80 pamilya nasunugan sa Malabon City

ni Lolet Abania | May 5, 2022

Umabot sa tinatayang 80 pamilya ang nawalan ng tirahan sa nangyaring sunog sa Malabon City ngayong Huwebes nang madaling-araw.

Batay sa Bureau of Fire Protection (BFP), nasa 25 bahay umano ang natupok matapos na sumiklab ang sunog bandang alas-2:00 ng madaling-araw.

Ayon kay Senior Fire Officer 4 Rizaldy Evangelista, nagsimula ang sunog sa ikalawang palapag ng isang tirahan sa Barangay Catmon, Malabon, habang mabilis na kumalat ang apoy sa mga katabing bahay na pawang mga gawa sa mga plywood at yero.

Sinabi naman ng BFP, walang nai-report na nasawi o nasugatan sa insidente.

Patuloy na inaalam ng mga awtoridad ang naging dahilan ng sunog.

Umakyat sa 2nd alarm... Sunog sa UP Diliman, 8 katao patay

ni Zel Fernandez | May 2, 2022

Walo katao kabilang ang dalawang bata at sanggol ang nasawi matapos sumiklab ang apoy sa residential area sa Village A, Brgy. UP Campus, Diliman, Quezon City ngayong Lunes nang umaga, kung saan ang anim sa walong namatay ay natagpuan umano sa iisang kwarto.

Batay sa ulat, nagsimula ang sunog bago mag-alas- 5:00 nitong umaga, na agarang kumalat sa mga kabahayang pawang gawa sa light materials, kaya agad itong itinaas ng Bureau of Fire Protection (BFP) sa ikalawang alarma.

Pasado alas-6:00 ng umaga nang makontrol ang pagkalat ng apoy at idineklarang naapula ang sunog bandang alas-7:00 ng umaga.

Tinatayang aabot sa kabuuang 250 pamilya ang naapektuhan ng sunog kung saan 80 kabahayan ang naiulat na nasunog.

Kasalukuyan nang iniimbestigahan ng BFP ang sanhi ng sunog, habang tinutukoy pa ang halaga ng mga gamit na nasunog.

15 bahay, nasunog sa Maynila

ni Lolet Abania | September 3, 2020

Sumiklab ang sunog sa isang residential area sa Rizal Avenue, Manila bandang alas-3 ng hapon ngayong Huwebes.

Itinaas sa ikalawang alarma ng Bureau of Fire Protection sa Manila ang sunog na nagsimula sa ikalawang palapag ng residential-commercial building na pag-aari ng isang William Dy sa Quiricada St. Rizal Avenue, Manila.

Ayon sa BFP Manila, nakontrol ang sunog nang alas-4:29 ng hapon. Labinglimang kabahayan ang natupok at 30 pamilya ang naapektuhan. Umabot sa P500,000 ang halaga ng napinsala.

Gayunman, walang naitalang nasaktan sa sunog. Patuloy na inaalam ng mga awtoridad ang pinagmulan ng apoy.