Nanlalamig na mister, buking na silahis at may bf

ni Sister Isabel del Mundo @Mga Kuwento ng Buhay at Pag-ibig | May 31, 2023

Dear Sister Isabel,

Gusto kong magpatulong sa inyo tungkol sa asawa ko na nanlalamig na sa akin.

Limang taon pa lang kaming nagsasama, at mayroon kaming dalawang anak.

Nagtatanong-tanong ako sa mga kasamahan niya kung may babae ba ito pero lahat sila pare-pareho ang sinasabi, wala umanong babae ang asawa ko. Akala nga raw nila ay bakla, dahil hindi ito mahilig sa babae.

Ang sabi ko naman ay lalaking-lalaki ang asawa ko. Hanggang sa natuklasan ko na may karelasyon pala siyang lalaki, silahis pala ang asawa ko. Mahusay siyang magtago ng pagiging dual personality niya.

Samantala, mas binibigyan niya ng atensyon ang kanyang karelasyon. Pakiramdam ko ay mas masaya siya sa lalaking iyon. Gusto ko na siyang hiwalayan ngunit hindi ko kayang tanggapin na may iba na siyang mahal.

Sistrer Isabel, tama ba ang iniisip ko na hiwalayan siya?

Nagpapasalamat

Evelyn ng Parañaque.

Sa iyo, Evelyn,

Kung hindi ka na maligaya sa piling niya at hindi mo matanggap ang natuklasan mo na may karelasyon siyang lalake, tama lang na hiwalayan mo na siya pero siguraduhin mo lang na kahit hiwalay na kayo, tutulungan ka niyang suportahan ang mga anak niyo.

Mahirap naman kasi kung pakikisamahan mo pa rin siya sa kabila ng panlalamig niya sa iyo.

Sa palagay ko ay hinihintay niya lang na ikaw mismo ang makipaghiwalay. Ganyan talaga ang buhay dumarating sa punto na kailangan ng mga pagbabago. Walang permanente sa mundo.

Lahat ay dadaan at lilipas. Harapin mo na lang ng maluwag sa iyong kalooban ang naging pasya mo. May awa ang Diyos, kaya mo ‘yan. Sumaiyo nawa ang pagpapala ng Diyos na Lumikha.

Sumasaiyo,

Sister Isabel del Mundo

Tibo, buking ni bff na iba na ang yakap at halik

ni Sister Isabel del Mundo @Mga Kuwento ng Buhay at Pag-ibig | May 29, 2023

Dear Sister Isabel,

Nais ko sana humingi ng advice sa iyo, Sister. Umiibig kasi ako sa kapwa ko babae. Oo, isa akong tomboy, ngunit hindi ito halata dahil maganda at sexy ako tingnan. May pagnanasa ako sa childhood friend ko, lagi kaming magkasama sa lahat ng okasyon.

Noong una ay akala niya bilang kaibigan lang ang pagyakap at halik ko sa kanya ngunit kalaunan ay nahalata niya rin na iba na ang higpit ng yakap at halik ko sa kanya. Umiwas at lumayo siya sa akin, dahil hindi niya ito nagustuhan. Nasaktan ako sa ginagawa niyang pag-iwas. Mahal ko siya, at ayokong tuluyan siyang lumayo sa akin.

Ano rapat kong gawin? Sana ay mapayuhan niyo ako upang gumaan ang loob ko.

Nagpapasalamat,

Betsai ng Laguna

Sa iyo, Betsai,

Ang pinakamaganda mong gawin ay tanggapin sa iyong kalooban na ‘di ka gusto ng

babaeng napupusuan mo. Mahirap ipilit mo ang sarili sa taong kailan man ay ‘di ka magugustuhan. ‘Ika nga, supilin mo ang iyong nararamdaman sa kanya. Humanap ka na lang ng ibang iibigin. Sa umpisa ay masakit na layuan siya at ibaling sa iba ang iyong pagtingin pero habang lumilipas ang mga araw, matatanggap mo rin na hindi siya ang tinadhana para sa iyo.

Naniniwala akong matatagpuan mo rin ang katapat mo na makakasama at kaagapay mo habambuhay. Hintayin mo na lamang ang araw na iyon. Ang pagibig ay hindi hinahanap, ito ay kusang dumarating sa takdang panahon. Kaya, ‘wag ka ng malungkot.

Mag-move on ka na at harapin ang panibagong bukas.

Sumasaiyo,

Sister Isabel del Mundo

Imbyerna sa ka-church na chismosa at inggitera

ni Sister Isabel del Mundo @Mga Kuwento ng Buhay at Pag-ibig | May 24, 2023

Dear Sister Isabel,

Ang problema ko ay inggit na inggit sa akin ang aking kapitbahay. Magkasama kami sa aming parokya at ‘pag kaharap mo ito akala mo’y santa, napakabait sa akin, ngunit ‘pag talikod ko ay puro paninira na ang ginagawa sa akin.

Magkasama rin kami sa Sub-Parish, sa tuwing ina-assign ko siya na mag-serve, hindi siya nakikiisa. Ang katuwiran niya ‘pag tinatanong siya ng mga kasamahan namin ay ayaw daw namin sa kanya. Buong akala ng kasamahan namin ako ang may pangit na ugali. Taong simbahan pa naman ito ngunit kaaway at ‘di niya kasundo ang lahat. Ano kaya ang maaari kong gawin upang ‘di na ito mainggit sa akin at tigilan na ang paninira sa akin? Ayoko itong kausapin dahil baka lalo lang lumala.

Nagpapasalamat,

Pinky ng Pila Laguna

Sa iyo, Pinky,

Natural na sa atin ang magkaroon ng kaaway. Ang pinakamaganda gawin ay huwag mo na lang itong pansinin. Hayaan mong mamatay siya sa inggit. Ipagpatuloy mo ang mga gawaing nakaatang sa iyong balikat na ikabubuti ng iyong kapwa lalo na ang mga gawain mo sa simbahan. Nakikita ng Diyos ang mga nagaganap sa mundong ating ginagalawan. Siya na ang bahala sa kapitbahay mo. Makikita mo patuloy naaagos sa iyo ang mga biyaya at pagpapala.

Sa kabilang dako, makikita mo kung paano ang mga taong inggitera, naninira sa kapwa, hindi kailanman umaasenso. Patuloy na nasasadlak sa kahirapan hanggang magising sila sa katotohanan at baguhin ang kanilang ugali at pananaw.

Isama mo lagi sa iyong dasal na hipuin ng Diyos ang kapitbahay mong ito. Isang araw, magugulat ka na lang dahil malaki na ang pinagbago niya. Hindi na inggitera at tumigil na rin sa paninira.

Sumasaiyo,

Sister Isabel del Mundo