Mga magulang nasa trabaho... Edad 2, 4 at 7, patay sa sunog

ni Sarah Munoz (OJT) @News | September 5, 2026

Photo: BFP mandaluyong Circulated

Nasawi ang tatlong bata matapos masunog ang isang bahay sa Brgy. Addition Hills, Mandaluyong City, Huwebes ng gabi, Setyembre 3.

Alas-7:30 ng gabi nang i-report ang sunog, na agad namang tinugunan ng mga bumbero kasama ang ilang residente.

Magkapatid na edad 2 at 4 ang hindi nakalabas sa kuwarto sa ikaapat na palapag ng bahay at kalaunan ay natagpuang wala nang buhay.

Samantala, nakalabas pa ng bahay ang 7-anyos nilang kamag-anak ngunit hindi rin nakaligtas matapos dalhin sa ospital.

Napag-alamang nasa trabaho ang mga magulang ng magkapatid na biktima.

Hindi na umabot sa mga katabing bahay ang apoy matapos itong maapula ng mga rumespondeng bumbero at tumulong na residente.

Tinatayang P200,000 ang halaga ng mga nasirang ari-arian dahil sa insidente.

Patuloy namang inaalam ng BFP kung saan nagsimula ang apoy at kung ano ang sanhi ng sunog.

Kasabay nito, nagpaalala ang mga awtoridad sa mga magulang at guardian na huwag iwanang mag-isa ang maliliit na bata at ilayo sa maabot na mga bagay na madaling magliyab upang maiwasan ang mga katulad na insidente.

Magkayakap kasama ang alagang aso... Mag-utol na 7 at 11, dedo sa sunog

ni Mai Ancheta @News | August 29, 2026

Photo: Brgy. Barcenaga, Naujan, Oriental Mindoro - Circulated

Patay ang magkapatid na edad 7 at 11, matapos masunog ang kanilang bahay nitong Huwebes ng gabi sa Brgy. Barcenaga, Naujan, Oriental Mindoro.

Yakap pa ng magkapatid ang kanilang alagang aso nang matagpuan ang labi matapos maapula ang apoy.

Sugatan naman ang lolo ng magkapatid matapos makatalon sa bintana sa kasagsagan ng sunog.

Nabatid na wala sa bahay ang tiyahin at tiyuhin ng magkapatid, kasama ang apat na anak at tanging sila lamang ng kanilang lolo ang naiwan.

Nasa ibang bansa ang ina ng magkapatid na biktima habang dalawang taon nang patay ang kanilang ama.

Iniimbestigahan kung may foul play sa insidente, bukod sa tinitingnan din ang posibilidad na nagsimula ang apoy sa extension wire kung saan nakasaksak ang isang clip fan.

9 natusta sa hotel

ni Justine Berganio @Overseas News | August 20, 2026

Photo: Sunog sa isang budget hotel sa central Kolkata, India - India Global Review

Patay ang siyam na katao, kabilang ang isang bata, matapos sumiklab ang sunog sa isang budget hotel sa central Kolkata, India, madaling-araw nitong Miyerkules.

Alas-2:50 ng madaling-araw nagsimula ang sunog sa ikalawang palapag ng hotel. Agad namang rumesponde ang mga bumbero at naapula ang apoy makalipas ang halos isang oras.

Tinatayang 30 katao ang ligtas na nailikas sa gusali, habang siyam pa ang isinugod sa ospital. Ayon sa mga awtoridad, kabilang sa mga nasawi ay anim na lalaki, dalawang babae at isang bata.

Posibleng electrical short circuit ang pinagmulan ng sunog, habang iniimbestigahan pa ang eksaktong dahilan. May paunang ulat din na maaaring sumabog ang air-conditioning unit ng hotel at nagsimula ang apoy.

Mabilis kumalat ang makapal na usok sa gusali at ilan sa mga biktima ay natagpuan sa loob ng mga banyo, ayon sa fire services director ng West Bengal.

May mga ulat na ilan sa mga nasawi ay mga Bangladeshi na nagtungo sa Kolkata para magpagamot. Gayunman, sinabi ng pulisya na hindi pa kumpirmado ang nationality ng mga biktima.

Nasa masikip na bahagi ng central Kolkata ang hotel, na kilala sa murang accommodation at mga restaurant.