Scholarship kahit 'di honor student

ni Mylene Alfonso @News | August 24, 2023

Isa ang innovative education program ng Taguig City sa pakikinabangan ng mga estudyante ng EMBO Barangays na parte na rin ng lungsod.

Ayon kay JV Arcena, assistant secretary for special concerns and international press secretariat, kumpara sa Makati City na nag-aalok ng scholarship sa Top 10% lamang ng kanilang estudyante, sa Taguig City ay nag-aalok ng oportunidad sa lahat ng estudyante at hindi hadlang kung anuman ang kanilang academic achievements.

Ang tinutukoy na programa ay ang alok na “flexible” scholarship kung saan nagbibigay ang Taguig LGU ng financial assistance sa mga estudyante na mula P15,000 hanggang P110,000 kada taon, depende sa nais na scholarship ng estudyante.

Isa sa nakinabang sa scholarship ng Taguig ang De La Salle University student na si Briann Sophia Reyes.

Bukod sa libreng uniform at school supplies, nakatatangap pa umano siya ng cash incentive at allowance habang nag-aaral noon sa Cayetano Science High School at ngayong nag-aaral na siya sa DLSU ay patuloy pa rin siyang nakakatanggap ng scholarship allowance mula sa Taguig.

Nilinaw din nito na ang scholarship ng Taguig ay hindi lamang para sa mga nasa Top rank sa klase kundi para sa lahat at walang pinipili.

Paghabol ng Makati sa BGC, nauwi sa pagkawala ng EMBO

ni BRT @News | August 22, 2023

Hindi umano dapat magmatigas bagkus ay tanggapin na ni Makati Mayor Abby Binay ang “unintended consequences” sa territorial dispute sa pagitan ng Taguig lalo pa at ang Makati sa kanyang pamumuno mismo ang nag-akyat ng usapin sa Korte Suprema.

Ayon kay Atty. Darwin Canete, isang prosecutor at blogger, nang iakyat ng Makati City ang kaso sa SC at hingan ang mga mahistrado ng final determination sa isyu ay dapat batid nito na maaari silang matalo o manalo.

Sinabi pa ni Canete na ang paghahabol sa revenue-rich na Bonifacio Global City (BGC) ay pinursige ng Makati Ctiy mula pa noong panahon ni Makati City Mayor Jejomar Binay at Junjun Binay, kaya dapat naging handa na ang lokal na pamahalaan sa pagkakaroon ng pinal na desisyon sa kaso.

Nang hingan ng reaksyon sa naging takbo ng kaso ng territorial dispute sinabi ni Canete na kung siya ang tatanungin ay hindi na lamang sana hinabol ng Makati ang pagmamay-ari ng BGC, sa ganitong paraan ay hindi nawala sa kanila ang EMBO barangays na kilalang balwarte ng mga Binay.

Taguig, nanindigang 'di na kailangan ng Writ of Execution sa 10 barangay

ni Gina Pleñago @News | August 19, 2023

Hindi umano kailangan ng Taguig ang isang writ of execution upang ipatupad ang hurisdiksiyon sa Fort Bonifacio Military Reservation na binubuo ng parcels 3 at 4 ng Psu-2031.

Malinaw umanong nakasaad sa desisyon ng Supreme Court na ang 10 barangay sa Parcels 3 at 4 ay kumpirmado at deklaradong nasa teritoryong sakop ng Taguig, na fibal at executory.

Kaugnay nito, awtomatiko umanong maaalis ang mga nasabing barangay sa teritoryo ng Makati City.

Ikinalat umano ng Makati ang sinasabing “initial assessment” mula sa Office of the Court Administrator (OCA) ng SC na naka-address sa Executive Judge ng RTC Makati kung saan ang opinyon sa "desisyon ng SC" ay mayroong writ of execution bago ang pagdinig sa korteng pinagmulan” na ipatutupad ng DILG.

Binigyang-linaw ng Taguig na ang nasabing opinyon at pahayag ay walang puwersa sa batas at hindi nagbubuklod sa Taguig.