Labs pa rin si ex kahit may asawa’t anak na, kelot, dapat nang mag-move on

ni Sister Isabel del Mundo - @Mga kuwento ng buhay at pag-ibig |September 18, 2023

Dear Sister Isabel,

Shout out sa inyo r’yan sa Bulgar, nalulungkot ako kapag ‘di ko nakikita ang column n’yo, ito na kasi ang inaabangan ko araw-araw.

Ang kuwento ng buhay at pag-ibig ko ay ganito, masakit pa rin sa akin ang nangyari sa amin ng ex-girlfriend ko. Halos limang taon ang relasyon namin at nagre-ready na rin kami nu’n para sa aming kasal, nang bigla siyang magpakasal sa ibang lalaki.

Hanggang ngayon, dala-dala ko pa rin ang kabiguan, kahit na isang taon na rin ang nakakalipas, at may mga anak na rin siya. Napakasakit pa rin sa akin, hindi ko alam kung paano ako makaka-move on. Nawalan tuloy ako ng ganang makipagkaibigan sa mga babae.

Feel ko tuloy ginagawa lang nilang laruan ang pakikipagrelasyon. Naging woman hater tuloy ako, paano ko kaya matatakasan ang ganitong sitwasyon? Dahil hanggang ngayon, aminado akong mahal ko pa rin ang ex-girlfriend ko.

Ano ang dapat kong gawin Sister Isabel, para makalimutan ko na siya? Hihintayin ko ang payo n’yo.

Nagpapasalamat,

Gilbert ng Makati

Sa iyo, Gilbert,

Salamat sa tiwalang binigay mo sa akin upang mapayuhan ka sa kasalukuyan mong problema.

Ang pag-ibig ay puwede mong maramdaman hindi lang sa isang tao, dahil puwede mong mahalin ang sinuman. Hindi porke nagka-girlfriend ka ng halos limang taon, siya na mismo ang mapapangasawa mo. Hindi ganyan ang buhay, kung sino ang itinakda sa iyo ng Diyos, ‘yun ang makakatuluyan mo kahit na 1 buwan mo palang siyang nakikilala.

‘Yun ang tinatawag na destiny, kung sino nakatakdang makakatuluyan mo, darating at darating ‘yan sa takdang panahon. Tinakda ito ng tadhana kaya tanggapin mo na maluwag sa iyong kalooban, hindi ang ex-gf mo ang destiny mo, dahil may inilaan sa iyo ang tadhana na siyang makakasundo at mamahalin mo habambuhay.

Maaaring iniligtas ka lang ng Diyos sa babaeng ‘yun dahil alam niya na hindi ka liligaya sa kanya kung kayo na ang magkakatuluyan.

Bibigyan ka ng Diyos ng ka-swak mo, na kung saan magiging maligaya ka sa piling ng inyong mga anak. Pero, kung ‘di ka pa maka-move on, hindi pa ibibigay ni Lord ang katapat mo. Kaya kung ako sa iyo, mag-move on ka na. Limutin mo na ang malungkot mong nakaraan.

Walang mabuting idudulot kung lagi kang nakabaon sa nakaraan. Limutin mo na siya, sapagkat, habang nakabaon ka sa malungkot na bahagi ng iyong nakaraan, hindi mo pa rin masasagap ang paparating na suwerte na matagal ng nakalaan sa iyo.

Pero, once na maka-move on ka na, darating na rin ang itinakdang babae para sa iyo.

Hanggang dito na lang. Hangad ko ang iyong kaligayahan sa susunod na mga araw.

Sumasaiyo,

Sister Isabel del Mundo

16-anyos na gusto mamasukan bilang katulong… Suko na sa pag-aalaga ng mga nakababatang kapatid

ni Sister Isabel del Mundo - @Mga kuwento ng buhay at pag-ibig |September 13, 2023

Dear Sister Isabel,

Gusto kong humingi ng payo sa inyo, hirap na hirap na kasi ako sa kalagayan ko rito sa amin. Panganay ako at anim kaming magkakapatid.

Taun-taon ay nabubuntis ang mama ko. Bilang panganay, ako ang nag-aalaga sa mga kapatid ko. Tumigil na ako sa pag-aaral dahil hindi na kami kayang pag-aralin lahat ng tatay ko, tricycle driver ang trabaho niya habang ang nanay ko naman ay labandera, napakabata ko pa para gampanan ang mga gawain dito sa bahay na dapat ang nanay ko ang gumagawa.

Dahil sa pag-aalaga ko sa mga nakakabata kong kapatid, ang laki na tuloy ng pinayat ko na para bang hindi ako nagkakakain. Mainit pa ang ulo sa akin ni nanay at ako pa ang palagi niyang pinagbubuntungan.

Bakit kaya sila anak nang anak ng tatay ko, eh ‘di naman nila kami kayang buhayin ng maayos at pag-aralin? Madalas kong tinatanong ang sarili ko sa mga bagay na ‘yan.

Ako tuloy ang nahihirapan, minsan naisip kong lumayas na lang, at mamasukan bilang katulong upang umasenso, at makapag-aral naman ako. Kaysa matali ako rito sa bahay, gawing katulong, at umaktong nanay sa edad na 16-anyos.

Ano kaya ang dapat kong gawin? Umaasa ako sa inyong payo, hihintayin kong ma-publish itong isinangguni ko sa inyo sa lalong madaling panahon.

Nagpapasalamat, Mildred ng Malabon

Sa iyo, Mildred,

Maraming salamat sa pagsangguni mo sa akin tungkol sa problema mo. Napakahirap talaga ng kalagayan mo ngayon, subalit kung iisipin mo pamilya mo lang din naman ang pinagsisilbihan mo. Alalahanin mo, mahal ng Diyos ang mga anak na nagsisilbi sa kanilang magulang.

Pagpapalain at hindi ka niya pababayaan, pagpasensyahan mo na muna ang tatay at nanay mo.

Batid kong iniisip din nila ang hirap na dinaranas mo. Malay mo, isang araw ay kausapin ka ng nanay mo at sabihin na maaari mo nang ipagpatuloy ang naudlot mong pag-aaral, dahil may sapat na silang naipon ng tatay mo para ikaw naman ang pag-aralin. At siya na ang mag-aasikaso sa bahay n’yo. Huwag kang mawalan ng pag-asa at higit sa lahat kumapit ka sa Diyos, dahil nakakatiyak ako na hindi ka niya pababayaan.

Tungkol naman sa tanong mo, bakit anak nang anak ang magulang mo at hindi naman nila kayo kayang buhayin at pag-aralin? Malalaman mo rin ang sagot d’yan, kapag nag-asawa ka na, mare-realize mo rin ang hirap. ‘Yan ang isang bagay na mahirap ipaliwanag sa buhay ng isang mag-asawa na tanging Diyos lamang ang maaaring magbuo ng bata sa kanilang pagtatalik sapagkat ang batang ‘yun ay anak ng Diyos.

Ang mga batang nabubuo sa sinapupunan ng isang ina ay “children of God”. May papel na gagampanan sa mundo for the glory of God. Kaya napakalaking kasalanan kung magpapa-abort ang isang babae, mortal sin ‘yan at hindi kalugud-lugod sa mata ng Diyos. May purpose ang Diyos sa bawat batang isinisilang at nabubuo sa sinapupunan ng isang ina.

Sana ay maunawaan mo ito. Kaya, huwag kang malungkot, dahil may magandang plano para sa iyo ang Diyos.

Sumasaiyo, Sister Isabel del Mundo

Madir na may dyowang bagets… Anak, problemado sa pangmamanyak ng stepdad

ni Sister Isabel del Mundo - @Mga kuwento ng buhay at pag-ibig |September 11, 2023

Dear Sister Isabel,

Biyuda na ang mama ko, at isang taon pa lang ang nakakalipas ay nag-asawa na muli siya. Bata pa ang napangasawa niya ngayon, at halos kasing edad ko lang. 28-years-old na ako habang si mama ay 42-years-old.

Dito na sa amin nakatira ang pangalawa niyang asawa na walang trabaho, pinag-aaral siya ng mama ko, at malapit na siyang grumadweyt.

Pogi at masarap kausap ‘yung stepdad ko, malambing at maalalahanin din, kaya siguro na-inlove agad ang mama ko sa kanya.

Kaya lang, mula nu’ng tumira siya rito sa amin, nahahalata ko na panay ang titig niya sa akin. Napansin ko na parang may pagnanasa siya sa akin lalo na ‘pag kaming dalawa lang ang tao sa bahay, kung kaya’t nagkukulong na lang sa kwarto, pero hanggang kailan ko ito gagawin? Laging wala si mama dahil manager siya ng isang malaking kumpanya, kailangan niya laging pumasok sa trabaho.

Malapit na rin akong makagradweyt sa kurso ko at balak kong magtrabaho agad para hindi na ko uuwi rito sa bahay. Magbo-board na lang ako para maiwasan ko ‘yung stepdad ko na halos araw-araw ay ramdam ko ang matinding pagnanasa niya sa akin sa pamamagitan ng mga malisyoso niyang tingin at panghihipo na kunwari ay ‘di niya sinasadya.

Tama ba ang gagawin ko, Sister Isabel? Hihintayin ko ang payo n’yo.

Nagpapasalamat,

Lorna ng Pampanga

Sa iyo, Lorna,

Maraming salamat sa pagsubaybay mo sa column ko. Tanging hangad at layunin ko ay makatulong sa inyo sa pamamagitan ng makabuluhang payo sa inyong problema.

Tama ka sa gagawin mo, makakabuting magboard ka na lang kapag naka-graduate ka na at nakatagpo ng magandang trabaho. Marapat lamang na iwasan mo ang stepdad mo bago mahuli ang lahat.

Ikaw na ang bahalang magpaliwanag sa mama mo, sa paraang hindi niya malalaman ang tunay na dahilan. Kung sasabihin mo ang tunay na dahilan sa kanya, malamang ay ‘di siya maniwala sa iyo.

Sa palagay ko naman ay papayag ang mama mo na magbukod ka na, lalo na’t alam niya rin namang kaya mo na ang iyong sarili. At palagay ko rin ay matutuwa siya dahil wala na magiging sagabal sa kanila ng bago niyang boyfriend. Nawa’y gumaan ang iyong pakiramdam sa sandaling mabasa mo ang payo ko.

Sumasaiyo,

Sister Isabel del Mundo