‘Di pinaniniwalaan ng ina… Dalaga, gusto nang lumayas dahil sa pambababoy ng stepdad

ni Sister Isabel del Mundo - @Mga kuwento ng buhay at pag-ibig |September 29, 2023

Dear Sister Isabel,

Nabiyuda ang nanay ko sa edad na 35-anyos. 4 years pa lang silang nagsasama noon ng tatay ko nang biglang maaksidente ito.

Wala pang isang taon na namatay ang tatay ko, napansin ko na parang may kapalit na agad siya sa puso ng aking ina at hindi nga ako nagkamali, dahil noong babang luksa ng tatay ko, sa amin na tumira ang lalaking pinalit ng nanay ko.

Ang problema ko, Sister Isabel, ay palagi siyang nakatingin sa akin. At sa tuwing lumalapit siya, masyado niyang dinidikit ang katawan niya sa akin. Hindi ito nahahalata ng nanay ko dahil lagi siyang wala sa bahay. Nagtitinda siya ng mga prutas sa palengke. Hanggang isang araw bigla na lang pinasok ng stepdad ko ‘yung kwarto ko. Pinagtangkaan niya akong halayin, hindi ako nakasigaw dahil tinalian niya ko sa bibig hanggang sa tuluyan niya nang nakuha ang pagkababae ko.

Ni-rape niya ako at binantaan na ‘wag na ‘wag umano ako magsusumbong lalo na sa aking ina, dahil papatayin umano niya kaming lahat.

Napilitan akong manahimik pansamantala, pero nang magkaroon ako ng pagkakataon, pinagtapat ko ito sa aking ina. Ang pinagtataka ko, hindi niya ako pinaniwalaan.

Ang sama ng loob ko, Sister Isabel, dahil mas pinaniniwalaan pa niya ‘yung gumahasa sa akin.

Ngayon, nagbabalak akong lumayas. Tama ba ang gagawin ko? Nawa’y mapayuhan n’yo ‘ko sa dapat kong gawin. Hihintayin ko ang payo n’yo.

Nagpapasalamat,

Bernadette ng Malolos, Bulacan

Sa iyo, Bernadette,

Huwag mo nang patagalin pa ang problema mo. Ngayon din ay umalis ka na sa bahay n’yo, lalo na’t ayaw ka namang paniwalaan ng nanay mo. Lumapit ka sa tita mo at sabihin mo ang lahat ng nangyari. Natitiyak kong hindi ka niya pababayaan. Tutulungan at poprotektahan ka niya laban sa stepdad mo.

Malamang kasuhan pa niya ang kinakasama ng nanay mo. Ang mahalaga, ‘di na maulit ang panghahalay niya sa iyo. Mabuti na lang at hindi ka niya nabuntis.

Kumilos ka na agad, umalis ka na r’yan at humingi ka ng tulong sa tita mo. Umaasa akong malulutas na ang problema mo. Lagi kang tumawag sa Diyos. Mahalaga ang pagiging madasalin sa buhay ng isang kagaya mo. Pagpalain ka nawa ng Panginoon.

Sumasaiyo,

Sister Isabel del Mundo

Babae, asar sa ka-church na napakatigas ng ulo

ni Sister Isabel del Mundo - @Mga kuwento ng buhay at pag-ibig |September 25, 2023

Dear Sister Isabel,

Nawa’y nasa maayos kayong kalagayan gayundin ang mga mahal n’yo sa buhay.

Malapit kami sa Sub-Parish, kaya ako ang napili nilang maging pangulo at maging caretaker na rin ng chapel.

Maayos naman ang pangangasiwa at pamumuno ko, maliban na lang sa isa kong member na napakatigas ng ulo. Hindi niya ako sinusunod, at sarili niya ang iniisip niya. Gayunman, pinagtiyagaan ko pa rin ang posisyon ko. Kung mayroon silang mga pagkakamali,

pinapayuhan ko sila. Ang iba ay naiinis sa akin dahil sa ugali kong ‘yun. Ang sa akin lang naman, kung may pagkakamali ka, dapat ‘yun malaman ng kinauukulan upang maituwid ka.

‘Ika nga ng pari sa amin, “Kung hindi mo itatama ang mali ng isang taong nakagawa ng kamalian, ikaw ay magkakasala ng sin of omission.” Kaya, isa ako sa mga pumupuna at nagtutuwid sa mga member ko rito sa Sub-Parish.

Ang nangyari, nagpalitan na ng pamunuan, at hindi na ako ang pangulo. Pero, ‘yung bagong nahalal, mga tauhan ko rin na naging mga member niya. Ako lang ang pinalitan, nasaktan ako kaya gusto kong dumistansya sa kanila lalo na sa isang member na simula’t sapul ay hindi ako sinusunod. Maski ugnayan namin sa ibang bagay ay wawakasan ko na, mapasimbahan man o tahanan. Magkapitbahay lang kami, nawawala kasi ako sa mood kapag nakikita ko ang taong ito. Tama ba iniisip ko?

Nawa’y mapayuhan n’yo ko.

Nagpapasalamat,

Lolit ng Pampanga

Sa iyo, Lolit,

Sadyang ganyan ang buhay, may kani-kanyang ugali, prinsipyo, at pamantayan sa buhay. Kung ano ang tingin mong ikakagaan ng kalooban mo, ‘yun ang gawin mo.

Huwag mong masyadong damdamin ‘yun pagkawala mo sa puwesto. Magpasalamat ka na lang, dahil nahango ka na sa malaking responsibilidad.

Huwag ka rin magdamdam kung ikaw lang ang napalitan. Tapos na ang termino mo, magpasalamat ka na lang sa Diyos, dahil wala ka na gaanong poproblemahin.

Tanggapin mo na lang ito maluwag sa iyong kalooban. Lahat ay dadaan at lilipas. Walang permanente sa mundo, at wala kang dapat ikahiya dahil maganda naman ang performance mo noong panahong nanunungkulan ka pa.

Ang gawin mo ngayon ay mag-relax, magsaya, mamuhay ng tahimik at payapa sa piling ng iyong pamilya. Iyan ang gusto ng Diyos sa iyo, upang mas sumaya, pumayapa, at maging panatag ang iyong pamumuhay. ‘Yun bang wala kang stress na mararamdaman.

Pagdasal mo na lang ang bagong pangulong pumalit sa iyo, nawa’y maging maka-Diyos, makatao, at walang ibang iniisip kundi ang ikakabuti ng inyong Sub-Parish na dati mong pinamunuan. Sumaiyo nawa ang pagpapala ng Diyos na Dakila.

Sumasaiyo,

Sister Isabel del Mundo

Akala siya lang ang pinakasalan… Misis, nagulat sa biglang pagsulpot ni No.1

ni Sister Isabel del Mundo - @Mga kuwento ng buhay at pag-ibig |September 20, 2023

Dear Sister Isabel,

Magandang buhay sa inyong lahat d’yan. Bihira lang akong bumili ng dyaryo dati. Pero, nu’ng nabasa ko ‘yung column n’yo, nagka-interest ako dahil ramdam na ramdam ko ‘yung payo na binibigay n’yo sa problemang isinangguni nila sa inyo.

Nakaka-relate ako dahil sa katunayan, ako ‘yung tipo ng tao na hindi nawawalan ng problema, ‘yun bang sunud-sunod at patung-patong na problema ang lagi kong nararanasan. Ewan ko ba, pinaglihi yata ako sa sama ng loob. Pero, heto ‘yung pinakamabigat sa lahat.

Almost 3 years na kaming nagsasama ng asawa ko, masaya naman ang aming relasyon at may dalawa kaming anak, isang babae at isang lalaki. Nang biglang may umeksenang babae sa bahay namin at nagpakilalang tunay na asawa raw siya ng mister ko. Nagulat ako dahil kasal din kami ng husband ko. Paanong nangyaring may tunay pala siyang asawa? At nauna pa siyang pakasalan kaysa sa akin?

Nagkataong dumating din ang asawa ko galing trabaho, maski siya ay nagulat din sa biglaang pagsulpot ng babaeng ‘yun. Hindi na nakapagsinungaling pa ang mister ko at inamin rin niya ang katotohanan. Iyak ako nang iyak, hindi ko alam ang gagawin.

Pinakalma ako ng asawa ko at sinabing mas mahal niya kami kaysa sa una niyang asawa, at wala umano silang anak nu'n.

Magpa-file umano ito ng demanda. Pero, okey lang daw ‘yun, dahil maikli lang naman ang sentensya kung itutuloy niya ito. ‘Wag daw akong mabahala dahil malaki ang laban ng mister ko. ‘Yun pala ay may ibang lalaki rin ang dati niyang asawa. Noon pa man daw ay pinagtataksilan na siya nito kaya nagpasya siyang hiwalayan ito at humanap ng matinong babae na makakasama niya habambuhay.

Gayunman, hindi pa rin mapanatag ang isip ko. Hindi ako makakain at nalulungkot ako.

Ano kaya ang gagawin ko? Patuloy ko pa bang pakikisamahan ‘yung husband ko, kahit na hindi pala ako ang una niyang pinakasalan? Sana ay mapayuhan n’yo ko sa kung ano ang dapat kong gawin.

Nagpapasalamat,

Imelda ng Silang, Cavite

Sa iyo, Imelda,

Ang sabi mo ay mahal ka naman ng asawa mo, at mas mahal niya kayo kaysa sa una niyang asawa. Ang mahalaga ay nagmamahalan kayo sa piling ng inyong mga anak.

Sa palagay ko ay hindi mo dapat siyang hiwalayan, dahil lamang sa pagsulpot ng dati niyang asawa na gustong manggulo sa inyo.

Hayaan mo na lang ang tadhana na mag-ayos ng gusot na ito. Kung kayo ang tinakda ng tadhana magsama habambuhay, panindigan mo ‘yun at patuloy na magpasalamat dahil masaya ka rin naman sa piling ng asawa mo.

Sa palagay ko, wala namang laban ang una niyang asawa kung sakaling magdemanda ito dahil siya mismo pala ay may ibang lalaki na ring kinakasama. Pera lang ang katapat n’yan, at gusto lang siguro niyang humingi ng pera sa asawa mo. Madali lang ang solusyon d’yan, ipanatag mo ang iyong kalooban, dahil nasa panig mo ang tadhana.

Hindi magwawagi ang sinumang sumira sa pagsasama n’yo, lalo na kung ikaw ay magiging madasalin at mapagpakumbaba. Papanig sa iyo ang langit, hanggang dito na lang, pagpalain nawa kayo ng Diyos. Alalahanin mo na ang mag-asawa ay dapat nagmamahal, at hindi nag-aaway.

Sumasaiyo,

Sister Isabel del Mundo