‘Di aware na may stepsister... Lalaki, problemado dahil nabuntis na gf, kapatid pala sa labas

ni Sister Isabel del Mundo - @Mga kuwento ng buhay at pag-ibig | November 4, 2023

Dear Sister Isabel,

Hindi ko alam kung paano ko uumpisahan ang problemang isasangguni ko sa inyo.

Nagsimula ito nang makilala ko ang isang magandang babae sa mall, na-attract ako sa kanya. Mag-isa lang siyang nagbo-board dito sa Manila, at nagtatrabaho siya bilang kahera sa isang mall.

Naging malapit kami sa isa’t isa hanggang sa tuluyang maging kami. Madalas kaming mag-date, at dumating na nga sa puntong nabuntis ko siya. Ang pinoproblema ko ay baka hindi siya matanggap ng pamilya ko. Nabibilang ako sa mayamang angkan habang siya naman ang bread winner ng kanilang pamilya.

Sinubukan ko siyang ipakilala sa parents ko pero laking gulat ko sa aking natuklasan, dahil ang babaeng iniibig ko ay isa ko palang kapatid sa ama.

Nabuntis ng ama ko ang nanay niya noong kapwa sila nagtatrabaho sa abroad at siya ang naging bunga.

Hindi malaman ng parents ko kung ano ang gagawin. Nabigla din ako at parang masisiraan ng bait maski ang girlfriend ko ay gayundin. Napagpasyahan ng parents ko na paghiwalayin kami sa ayaw at sa gusto namin. Hindi kami puwedeng magsama bilang mag-asawa dahil magkapatid kami. Pareho ang dugong nananalaytay sa amin at may posibilidad na lumaking abnormal o special child ang aming magiging anak.

Ano ang dapat kong gawin para makayanan ko ito? Nawa’y magabayan n’yo ako, Sister Isabel.

Nagpapasalamat, Lauro ng Bataan

Sa iyo, Lauro,

Sadyang napakabigat ng problema mo. Sa dinami-rami ng babae sa mundo, kapatid mo pa ang nabuntis mo, well, hindi mo naman kasalanan dahil hindi mo naman talaga alam na kapatid mo pala siya.

Makakabuting harapin mo ang katotohanang hindi talaga kayo puwedeng magsama bilang mag-asawa dahil magkapatid kayo. Magiging abnormal ang inyong magiging anak dahil iisang dugo lang ang nananalaytay sa inyo. Sadyang mapagbiro ang tadhana, tanggapin mo na lang sa puso’t isipan mo na biktima ka ng mapagbirong tadhana.

Dumalangin ka sa Diyos upang makayanan mo ito. Siya ang gagawa ng paraan upang matanggap mo nang maluwag sa iyong kalooban ang mga pangyayari.

Naniniwala ako sa lalong madaling panahon, kikilos ang tadhana para sa inyong dalawa.

Taimtim na panalangin ang kalutasan sa problema mo. Huwag kang magsawang dumalangin sa Diyos na makapangyarihan sa lahat. Ilalagay niya sa ayos ang lahat basta’t patuloy kang magdasal at manalig na walang halong pag-aalinlangan. Hanggang dito na lang, hangad ko ang maagang kalutasan ng iyong problema sa tulong ng Diyos Ama sa Langit. ‘Di magtatagal, magiging maayos din ang inyong buhay sa hinaharap.

Sumasaiyo,

Sister Isabel del Mundo

Matapos buntisin… Dalaga, takot sa pambabanta ni tito

ni Sister Isabel del Mundo - @Mga kuwento ng buhay at pag-ibig | October 30, 2023

Dear Sister Isabel,

Gusto kong ibahagi ang kuwento ng aking buhay sa inyo. 18 yrs. old pa lang ako ngayon.

Ulilang lubos na ako, kung kaya napagdesisyunan ng tito ko na kupkupin ako. Hindi ko alam na may pagnanasa pala siya sa akin. Pinasok niya ako sa kwarto at pilit akong

pinagsamantalahan. Kalaunan ay nabuntis ako, pinagbantaan niya ako na 'wag ko umanong sasabihin na siya ang ama ng dinadala ko. Wala akong magawa kundi ang sumunod sa kanya. Palaki na ng palaki ang tiyan ko. 'Di ko alam ang aking gagawin.

Tulungan n'yo ako, Sister Isabel.

Nagpapasalamat, Lorry ng Malabon

Sa iyo, Lorry,

Karumal-dumal ang ginawa ng tito mo sa iyo. Sa halip na pagmalasakitan ka niya, ganyan pa ang ginawa niya sa iyo. Lakasan mo ang iyong loob.

Kung maaari, lumapit ka sa iyong teacher at magpatulong o 'di kaya naman sa tita mo na nagmamalasakit sa iyo. Umalis ka na r'yan, pumunta ka tita o teacher mo at sabihin mo sa kanila ang lahat ng iyong problema.

Dapat na makulong ang tito mo upang matauhan siya. Huwag kang mag-aksaya ng panahon.

Gabayan ka nawa ng Diyos sa problemang kinakaharap mo, kumilos ka na at sundin mo ang aking payo. Makakaasa ka, ipagdarasal kita. May magandang bukas pang naghihintay para sa iyo. Huwag kang mawalan ng pag-asa. Habang may buhay, may pag-asa.

Sumasaiyo,

Sister Isabel del Mundo

Dalaga, nagawang ibenta ang sarili para sa droga

ni Sister Isabel del Mundo - @Mga kuwento ng buhay at pag-ibig | October 25, 2023

Dear Sister Isabel,

Mahilig akong makipagkaibigan, at dahil du'n ay na-push akong tumikim ng droga.

Noong una, paunti-unti lang pero nu’ng tumagal-tagal ay dumalas-dalas na ito.

Napilitan akong ibenta ang aking sarili para sa droga. May trabaho naman ako pero kulang pa ito sa bisyo ko.

Nagbo-board ako rito sa Manila, at hindi alam ng magulang ko ang kalagayan ko ngayon.

Bihira lang ako kung umuwi sa probinsya, hindi nila ako gaanong hinahanap dahil abala rin sila sa negosyo nila ru'n. Gusto ko nang tumigil pero natatakot ako. Suki na ako ng isang sindikato na binibilhan ko. Tinatakot at binabantaan nila ako na ‘wag umano akong titigil sa pagbili ng droga.

Ano ang dapat kong gawin? Tulungan n'yo ako, Sister Isabel.

Nagpapasalamat,

Gloria ng Cavite

Sa iyo, Gloria,

Sa palagay ko ay mas makakabuting umalis ka na r'yan sa tinitirahan mo at mag-iba ka na rin ng pinapasukang trabaho. Magbagong buhay ka sa lugar na ‘di ka nila mahahanap. Tuluyan mo ring alisin ang bisyo mo. Kaya mo ‘yan, basta’t pagsumikapan mo. Walang mabuting maidudulot sa iyo ang bawal na gamot, pati tuloy ang 'yung sarili mo ay naibenta mo na.

Magbagong buhay, at humingi ka ng tawad sa Diyos. Taimtim kang magdasal para i-guide ka niya sa bagong buhay na papasukin mo. Sumaiyo nawa ang pagpapala ng Dakilang Lumikha.

Sumasaiyo,

Sister Isabel del Mundo