‘Di alam kung saan napunta ang mana… Ampon, hirap sa kalagayan at gusto nang maglayas

ni Sister Isabel del Mundo @Mga Kuwento ng Buhay at Pag-ibig | May 22, 2023

Dear Sister Isabel,

Isa akong ampon, ang kumupkop sa akin ay isang mayaman at matandang dalaga na nagtatrabaho sa abroad. Iniwan niya ako sa kanyang kamag-anak na siyang nag-alaga at nagpalaki sa akin.

Bumalik dito sa ‘Pinas ‘yung umampon sa akin, isasama niya sana ko sa America ngunit ‘di pumayag ‘yung nagpalaki sa akin. Kaya hindi na ito nagpumilit pa, at kalaunan ay namatay rin ito sa abroad. May mamanahin sana ko bilang adopted pero hindi ko alam kung saan napunta, bata pa kasi ako noon. Samantala, 32-anyos na ko ngayon.

Nakita ko na lamang sa cabinet namin ang dati kong birth certificate at natuklasan kong binago pala nila ang pangalan ko.

Ang problema ko ay pinagmamalupitan nila ako, binubugbog kahit kaunting pagkakamali.

Gusto ko nang lumayas ngunit wala naman akong matutuluyan. Hirap na ako sa kalagayan ko ngayon. Tumanda na ako rito sa nag-alaga sa akin.

Ano kaya ang gagawin ko para matakasan itong nararanasan ko?

Nagpapasalamat,

Lorna ng Masbate

Sa iyo, Lorna,

Makabubuting huwag mo ng isiping tumakas d’yan. Sa halip, gawin mo ay tulungan mo sila sa inyong pang-araw-araw na gastos. Tamad ka siguro kaya sila gano’n sa iyo.

Maging masipag ka, dahil hindi sila magiging salbahe sa iyo kung ikaw mismo ay mabait, maalalahanin at matulungin.

Kung iniisip mong lumayas d’yan ay lalo ka lang mapapahamak. Pagtiisan mo na lang ang buhay mo r’yan. Natitiyak kong diringgin ng Diyos ang dasal mo, maawain ang Diyos sa tulad mong ampon. Gayundin, may magandang bukas na naghihintay sa iyo kung magiging mabait ka, hindi ka pababayaan ng Diyos, simula ngayon ay maging madasalin at palasimba ka. Tiyak na makikita mo ang malaking pagbabago sa iyong buhay at baka makumbinsi mo pa sila na maging madasalin at palasimba rin. Pagpapalain ka at sana maging maayos na ang pagtrato nila sa iyo.

Sumasaiyo,

Sister Isabel del Mundo

Single mom, utusan na lamang ng kanyang anak

ni Sister Isabel del Mundo @Mga Kuwento ng Buhay at Pag-ibig | May 17, 2023

Dear Sister Isabel,

Thirty-five yrs. old pa lang ay biyuda na ako, at ang aking mga anak ay maliliit pa. Ang panganay ko ay 5-anyos, ‘yung pangalawa ko naman ay 4-anyos, habang 1 yr. old naman ang aking bunso. Ginapang ko sila sa kahirapan upang ‘di nila maramdaman na mayroong kulang. Ngunit nang sila’y tumanda, para bang nagbago ang ihip ng hangin.

Ang aking panganay ay ginagawa na lamang akong utusan, habang ‘yung pangalawa ko naman ay nasa abroad, bagama’t malaki ang kanyang suweldo, kapiranggot naman ang ipinadadala sa akin at may maririnig ka pang masasakit na salita. Samantala, ang aking bunso ay mayroong matatag na trabaho bilang engineer, ngunit mula nang mag-asawa ito ay ‘di na ko inaabutan. Nagbibigay lang siya sa kanyang biyenan dahil ito umano ang nag-aalaga sa kanilang anak. Alagaan ko raw ang anak niya upang pasuwelduhin niya ako.

Sister, matanda na ko, ngunit gagawin pa niya akong tagapag-alaga ng anak niya, kahit kung tutuusin ay gradweyt na ako sa ganyang bagay dahil sila mismo ay inalagaan ko.

Nakakasama ng loob, nais kong ipagsigawan na may magulang pa sila na dapat mahalin, respetuhin, at paglingkuran. Hindi ko alam kung bakit ganito ang trato nila sa akin.

Ang sakit, Sister Isabel, paano ako makakapag-adjust sa ganitong sitwasyon? Hirap na ang kalooban ko, at ‘di ko alam kung hanggang kailan ko matitiis ang ganitong sitwasyon.

Sana ay mapagaan niyo ang loob ko sa pamamagitan ng iyong payo upang maibsan ang kalungkutang nararamdaman ko.

Nagpapasalamat,

Emma ng Daet, Camarines Sur

Sa iyo, Emma,

Nakakalungkot nga ang dinaranas mo. Gayunman, magpasalamat ka pa rin sa Poong Maykapal dahil malusog ka at walang karamdaman.

Tanggapin mo na lang sa iyong kalooban na lahat ng taong nabubuhay sa mundo ay may problema at patay lang ang walang problema. Alalahanin mo na buhay ka pa at nakikitira sa mundong ito, mabuti ka, ganyan lang ang problema mo at ‘di tulad ng iba na sadyang napakabigat ng dinadala.

Gayunman, ikaw ang gumawa ng paraan upang pasayahin ang iyong sarili. Bumarkada ka sa mga taong masayahin, palasimba at may positibong pananaw sa buhay. Libangin mo ang iyong sarili at higit sa lahat, idulog mo sa Diyos ang iyong mga hinaing at pinagdaraanan.

Mahal ng Diyos ang mga biyuda, at isa na ko roon. Biyuda rin ako, pero magaan kong hinaharap ang lahat ng problema ko, maliit man o malaki ‘yan dahil alam kong ito’y pagsubok lamang.

Ganyan tayo kamahal ng Diyos kaya ‘wag ka nang malungkot. Laging tandaan, life is what we make it. Ikaw ang gagawa ng paraan upang mapaganda ang iyong buhay.

Sumasaiyo,

Sister Isabel del Mundo

Mister nasa abroad kay kerida nagsusustento, ‘di sa tunay na asawa’t anak

ni Sister Isabel del Mundo @Mga Kuwento ng Buhay at Pag-ibig | May 15, 2023

Dear Sister Isabel,

Ang problema ko ay ang asawa kong sumakabilang bahay. Ang kabit niya ay ‘yung dati niyang classmate at nagsasama na sila ngayon. Bagama’t kasal kami at may dalawang anak, natigil ang pagsusustento niya. Wala akong hanapbuhay dahil may iniinda akong sakit sa katawan.

Samantala, nag-aaral pa ang mga anak namin at halos wala na akong maipabaon sa kanila. Mabuti na lang, tinutulungan ako ng mga kapatid ko.

Ano ang dapat kong gawin upang sagutin niya ang pag-aaral ng mga anak namin?

Ayaw ko ng away kaya kahit puwede ko silang kasuhan ay hindi ko ginawa.

Nabalitaan ko na nakaalis na siya at nagtatrabaho na sa abroad, kaya kung gugustuhin niya ay puwede niya kaming sustentuhan kahit may iba na siyang kinakasama.

Sana ay mapayuhan niyo ako. Umaasa ako sa inyong tugon sa lalong madaling panahon.

Nagpapasalamat,

Bernadette ng Pampanga

Sa iyo, Bernadette,

Pangkaraniwan na sa panahon ngayon ang problemang idinulog mo sa akin.

Gayunman, puwede mong isumbong ang asawa mo sa Department of Labor and Employment o Philippine Overseas Employment Administration (POEA), sila mismo ang makikipag-usap sa asawa mo na nasa abroad. Puwede nilang kausapin ang agency ng asawa mo at sabihin na sa iyo i-remit ang suweldo at hindi sa kabit niya. Magpakita ka lamang ng dokumento na magpapatunay na ikaw ang tunay na asawa. Gayundin, dalhin mo ang marriage contact upang maobliga ang asawa mo na sustentuhan kayong mag-iina dahil kung hindi, mawawalan siya ng trabaho sa abroad at makakasuhan pa siya ng pakikiapid.

Kung ayaw kang pansinin ng POEA o iba pang ahensya ng pamahalaan o napakabagal umaksyon, lumapit ka kay Sen. Raffy Tulfo, marami na itong natulungan gaya ng iyong problema, mabilis siyang umaksyon, at agad na aaksyunan ang mga problemang idinudulog sa kanya. Gawin mo na agad ang payo ko upang gumaan ang problemang dinadala mo.

Sumasaiyo,

Sister Isabel del Mundo