Labs pa rin si ex, ‘di makakatuluyan; momshi, dapat nang mag-move on

ni Sister Isabel del Mundo - @Mga kuwento ng buhay at pag-ibig | July 26, 2023

Dear Sister Isabel,

Sa kabila ng nagdaan kahirapan ngayon ay maginhawa na ang aking pamumuhay, kaya lang ay mahirap at malungkot pala ang mag-isa.

55-anyos na ako pero mukha palang akong 35-anyos. May kani-kanyang pamilya na ang mga anak ko, at nag-iisa na lang ako rito sa bahay na pinundar ng aking anak na nagtatrabaho sa abroad.

Buhay mayaman ako rito pero na-realized ko na hindi pala kayang paligayahin ng pera ang tao. May boyfriend ako sa abroad na balak pumunta rito. Sa totoo lang ay mas mahal ko ‘yung dating boyfriend ko rito sa Pilipinas kaya lang ay may asawa na siya.

Iniwasan ko siya kahit na alam kong mahal niya pa rin ako.

At ngayon ay biyudo na siya, natuwa ako dahil akala ko ay babalikan niya na ako, at itutuloy na namin ang aming naudlot na pagmamahalan, pero mali ako, hindi na niya ‘ko binalikan.

Nagkita kami sa isang pagtitipon, nagkatinginan, nagkangitian, at ramdam ko na mahal niya pa rin ako.

Bakit kaya ayaw niya akong ligawan? Isang Baranggay lang ang aming tinutuluyan kaya 'di maalis sa aking isipan ang aming nakaraan.

Ano kaya ang dapat kong gawin para magkabalikan kami? Sa pagkakaalam ko ay wala naman siyang karelasyon ngayon. Malayang-malaya siya, ngunit nahihiya ako mag-first move dahil babae ako.

Nagpapasalamat,

Laura ng Pampanga

Sa iyo, Laura,

Edad lang ang tumatanda, at hindi ang puso. Hindi ako magtataka kung sa edad mo na ‘yan, feeling inlove ka pa rin sa dati mong boyfriend na iniwasan mo dahil may asawa na pero biyudo na ngayon.

Ramdam mo tuloy ang pangungulila sa mga sandaling ika’y nag-iisa. Ang sabi mo ay nagkita kayong muli, nagkatinginan, nagkangitian, at ramdam mo na mahal ka pa rin niya. Samakatuwid, malaki ang pag-asa mo na magkabalikan kayong muli at ituloy ang naudlot n’yong pag-ibig.

Sa palagay ko’y tuma-timing lamang siya. Naghihintay ng tamang pagkakataon para muli kayong magkabalikan. Iniisip din siguro niya hindi na kayo bata.

Malamang ay maligaya na siya sa mga apo niya at kuntento na rin sa kanyang buhay kahit wala ng karelasyon.

Gayunman, makiramdam ka na lang sa susunod na mga araw, kung talagang wala ng pag-asang ibalik ang nakaraan na kung saan mahal n’yo pa ang isa’t isa, mag-move on ka na at maging masaya sa piling ng mga anak at apo mo na may kani-kanya ng pamilya.

Panigurado ay namimiss ka rin nila at dadalawin ka nila r'yan sa bahay mo.

Alalahanin mo, sa edad mo na ‘yan, mas makakabuting hindi ka na maghangad pa ng karelasyon. Baka makabigat lang ‘yan sa buhay mo. Maging masaya ka na lang sa mga anak at apo mo.

Sumasaiyo,

Sister Isabel del Mundo

Akala'y prince charming na… Dalaga, lalong minalas sa lalaking napusuan

ni Sister Isabel del Mundo - @Mga kuwento ng buhay at pag-ibig | July 22, 2023

Dear Sister Isabel,

Tindera ako ng gulay sa palengke, bata palang ako ito na ang aking hanapbuhay. Ang hindi ko maintindihan Sister Isabel, kung bakit parang madamot sa akin ang tadhana.

Walang katapusan ang problema ko. Akala ko ay matatapos na ang pasanin ko sa buhay ng matagpuan ko ang lalaking nagpatibok ng puso ko, 'yun pala ay lalo lang akong masasadlak sa problema.

Lalo akong nabaon sa utang. Kailan kaya ako mahahango sa ganitong kalagayan?

Parang wala na akong karapatang lumigaya at yumaman.

Ano sa palagay n'yo Sister Isabel, ang dapat kong gawin para masagap ko ang magandang kapalaran? 'Yung tipong hindi na ko luluha kailanman. Yung tipong mahahango na ako sa kahirapan.

Hanga ako sa mga payo n'yo sa lahat ng sumasangguni sa inyo kaya naisipan kong dumulog sa inyo. Ipagdasal n'yo ako na matapos na ang mga problemang aking dinadala na para bang pasan ko ang mundo.

Nagpapasalamat, Dolores ng Tondo

Sa iyo, Dolores,

Maraming salamat sa pagsangguni mo sa akin. Nakakataba ng puso na marinig sa iyo na malaki ang tiwala mo sa akin na mabibigyan kita ng kaukulang payo sa problema mo.

Lagi mong isipin, ang buhay sa mundo ay sadyang ganyan. Lahat ay dumadaan sa matinding problema. Patay lang ang walang problema. Buhay ka pa at may posibilidad pa na ma-enjoy mo ang iyong buhay dito sa mundong ibabaw.

Mamuhay ka ng naaayon sa kalooban ng Diyos. Tahakin mo ang tamang landas. Pulutin ang mabuti, at ang masama'y iwaksi. Kung susunod ka ng walang alinlangan sa mabuting asal, walang dahilan upang hindi ka gantimpalaan ng Diyos.

Marahil ay kulang ka sa dasal. Marahil ay hindi ka lang nagsisimba kahit minsan man lang sa iyong buhay. Marahil ay hindi ka rin nagdarasal bago matulog. At marahil ay bilang tindera sa palengke, hindi mo rin maiwasan makipagtsismisan. Gawin mong sentro ng buhay mo ang Diyos Ama sa langit. Natitiyak kong pagpapalain at giginhawa ka. At kung puwede ibahin mo na ang tinda mo. Mas maigi pa siguro kung fishball, kikiam, kwek-kwek at iba pang street foods.

Pumuwesto ka r'yan sa harap ng bahay n'yo. Maging positibo ka, iwasan mong pumasok sa iyong isipan ang mga negatibong bagay.

Diskarte, kasipagan, kabutihan ng puso at kalooban ang kailangan mo upang magtuluy-tuloy ang iyong pag-asenso. Higit sa lahat panalangin at pagdarasal sa Diyos na siyang nagbibigay ng grasya at pagpapala sa mga taong kanyang kinalulugdan dito sa lupa. Nawa'y nasiyahan ka sa aking payo. Gawin mo na ito agad. Sumaiyo nawa ang walang hanggang pagpapala at mga biyaya ng Diyos.

Sumasaiyo, Sister Isabel del Mundo

Mister na nag-o-overtime umano, buking ni misis sa pagsisinungaling

ni Sister Isabel del Mundo - @Mga kuwento ng buhay at pag-ibig | July 18, 2023

Dear Sister Isabel,

Magandang araw sa inyong lahat d'yan sa Bulgar, gayundin sa mga mahal n'yo sa buhay.

Hindi na sana ako dudulog sa inyo tungkol sa problema ko. Akala ko kasi kayang-kaya ko itong lutasin ngunit hindi pala. Sa palagay ko ay kayo lang ang makapagbibigay sa akin ng tamang payo.

Ang problema ko ay ang asawa ko. Dati ang bait-bait niya at lahat na yata ng mabuting ugali ay nasa kanya pero nitong mga huling araw, napansin ko na hatinggabi na siya kung umuwi.

Sabi niya ay nag-overtime raw siya pero 'di niya alam ay natanong ko na 'yun sa katrabaho niya kung totoo ba ito, pero ang sabi ng workmate niya ay hindi umano ito totoo. Bukod doon ay laging mainit ang ulo niya, nakasigaw lagi kahit wala namang dahilan. Napakalaki ng pinagbago niya hanggang sa umiiyak na ako sa aking altar habang nagdarasal. Kinausap ko ang Diyos Ama sa langit. Tinanong ko kung bakit biglang nagbago ang asawa ko, at 'di ko napigil ang aking sarili, sinumbatan ko ang Diyos at sinabi ko na "You choose for me the wrong man". Nasabi ko ito dahil bago ko siya makilala ay taimtim kong hinihiling sa Diyos na bigyan ako ng lalaking makakasama ko habambuhay na isang responsableng asawa't ama ng magiging anak namin, habang nagdarasal ako sa altar. Nagulat ako, dinig na dinig ko sumagot sa akin ang Diyos. Sinabi niya "Lahat ng hiniling mo ay ipinagkaloob ko pero hindi mo 'ko pinagbigyan sa hiniling ko sa iyo". Nagulat ako sa narinig ko. Bigla kong naalala, nagpunta nga pala sa bahay namin 'yung midwife na nagpaanak sa panganay ko.

Humihingi siya ng replika ng Mahal na poong Nazareno na ayon sa kanya ay inutusan siya ng Diyos na pumunta sa akin. Ilalagay umano niya sa salas ng kanyang bahay, habang nanggagamot siya. May healing power kasi ang midwife ko. At 'yun nga ang mensahe ng Diyos sa kanya. Nanginginig pa raw siya habang naririnig niya ang tinig ng Diyos Ama sa langit habang sinasabi ang mensahe sa kanya. Hindi ko pinaniniwalaan ang midwife sa kuwento niya.

Hindi ko siya pinagbigyan sa kanyang kahilingan na bigyan siya ng replika ng Nazareno.

Naisip ko na 'yun ang dahilan kung bakit pumangit ang buhay ko, nagbago ang ugali ng asawa ko na dating mabuting asawa ngayon ay hindi na. Humingi ako ng tawad sa Diyos sa hindi ko pagtugon sa utos niya at pagwawalang bahala sa kahilingan ng aking midwife.

Kinabukasan, agad akong bumili ng replika ng mahal na poong Nazareno, binigay ko agad ito sa aking midwife. Noon ko naisip, hindi lamang pala tayong mga tao ang humihiling ng pabor sa Diyos.

Ang Diyos ay hihiling din ng pabor sa atin para sa ikakabuti ng mga nilalang niya sa mundo at ito ay hindi natin dapat ipagwalang bahala. Dapat sundin agad ng walang pasubali.

Nagpapasalamat,

Norma ng Bulacan

Sa iyo, Norma,

Maraming salamat sa kuwento ng buhay mo na ibinahagi mo rito sa column ko.

Minsan pa napatunayan mo na ang Diyos ay hindi natutulog. Nakatunghay siya sa bawat nilalang niya na dumaranas ng matinding pagsubok na sandaling kanyang malagpasan, naghihintay sa kanya ay pagpapala at kapanatagan sa buhay. Napatunayan din natin na hindi lang pala ang tao ang humihingi ng pabor sa Diyos. Ang Diyos man ay kumakatok din sa ating puso, may hihilingin sa atin para sa ikabubuti ng ating kapwa, para akayin sa kabutihan ang masasama, para ipalaganap ang kapangyarihan ng Diyos na kahit 'di natin nakikita pero nadarama natin ang kanyang presensya sa pamamagitan ng kanyang replika. Tunay ngang kahanga-hanga ang kuwento ng buhay mo.

Muli maraming salamat. Patuloy ka nawa'y pagpalain ng Diyos sa pang-araw-araw mong pamumuhay.

Sumasaiyo,

Sister Isabel del Mundo