Misis, suko na sa mister na 'di marunong makuntento

ni Sister Isabel del Mundo - @Mga kuwento ng buhay at pag-ibig | November 13, 2023

Dear Sister Isabel,

Kakaiba ang kuwento ng buhay at pag-ibig ko. Maaaring hindi kayo maniwala pero totoo ang aking ibabahaging kuwento. Ako, ang unang asawa ng husband ko. Kasal kami pero dahil mahilig sa babae ang mister ko, nagkaroon siya ng pangalawang asawa at tinira niya sa bahay. Kaya ang ending, dalawa na kaming asawa niya. Wala akong ibang magawa dahil siya ang gumagastos dito sa bahay.

Ang mas masakit pa, ‘di pa siya nakuntento sa amin, at kumuha pa uli siya ng isa pa.

Mabuti na lang, hindi ako inaaway nu’ng dalawa dahil alam nila na kabit lang sila.

Parang hindi ko na kaya ang ganitong sitwasyon. Hindi ko na masikmura na tatlo kami sa puso ng asawa ko na nagsasama-sama sa iisang bahay. Kahit pa sabihin na hindi kami kinakapos, sunod sa layaw ang bawat isa sa amin. Gusto ko na sanang umalis dito at hiwalayan na lang ang asawa ko. Handa naman ang isa kong anak na kalingain ako. May sarili na itong pamilya at nakakaluwag-luwag din sa buhay. Ano ang dapat kong gawin, dapat ko bang ituloy ang pakikipaghiwalay sa mister ko? Sana mapayuhan n’yo ako.

Nagpapasalamat,

Inday

Sa iyo, Inday,

Mapagpalang buhay sa iyo. Sadyang kakaiba ang kuwento ng buhay at pag-ibig mo.

Kung hindi mo na masikmura ang kalagayan mo r’yan sa bahay n’yo na kung saan nand’yan din ang dalawa pang asawa ng mister mo. Makabubuting ituloy mo na ang balak mong pakikipaghiwalay sa kanya. Tutal may anak ka naman na handang sumuporta sa iyo at kaya kang kupkupin. ‘Yun nga lang, mag-isip-isip ka munang mabuti at 'wag kang magpadalus-dalos. Tanungin mo muna ang iyong sarili kung talagang kaya mong iwan ang asawa mo. Kung sa kabuhayan naman, ikaw ang legal na asawa, ikaw pa rin ang may karapatan du’n at hindi ang mga kabit niya.

Hangad kong maliwanagan kang mabuti sa iyong binabalak nang sa gayun ay matagpuan mo na ang katahimikan ng puso’t isipan mo. Mapagtatanto rin ng iyong mister ang kalokohang ginagawa niya. Hanggang dito na lang, gabayan ka nawa ng Dakilang Kataas-taasan. Ibulong nawa ng Diyos ang marapat mong gawin.

Sumasaiyo,

Sister Isabel del Mundo

‘Di na kering subaybayan ang mga junakis… Panganay, stress sa 2 kapatid na naligaw ng landas

ni Sister Isabel del Mundo - @Mga kuwento ng buhay at pag-ibig | November 8, 2023

Dear Sister Isabel,

Masalimuot ang kuwento ng aking buhay. Tatlo kaming magkakapatid ngunit magkakaiba kami ng ama. Hindi naman bayaran ang nanay ko, pero iba’t ibang lalaki na ang pinakisamahan niya, at ang ending lagi pa rin siyang iniiwan.

Ang problema ay hindi kami magkasundu-sundo. Lagi kaming nag-aaway kahit sa maliit na bagay lang. Pilit ko silang iniintindi dahil ako ang panganay pero sadyang matitigas ang ulo nila. Ayokong maligaw sila ng landas kaya pinapakialaman at pinapayuhan ko sila sa abot ng aking makakaya.

Wala nang panahon ang aming ina na subaybayan ang kanilang mga lakad. Sa ngayon, nalulong na sa bawal na gamot ang isa kong kapatid habang ‘yung isa naman ay naadik na sa sugal, kaya madalas na lumiban sa klase.

Ano kaya ang mabuti kong gawin para ‘di mapunta sa maling landas ang dalawa kong kapatid?

Tulungan n’yo ako, Sister Isabel.

Nagpapasalamat,

Trixie ng Valenzuela

Sa iyo, Trixie,

Ang pinakamaganda mong gawin ay lumapit ka tito at tita mo. Magpatulong ka sa kanila, sabihin mo sa kanila lahat ng nangyayari sa inyo. Hindi mo ‘yan masosolusyunang mag-isa. Kailangan mo rin ang tulong ng malapit n’yong kamag-anak na alam mong may malasakit sa inyo. Subukan mo ring sumali sa religious organization na nagbabahay-bahay para makapagbigay sa iyo ng kasiyahan at para malutas na rin ang suliranin ng iyong pamilya.

Higit sa lahat, idulong mo sa Diyos ang suliranin mo, walang ‘di malulutas kung hihingi ka ng tulong sa Kanya. Taimtim kang magdasal at tandaan mo, God hears, God listen, and God cares.

Sumasaiyo,

Sister Isabel del Mundo

‘Di malaman ang gagawin… Dalaga, problemado kung paano ipagtatapat na may karelasyong tibo

ni Sister Isabel del Mundo - @Mga kuwento ng buhay at pag-ibig | November 7, 2023

Dear Sister Isabel,

May nakilala akong lesbian, naging malapit ang loob namin sa isa’t isa hanggang sa nagkapalagayan na kami ng loob. Marami akong admirer pero hindi ko sila pinapansin dahil mas masaya ako sa piling ng karelasyon kong tomboy ngayon.

Hindi alam ng pamilya ko ang kalagayan ko, nag-aalala ako na baka ‘pag malaman nila ang aming relasyon ay itakwil nila ako. Alam kong walang lihim na hindi nabubunyag, kaya ngayon ay nag-iisip ako kung paano ko maitatago ang sitwasyong ito sa pamilya ko. Baka ‘pag nabigla sila ay masaktan at pagtabuyan ako ng father ko.

Ano’ng gagawin ko para ngayon palang ay mapaghandaan ko na ang sasabihin ko sa kanila?

Sana ay matulungan n’yo ako, Sister Isabel.

Umaasa,

Barbie ng Bulacan

Sa iyo, Barbie,

Tanggap na ng lipunan ang sitwasyong dinaranas mo sa kasalukuyan. Marami nang nagladlad na hindi naman gaanong binigyang pansin. Malaya na ang third sex na tinatawag sa buhay na gusto nilang tahakin, tanggap na rin ng kani-kanilang pamilya ang tunay nilang pagkatao. Hayaan mo na lang na kusang malaman ng pamilya mo ang tungkol sa relasyon n’yo. Sa palagay ko naman ay matatanggap ka rin nila.

Kung nakikita mo ang iyong sarili na umiibig na isang lesbian, masaya ka tuwing kapiling mo siya at mas nararamdaman mo ang pag-ibig ‘pag siya ang kasama mo, ituloy mo lang kung saan ka masaya, basta’t wala kang inaapakang ibang tao na magiging dahilan upang lumuha sila.

Hindi mo kasalanan mainlab sa isang tibo, mabuti nga iyan kaysa patuloy kang magkunwari sa mundo na para bang laging may tinatago. Naniniwala ako, isang araw matatanggap din ng pamilya mo ang kasalukuyang kalagayan mo, mauunawaan ka rin nila. Hanggang dito na lang, hangad ko ang iyong kapayapaan at kaligayahan sa buhay.

Sumasaiyo,

Sister Isabel del Mundo