Resbak ng mga tsuper sa pangakong napako.. SONA ni P-BBM, 3 araw tigil-pasada!

ni Mai Ancheta @News | July 13, 2023

Tatapatan ng tatlong araw na tigil-pasada ng ilang transport groups ang ikalawang State of the Nation Address (SONA) ni Pangulong Ferdinand Marcos, Jr. sa July 24.

Ito ang inianunsiyo ng grupong Malayang Alyansa ng Bus Employees at Laborers (MANIBELA).

Ayon kay Mar Valbuena, ang tatlong araw na tigil-pasada ay sisimulan sa July 24, 25 at 26 na dadaluhan ng kanilang mga miyembro mula sa Metro Manila, Calabarzon at Central Luzon.

Sinabi ni Valbuena na ito ang paraan nila para iparating kay Marcos ang hinaing ng kanilang sektor at mariing pagtutol sa PUV Modernization Program ng gobyerno.

Nababagalan aniya sila sa aksiyon ng Land Transportation Franchising and Regulatory Board (LTFRB) sa ipinangakong rerebyuhin ang franchising guidelines pero hanggang ngayon ay wala pa ring resulta.

"Hanggang ngayon naka-hang pa rin po tayo, pagdating doon sa mga ipinangako sa atin na rerebyuhin po 'yung franchising guidelines, hanggang ngayon nakatiwangwang ito," ani Valbuena.

Marami aniyang ibang grupo ang nagpahayag ng intensiyon na sumama sa tatlong araw na tigil-pasada.

Ang grupo ni Valbuena ay mayroong tatlong libong miyembro sa buong bansa.

Ipinangakong pabahay, edukasyon, pagkain, etc.. Mga nagawa, ipapakita ko sa SONA — P-BBM

ni Mylene Alfonso | June 10, 2023

Tiwala si Pangulong Ferdinand Marcos, Jr., na mayroon siyang maipakikita sa publiko sa kanyang ikalawang State of the Nation Address sa Hulyo 24.

Sinabi ni Marcos na ipakikita niya sa taumbayan ang update sa mga plano at mga proyekto na kanyang ipinangako sa kanyang SONA noong nakalipas na taon.

"Like any SONA, it will be a report to the nation as to what the situation has happened in the last year, in the last SONA, where we are now, what we have managed to do and where we still have work to do. That is essentially the template that we are going to use," wika ni Marcos.

"So, the things that I mentioned in the first SONA, we will have a look and see ano na ang nangyari doon sa mga pinag-usapan noong unang SONA. Sa palagay ko naman, mayroon naman tayong papakita and that's what the content of the SONA I think that will probably be," ayon pa sa Pangulo.

Matatandaang sa unang SONA ng Punong Ehekutibo, ipinangako niya ang food security, pabahay, agrikultura, imprastraktura, turismo at edukasyon at iba pa.

Nagbigay din ng mas malinaw na direksyon sa kanyang mga pangako sa kampanya ang kanyang talumpati na tumagal ng isang oras at 14 minuto.

Gumewang sa SONA habang naglalakad P-Duterte, nadulas lang, walang sakit – Roque

ni Lolet Abania | July 27, 2021

Tiniyak ng Malacañang na walang dapat ikabahala ang publiko sa kalusugan ni Pangulong Rodrigo Duterte matapos maiulat na nawalan ito ng balanse nang naglalakad na papasok ng podium kahapon para ibigay ang kanyang ikaanim at huling State of the Nation Address (SONA).

“I don’t think it’s anything to worry about kung ang iniisip ng taumbayan ay ang kanyang kalusugan,” ani Presidential Spokesperson Harry Roque sa isang interview ngayong Martes. “Parang nadulas lang siya kahapon,” dagdag ng kalihim.

Ayon kay Roque, ang 76-anyos na si Pangulong Duterte sa kabila ng pagiging isang senior citizen ay wala namang “ekstraordinaryong problema.” “Alam n’yo, wala naman po siyang extraordinary na problema. He is who he is, he is a senior citizen, at mukhang nadulas lang naman siya kahapon,” sabi ni Roque.

Samantala, isa sa mga nabanggit ni Pangulong Duterte sa kanyang 3-oras na SONA kahapon ay hindi na niya kayang i-pronounce nang tama ang mga salita sa inihandang speech at nagbirong baka tinamaan ng COVID-19.

Tinanong din ng Punong Ehekutibo kung mayroong ambulansiya na nakaantabay sa kanya. Marami sa mga nasa loob mismo ng plenary sa Batasang Pambansa Session Hall ay natawa sa naging pahayag ng pangulo. Gayunman, nakumpleto na ang two-dose ng COVID-19 vaccines at fully vaccinated na si Pangulong Duterte noon pang Hulyo 12.