Hihigpit na ang karera sa round 2 ng UAAP Basketball

ni Anthony E. Servinio @Sports | October 25, 2023

Mga laro ngayong Miyerkules – MOA

11 a.m. UST vs. DLSU

1 p.m. NU vs. UE

4 p.m. Ateneo vs. FEU

6 p.m. UP vs. Adamson

Panahon na para magseryoso sa pagbubukas ng Round 2 ng 86th UAAP Men’s Basketball Tournament ngayong Miyerkules sa MOA Arena. Lalong humigpit ang karera at kahit sino sa walong paaralan ay may pag-asa sa korona.

Matapos mabahiran ang perpektong kartada, sisikaping bumangon ng University of the Philippines (6-1) laban sa Adamson University (3-4) sa tampok na laro ng 6 p.m. Tumikim ang Maroons ng 89-99 overtime talo sa Ateneo de Manila University noong Linggo at naputol ang anim na sunod na tagumpay.

Bubuksan ang araw ng isang ganadong University of Santo Tomas (1-6) kontra sa De La Salle University (4-3). Mataas ang kumpiyansa ng Tigers matapos wakasan ang 19 sunod na talo laban sa Far Eastern University, 68-62, salamat sa husay nina Nic Cabanero at Christian Manaytay.

Nananatiling mabigat na kalaban ang Green Archers hanggang nasa kanila sina forward Kevin Quiambao at guwardiya Evan Nelle na lumabas na numero uno at pangatlo sa karera ng Most Valuable Player sa pagsara ng Round 1. Nasa gitna nila si Season 85 MVP Malick Diouf ng UP habang hinahabol sila nina Rey Remogat ng University of the East at LJ Gonzales ng FEU.

Susubukan ni Remogat at sentro Precious Momowei na buhatin ang UE (2-5) laban sa pumapangalawang National University (5-2) sa 1 p.m. Aabangan ang bantayan ni Gonzales at kanyang katapat sa Bulldogs na si Kean Baclaan.

Malaking hamon din ang naghihintay kay Gonzales sa tapatan ng kanyang Tamaraws (2-5) at Ateneo (4-3) sa 4 p.m. Magiging sukatan ng tagumpay ng Blue Eagles ang ipapakita ni forward Kai Ballungay.

Centeno world champion sa Women's 10-Ball Austria

ni Eddie M. Paez, Jr. @Sports | October 24, 2023

Pumasok sa kasaysayan si Chezka Centeno nang akyatin ng Pinay ang trono ng 2023 World Women's 10-Ball Championships sa Sportpark ng Klagenfurt, Austria noong Linggo ng gabi (oras sa Europa).

Ito na ang pang-apat na pagkakataon na isang lady cue artist mula sa Pilipinas ay naging world champion. Noong 2009 naging reyna ng 10-ball sa buong mundo si Rubilen Amit. Inulit ito ng Cebuana makalipas ang apat na taon. Pumasok sa eksena si "The Flash" Centeno nang tanghalin siyang World 9-Ball Girls champion taong 2015.

Ang koronang napagwagian ng pambato ng Zamboanga na nagkakahalaga ng $50,000 ay pumutol din sa pagkauhaw ng bansa sa indibidwal na korona sa pandaigdigang arena na tumagal na ng anim na taon. Noong 2017, nanalo si Carlo Biado sa World Games at World 9-Ball Championships.

Sa Rehiyon ng Carinthia sa Austria, lumutang ang tatag ng pulso at pusong palaban ng Pinay nang balewalain ni Centeno ang makikinang na rekord ng mga nakalaban sa torneo katulad nina Han Yu (China, 9-4), Allison Fisher (Great Britain, 7-4 at 9-8) at Chieh Yu Chou (Taiwan, 9-2).

Sa finals ng paligsahang may basbas na World Pool Billiards Association o WPA, dalawang matinding kikig (4-1 at 3-1) kontra kay Yuang tumapos sa kampeonatong paghahangad sa 10-ball. Ang Intsik ay isang 3-time world 9-ball queen.

Tatlong beses na ring nagreyna sa 9-ball si Fisher at nakita ang pamatay na porma nito sa semis laban kay Centeno. Pero mas mabangis ang pagsargo ng Pinay dahil nakabalikwas ito sa isang 4-8 na hukay.

Hindi rin nagpakaldag si Centeno kay Chou nang magkaharap sila at inilampaso ng Pinay ang 2022 World 10-Ball titlist at WPA no. 1.

Sa pangwakas na seremonya, habang nakabalabal ang bandila ng Pilipinas sa kanya, hindi napigilang mapaiyak sa tuwa ng bagong kampeon mula sa bansa.

Manila Int'l Marathon babalik sa Pebrero 2024

ni Anthony E. Servinio @Sports | October 24, 2023

Magbabalik ang isa sa pinamakasaysayang karera sa Pilipinas, ang "Manila International Marathon: Run For Awareness", sa Pebrero 24, 2024. Asahan ang isang mabilis at kalidad na takbuhan sa patag na daan na magsisimula at magtatapos sa Rizal Park at iikot din sa mga lungsod ng Pasay, Paranaque at Makati.

Ayon kay race organizer Dino Jose sa kanyang panayam sa BULGAR Sports Beat podcast, espesyal ang parating na karera at bahagi ng malilikom na pondo ay mapupunta sa mga sundalo na nakadestino sa BRP Sierra Madre sa Ayungin Shoal sa West Philippine Sea. May nakalaan din na tulong para sa Philippine Coast Guard.

Upang maangat ang kalidad, makakalahok ng libre ang mga mananakbong may patunay na umoras sila na hindi lalampas ng 2:35:00 at may diskwento ang mga may oras na mas mababa sa tatlong oras. Ito ay limitado sa unang 200 lamang.

Maliban sa Marathon, may mga karera din sa 21, 10 at limang kilometro. Ginaganap na ang pagpapalista online sa manilamarathon.com hanggang Pebrero 21, 2024 o umabot ng 5,000 kalahok kung ano man ang mauna.

Lahat ng mga magtatapos ng ay tatanggap ng medalya, t-shirt at regalo mula sa mga sponsor. Ang mga kampeon ng kalalakihan at kababaihan ay kakatawanin ang Pilipinas sa Taiwan International Marathon sa Nobyembre, 2024.

Ang 1982 Manila International Marathon ang unang karerang Pinoy na kinilala ng AIMS, ang samahan ng mga malalaking patakbo sa buong mundo. Noong taon na iyon, nagkampeon si 1976 at 1980 Olympic gold medalist Waldemar Cierpinski ng Silangang Alemanya sa oras na 2:14:27 na hanggang ngayon ay ang pinakamabilis na Marathon na itinakbo sa Pilipinas.

Nais ni Jose at kanyang mga kasama Manuel Oyao at Race Director Red Dumuk na mabuhay muli ang sigla ng takbuhan gaya noong simula ng Dekada 80. Ang tatlo ay may malawak na karanasan sa pag-organisa ng mga karera noong panahon na iyon at handang gamitin ito upang hubugin ang bagong henerasyon.