Dalagang feeling malas sa buhay, gusto nang mag-suicide

ni Sister Isabel del Mundo - @Mga kuwento ng buhay at pag-ibig | October 08, 2023

Dear Sister Isabel,

Nabibilang kami sa mahirap na angkan. Kumbaga, ang aming pamumuhay ay isang kahig, isang tuka lamang. Wala na yatang kaligayahan na naghihintay sa amin.

Ang tatay ko ay mahilig magsabong gayung tricycle driver lang naman ang trabaho niya, habang ang nanay ko ay isang labandera. Tatlo kaming magkakapatid, at ako ang panganay.

Tinutulungan ko ang nanay ko sa pagtanggap ng labahin mula sa aming kapitbahay. Sawang-sawa na ako sa ganitong sistema ng aming buhay.

Elementary lang ang natapos ko, napilitan na akong huminto sa pag-aaral dahil wala na silang panggastos sa aking matrikula at iba pang gastusin sa iskul pati na rin ang aking baon at pamasahe.

Hindi ko mapigilang umiyak araw-araw. Madalas, sumasagi sa isip ko na wakasan ko na lang kaya ang buhay ko? Dahil mabuti pa sa langit, walang nagugutom, payapa at mapapanatag pa ako.

Ano kaya ang dapat kong gawin upang makayanan ko ang kalagayan namin ngayon?

Anumang oras gusto ko nang wakasan ang buhay ko, tulungan n’yo ako upang hindi ko na ituloy ang binabalak ko.

Nagpapasalamat,

Baby ng Bataan

Sa iyo, Baby,

Think positive, ang buhay ay paikut-ikot lang. Walang permanente sa mundo. Huwag kang masyadong malungkot sa kalagayan n’yo.

Mas malala pa nga ang problemang kinakaharap ng iba pero nakakayanan nila. Hindi ba? Ang mahalaga, walang may sakit sa inyo. Lahat kayo ay malusog at lumalaban sa hirap ng buhay.

Mabuti nga kung nauna ang hirap kaysa na nasa itaas ka kaagad tapos bigla kang babagsak. Mas masakit ‘yun, ‘di ba?

Ganyan ang buhay sa mundo. Matuto kang sumayaw sa tugtog. Ibig sabihin, harapin mo ng buong tapang lahat ng sitwasyong dumarating sa iyo. Hindi natutulog ang Diyos.

Isang araw magugulat ka na lang, dahil nand’yan na sa harapan mo ang kaligayahang minimithi mo. Lagi mong isaisip ang Diyos ay makatarungan. Paparating na sa iyong pintuan ang katuparan ng iyong mga pangarap.

Huwag ka mawawalan ng pag-asa, dahil habang may buhay may pag-asa, ugaliin mong magsimba tuwing Linggo. Mararamdaman mo, gagaan na rin ang iyong buhay.

Itigil mo na ang pag-iisip ng ganyang bagay. Hindi iyan ang solusyon, physical body mo lang ang mawawala, samantalang ang iyong isipan ay mananatili pa ring buhay na buhay, pagala-gala sa mundo, hindi na makakapagsaya, at ‘di ka na puwedeng bumalik para maranasan ang gantimpala ng iyong pagpupunyagi.

Nawa’y naliwanagan ka sa nailahad ko sa iyo. Life is what we make it. Nasa atin kung paano tayo liligaya sa buhay at kung paano natin haharapin ang mga pagsubok. Higit sa lahat matuto tayong tawagin ang Diyos. Prayer is the key.

Sumasaiyo,

Sister Isabel del Mundo

Kapatid na gahaman, sino-solo ang lupang ipinamana ng magulang

ni Sister Isabel del Mundo - @Mga kuwento ng buhay at pag-ibig | October 04, 2023

Dear Sister Isabel,

Ang isasangguni ko ay tungkol sa kapatid ko na gahaman. May kani-kanya na kaming titulo at area sa bakuran. Ngunit, hinaharangan at binabakuran niya pa rin ang space na para sa akin, hindi tuloy ako makadaan sa pinto namin dahil sa kanya, nang sitahin ko siya ay mas lalo siyang nagalit.

Kung gusto ko umano, sa akin na lahat ‘yung balkonahe namin. Pero, patuloy niya pa rin itong hinaharangan. Hindi ko na lang siya pinapatulan tutal wala pa naman akong pera noon pampagawa ng bahay. Pero ngayon, balak ko na itong ipagawa. Kaya lang, nag-aalangan akong kausapin siya tungkol dito.

Galing ito sa magulang namin at pinamana nila ito para sa amin. Ano kaya ang mabuti kong gawin para hindi magwala ang kapatid ko pagkinausap ko na siya tungkol du’n?

Nawa’y matulungan n’yo ako.

Nagpapasalamat,

Lorry Ann ng Pampanga

Sa iyo, Lorry Ann,

Lumapit ka sa iba mo pang kapatid na ginagalang niya. Sa palagay ko naman ay mauunawaan niya na hindi sa kanya ‘yung space na inaangkin niya. Ikaw ang may karapatan du’n. Walang bagay na ‘di nagtatagumpay kung dadaanin sa magandang usapan. Pareho lang sigurong mainit ang ulo n’yo noon, kaya kayo nagtalo at nagkasamaan ng loob.

Sa tingin ko naman ay ibibigay niya na sa iyo ang balkonahe mo, at tatanggalin na ang harang na inilagay niya. Pakikinggan niya rin ang kapatid n’yo na iginagalang niya.

Hayaan mo na ang kapatid mong nakakatanda ang kumausap sa kanya.

Sumaiyo nawa ang patnubay ng Diyos na makapangyarihan sa lahat. Magkasundu-sundo nawa kayo at huwag n’yong hayaang masira ang samahan n’yo dahil lang sa maliit na mana.

Sumasaiyo,

Sister Isabel del Mundo

Dapat gawin ng misis na todo-alala sa naiwang bahay at lupa ng mister

ni Sister Isabel del Mundo - @Mga kuwento ng buhay at pag-ibig | October 02, 2023

Dear Sister Isabel,

Dalawang beses na akong na biyuda. Namatay ang first husband ko noong 36-anyos palang ako, at muli akong nag-asawa noong 46-anyos ako. Biyudo na rin siya at may tatlong anak na pawang nasa hustong gulang na.

2 yrs. pa lang kaming nagsasama nu’ng inatake siya sa puso at tuluyan nang namatay.

Kasal kami sa huwes at sa simbahan.

Umuwi ako sa probinsya namin at bihira na lang dumalaw sa bahay namin ng namayapa kong asawa. Noong panahong ‘yun, ang bahay at lupa ng asawa ko ay nakasanla sa bangko hanggang sa pumanaw na lang siya.

Ang balita ko ay tinubos at binili na ng anak niya ‘yun. Nailipat na rin sa pangalan ng anak niya. 7 years na rin ang nakakalipas, nahihiya naman akong itanong sa anak niya kung ano na ang status ng house and lot na naiwan ng daddy niya. Hanggang ngayon, ‘di ginagalaw ang bahay, at halos mabulok na.

Ano kaya ang marapat kong gawin? Kausapin ko na ba ang anak ng asawa ko, at itanong kung ano na ang status ng bahay nila? Wala akong lakas ng loob na gawin ito, kasi baka sumama ang loob nila sa akin, pag-inusisa ko ang tungkol sa bagay na ‘yun.

Nawa’y mabigyan n’yo ako ng kaukulang payo.

Nagpapasalamat,

Mildred ng Nueva Ecija.

Sa iyo, Mildred,

Huwag ka nang mag-atubili na kausapin ang stepson mo tungkol sa house and lot na naiwan ng namayapa mong asawa upang maliwanagan ka. Tutal, kasal naman kayo ng ama niya. Karapatan mo rin malaman ang tungkol dito.

Harapin mo ang katotohanan kung sakaling malaman mo na binili at nakapangalan na sa anak niya ang house and lot, pakiusapan mo na lang ang stepson mo na kung ipapagawa niya ang bahay, bigyan ka na lang ng isang kwarto ru’n, na kung saan matutuluyan mo tuwing dadalawin mo sila.

Sa palagay ko naman, bilang stepmom niya, pagbibigyan ka niya sa iyong kahilingan. Iyan ang pinakamabuti mong gawin upang hindi kayo magkasamaan ng loob at upang malaman ng stepson mo na wala ka namang intensyong maghabol sa ari-arian ng ama niya. Hindi ka naman gahaman.

Wala kang ibang iniisip kundi ang pagkakasundo ng bawat isa. Alalahanin mong mas mapalad ang mga taong may magandang kalooban. Mas higit pa ru’n ang nakikita kong biyayang ilalaan sa iyo ng Diyos Amang makapangyarihan. Ipanatag mo na ang loob mo at ipagpatuloy ang pagiging maunawain at mapagmahal sa kapwa.

Sumasaiyo,

Sister Isabel del Mundo