Mga payo para ‘di tumandang dalaga, alamin!

ni Sister Isabel del Mundo - @Mga kuwento ng buhay at pag-ibig | July 3, 2023

Dear Sister Isabel,

Magandang araw sa inyo r’yan sa Bulgar.

Nag-iisa na lang ako sa buhay, ulila na akong lubos. May trabaho naman ako sa awa ng Diyos. Ang problema ko ay lagi na lang akong bigo sa pag-ibig. Tumatanda na ako at nangangarap di naman akong makatagpo ng totoong magmamahal sa akin, ngunit sadyang ‘di ko ito matagpuan. 35-years-old na ako at hanggang ngayon ay dalaga pa rin.

Sadya kayang nakatadhana akong maging dalaga habambuhay? Kung sa bagay medyo may pagkapihikan ako at walang tiwala sa mga lalaki. Selosa rin ako. Gayunman, gusto ko na mag-asawa na makakasama ko habambuhay.

Sa palagay niyo ba makakatagpo pa rin ba ako ng aking katapat?

Nagpapasalamat,

Gloria ng Taguig Global City

Sa iyo, Gloria,

Ang pag-ibig ay hindi hinahanap, kusa 'yang dumarating sa takdang panahon.

Naniniwala akong darating din ang katapat mo. Makakapag-asawa ka at magiging maligaya sa pag-ibig lalo na kung hindi ka magiging pihikan at selosa.

Maging simple ka lang, totoo sa iyong sarili, iwasan maging perfectionist. Huwag mong hangarin na lahat ng gusto mo sa isang lalaki ay matatagpuan mo. Hingin mo rin ang patnubay ng Diyos Amang kataastaasan, upang bigyan ka na ng makakasama mo habambuhay. Walang imposible sa Diyos. Manalig ka sa kanya at ikaw ay kanyang pagbibigyan sa lahat ng iyong kahilingan.

Sumasaiyo,

Sister Isabel del Mundo

Misis na hirap mag-budget, problemado dahil laging inaaway ng seaman na mister

ni Sister Isabel del Mundo - @Mga kuwento ng buhay at pag-ibig | June 28, 2023

Dear Sister Isabel,

Ang problemang isasangguni ko sa inyo ay tungkol sa pinapadalang pera sa akin ng husband ko na nagtatrabaho sa barko. Seaman siya, ngunit hindi ito nagkakasya sa araw-araw na panggastos, kasama ang tatlo naming anak na pawang nag-aaral pa.

Lagi niya akong hinahanapan ng pera. Bakit daw ako kinakapos, ang laki na nga raw nang pinapadala niya.

Para sa kanya malaki na ang naipapadala niya pero hindi talaga ito kasya. Kulang na kulang ito lalo na’t lahat ng anak namin ay nag-aaral. Sobrang dami school project.

Ang mamahal pa ng mga materyales na dapat bilhin kaya hindi ko ito maipagkasya.

Kapag nagpapaliwanag ako ay ‘di siya naniniwala kung bakit kapus ang pinapadala niya. Sa totoo lang, ang pinakamagastos na yugto ng buhay ng mag-asawa ay ang magpaaral lalo na kung sabay-sabay gaya ng mga anak namin.

Bakit kaya hindi maisip ng asawa ko ‘yan. Napakagastos magpaaral, sumasakit na ang ulo ko sa pagba-budget. Madalas na akong sumpungin ng migraine.

Ano kaya ang marapat kong gawin para maunawaan ng asawa ko ang sitwasyon namin dito ng mga anak niya. Kahit anong gawin kong paliwanag ay ayaw niyang tanggapin.

Sana ay matulungan niyo ako sa dapat kong gawin para maintindihan ito ng asawa ko. Umaasa akong matutulungan niyo ako.

Nagpapasalamat,

Brenda ng Lipa, Batangas

Sa iyo, Brenda,

Pagpasensyahan mo na lang ang asawa mo, unawain at lawakan mo na lang ang isipan mo kapag sinesermunan ka niya.

Sobrang hirap din siguro ng kalagayan niya ro’n sa barko. Hindi masosolusyunan ‘yan kung kayo ay mag-aaway at laging nagtatalo sa mga pang-araw-araw na gastos ng pamilya niyo.

Ipagdasal mo na lamang ang asawa mo. Humingi ka ng tulong sa Diyos, upang mahawakan niya ang puso’t isipan ng asawa mo para hindi ka laging hinahanapan ng pera. Makapangyarihan ang dasal. Sama-sama kayong magdasal ng mga anak mo para gumaan ang pang-araw-araw na suliranin sa inyo. Makikita mo, gagaan at luluwag ang kalooban mo sa susunod na mga araw.

Walang imposible sa Diyos. Manalig at manampalataya ka sa kanya. Tiyak na malulutas na ang iyong pasanin. Mag-isip ka rin ng pagkakakitaan na may maliit na puhunan, upang sagayun matuwa ang asawa mo at hindi na laging magtatanong sa pinagkakagastusan mo. Hanggang dito na lang, nawa’y gumaan ang iyong pakiramdam sa mga payo ko.

Sumasaiyo,

Sister Isabel del Mundo

Misis nag-invest, mister na OFW wa’ malay na ipong pera na-scam, simot!

ni Sister Isabel del Mundo - @Mga kuwento ng buhay at pag-ibig | June 26, 2023

Dear Sister Isabel,

Shout out sa inyong lahat d’yan sa Bulgar.

Akala ko ay kaya kong sarilihin ang problema ko pero hindi pala. Ang sikip sa dibdib at parang sasabog ang ulo ko, dahil Sister Isabel, na-scam ako, hindi pa ito alam ng asawa ko na nagtatrabaho sa abroad. Umabot na sa million ang na-scam sa akin.

Hindi ‘ko agad ito nahalata, dahil noong una ay ayos naman ang narereceived kong commission, ngunit sa umpisa lang pala ‘yun. Noong tumagal ay ‘di na ako nakakatanggap ng mga share ko sa transaction namin ng kadeal ko. Hanggang tuluyan na siyang naglaho. Hindi ko na siya macontact, gulung-gulo na ang isip ko kung paano ko ito sasabihin sa asawa ko.

Panigurado ay magagalit siya, dahil nagastos ko lahat ng aming naipon. Buti na lang ay nasa abroad siya, kung hindi ay baka nasaktan niya ko at maaaring hiwalayan niya rin ako. Malapit na siyang umuwi rito sa Pilipinas.

Ano kaya ang magandang diskarte para ipagtapat ko sa asawa ko na hindi siya mabibigla at magagalit ng husto dahil sa aking kapabayaan. Nawa’y matulungan niyo ako.

Nagpapasalamat,

Veronica

Sa iyo, Veronica,

Iyan na nga ba ang ibig sabihin ng kasabihang “Ang maghangad ng kagitna, isang salop ang mawawala.”

Sa kagustuhan mong madoble ang ipon niyo, na-scam ka tuloy. Nawa’y matuto ka na sa susunod. Maging leksyon nawa sa iyo ang sinapit mo. Huwag basta-basta kakagat sa patibong ng mga scammer.

Ganyan talaga sila sa umpisa maganda pero habang tumatagal lalabas na ang katotohanang biktima ka pala ng kanilang scam.

Ang pinakamaganda mong gawin kapag dumating ang asawa mo ay huwag mo itong biglain. Hinay-hinayin mo lang siya at pakiramdaman mo ang kanyang mood. Kapag sa palagay mong puwede mo nang ipagtapat ang problema mo, gawin mo na gamit ang malumanay na pananalita. Kung maaari ay magdasal ka muna ng taimtim sa kuwarto mo. Humingi ka ng patnubay sa langit na samahan ka habang kinakausap mo ang asawa mo upang magabayan ka nito kung paano mo ito ipapaliwanag sa asawa mo.

Sa sandaling malaman na niya ang katotohanan na naubos ang naipon niyo dahil nabiktima ka ng scammer.

Kaya mo yan, matatanggap ng asawa mo ang mga pangyayari. Mananaig pa rin sa kanya ang pagmamahal sa inyo na hindi niya hahayaang mawasak dahil lamang sa pera.

Pera lang ‘yan, maibabalik din. Ang mahalaga, nar’yan pa rin ang pagmamahalan at pagkakasundu-sundo ng bawat isa. Lakip ko ang dalangin na hawakan ng Diyos ang iyong puso’t kalooban habang kinakausap mo ang iyong asawa tungkol sa problema niyo. Hanggang dito na lang, alalahanin mo ang bawat problema ay may kalutasan.

Walang permanente sa mundo, lahat ay dadaan at lilipas.

Sumasaiyo,

Sister Isabel del Mundo