng SC sa land dispute ay hindi na ito tatanggap ng anumang pleadings, motions, letters o anumang komunikasyon patungkol sa nasabing isyu.

Sa naging desisyon ng SC, sinabi nito ang Taguig ang siyang nakakasakop sa kinukuwestiyong teritoryo base na rin sa historical, documentary at testimonial evidence, sakop ng 729 hectare na hurisdiksyon ng Taguig City ang Fort Bonifacio kabilang dito ang Bgy. Pembo, Comembo, Cembo, South Cembo, West Rembo, East Rembo at Pitogo gayundin ang Philippine Army headquarters, Navy installation, Marines’ headquarters, Consular area, JUSMAG area, Heritage Park, Libingan ng mga Bayani, AFP Officers Village at 6 pang villages sa tabi nito.

Nakasaad din sa SC decision na ang Makati City ang magbabayad ng ginastos sa land dispute case.

1 nadale sa gas explosion sa Taguig

ni Ronalyn Seminiano Reonico | August 12, 2021

Nagtamo ng 3rd degree burn ang isang 35-anyos na lalaki matapos sumiklab ang sunog sa MJ Fort Construction sa Bonifacio Global City sa Taguig noong Miyerkules nang gabi, ayon sa Bureau of Fire Protection (BFP).

Ayon sa BFP, kaagad na isinugod sa St. Luke's Medical Center ang biktima.

Bandang alas-7:30 PM tinatayang nagsimula ang sunog at idineklara namang fire out na bandang 9:35 PM.

Saad ni Taguig City Mayor Lino Cayetano, "Initially po, ang inire-report po sa atin ay mukhang noong nagdi-drill po, may tinamaan na gas pipe, so hindi po siya gas leak, gas explosion. May nag-trigger po.

"Habang nagdi-drill, may tinamaan, may naamoy and then later on, noong lumapit ang isang safety officer, doon po nangyari ang explosion.”

Wala naman umanong iba pang establisimyentong nadamay sa sunog.